ជនសង្ស័យជាមុខសញ្ញាជួញដូរគ្រឿងញៀនម្នាក់ ត្រូវបានកម្លាំងប៉ុស្តិ៍ននគរបាលរដ្ឋបាលភ្នំបាត បង្ក្រាបឃាត់ខ្លួនរួមជាមួយគ្រឿងញៀនមួយចំនួន កាលពីវេលាម៉ោងជាង ៥ល្ងាច ថ្ងៃទី០៨ ខែសីហា ឆ្នាំ២០២៤ នៅចំណុចភូមិចំបក់ភ្លោះ ឃុំភ្នំបាត ស្រុកពញាឮ ខេត្តកណ្តាល ។
ជនសង្ស័យខាងលើមានឈ្មោះ ប្រាក់ ម៉ូ ភេទប្រុស អាយុ ២៥ ជនជាតិខ្មែរ មានទីលំនៅភូមិចំបក់ភ្លោះ ឃុំភ្នំបាត ស្រុកពញាឮ ខេត្តកណ្តាល មានសារធាតុញៀនក្នុងទឹកនោម ( + ) ។ ចំណែកវត្ថុតាងដកហូតបានរួមមាន៖ ម្សៅក្រាមពណ៌សថ្លា សង្ស័យជាសារធាតុញៀនមេតំហ្វេតាមីន (ice) ចំនួន ០៥ កញ្ចប់តូចទម្ងន់ ០ , ៦៧ ក្រាម, ទូរស័ព្ទដៃមួយ
នៅចំពោះមុខសមត្ថកិច្ចជនសង្ស័យបានឆ្លើយសារភាពថា៖ ខ្លួនពិតជាបានយកថ្នាំញៀននេះទៅលក់អោយគេនៅក្នុងភូមិចំបក់ភ្លោះប្រាកដមែន ដោយទិញពីឈ្មោះ ម៉ាញ ផ្ទះនៅម្តុំភ្នំព្រះរាជទ្រព្យ យកមកច្រកជាកញ្ចប់តូចៗ លក់តម្លៃ ០១ កញ្ចប់ ២០.០០០រៀល ( ពីរម៉ឺនរៀល ) ដោយទើបចាប់ផ្តើមលក់បានប្រហែលកន្លះខែនេះទេ ចាប់ពីពេលបានស្គាល់ និងទំនាក់ទំនងជាមួយឈ្មោះ ម៉ាញ មក និង ចេះប្រើប្រាស់គ្រឿងញៀន រយៈពេលប្រហែល ០៣ ឆ្នាំមកហើយ ។
បច្ចុប្បន្នជនសង្ស័យ ត្រូវបានឃាត់ខ្លួននៅអធិការដ្ឋាននគរបាលស្រុកពញាឮ ដើម្បីកសាងសំណុំរឿងបន្តអនុវត្តចាត់ការតាមនីតិវីធី ៕
