គ្រោះថ្នាក់ចរាចរណ៍ដ៏រន្ធត់នៅក្រុងតាខ្មៅ! ឪពុកស្លាប់ កូនស្រីរបួសធ្ងន់ធ្ងរ រីឯនារីម្នាក់ទៀតក៏រងរបួសធ្ងន់ ក្រោយម៉ូតូបុកម៉ូតូ

ខេត្តកណ្ដាល៖ គ្រោះថ្នាក់ចរាចរណ៍ដ៏សែនរន្ធត់មួយ បានឆក់យកជីវិតបុរសជាឪពុកម្នាក់ ខណៈកូនស្រីតូចជាទីស្រលាញ់ និងនារីម្នាក់ទៀត បានរងរបួសធ្ងន់ធ្ងរ។ ករណីបុកគ្នារវាងម៉ូតូនិងម៉ូតូនេះ បានកើតឡើងកាលពីវេលាម៉ោង ១៩:០០នាទីយប់ថ្ងៃទី៥ ខែមិថុនា ឆ្នាំ២០២៥ នៅចំណុចផ្លូវជាតិលេខ២១A ស្ថិតក្នុងភូមិលេខ២ សង្កាត់ស្វាយរលំ ក្រុងតាខ្មៅ ខេត្តកណ្ដាល។

ប្រភពសមត្ថកិច្ចមូលដ្ឋានបានឲ្យដឹងថា នៅវេលាកើតហេតុ មានម៉ូតូ១គ្រឿង ម៉ាក HONDA CUB ពណ៌ខៀវចាស់ ពាក់ស្លាកលេខកំពង់ឆ្នាំង1A-0660 បើកបរដោយឈ្មោះ ផាន់ សុផល ភេទប្រុស អាយុ ៥៣ឆ្នាំ រួមដំណើរជាមួយកូនស្រីឈ្មោះ លាង គី អាយុ ១០ឆ្នាំ។ ឪពុកនិងកូនស្រី មានទីលំនៅភូមិលេខ៣ សង្កាត់ស្វាយរលំ ក្រុងតាខ្មៅ ខេត្តកណ្ដាល។ ពួកគេទាំង២នាក់ មិនបានពាក់មួកសុវត្ថិភាពនោះទេ។ ម៉ូតូនេះបានបើកបរមានទិសដៅពីកើតទៅលិច។ ពេលបើកមកដល់កន្លែងកើតហេតុ ក៏បានបត់ឆ្វេងឆ្លងផ្លូវ។

ស្របពេលនោះ ក៏មានម៉ូតូ១គ្រឿងទៀត ម៉ាក HONDA DREAM ពណ៌ខ្មៅ ពាក់ស្លាកលេខភ្នំពេញ1GZ-9428 បើកបរដោយឈ្មោះ រុំ ស្រីកា ភេទស្រី អាយុ ១៨ឆ្នាំ មានទីលំនៅភូមិកំពង់ព្រីង សង្កាត់សិត្បូ ក្រុងតាខ្មៅ ខេត្តកណ្ដាល។ នារីរូបនេះក៏មិនបានពាក់មួកសុវត្ថិភាពដែរ ហើយបានបើកបរម៉ូតូមានទិសដៅពីលិចទៅកើត (បញ្ច្រាសទិសគ្នា)។ ភ្លាមៗនោះ ម៉ូតូទាំង២គ្រឿងក៏បានបុកគ្នាពេញទំហឹងចំពាក់កណ្ដាលម៉ូតូម៉ាក HONDA CUB ចំហៀងខាងស្ដាំ។

គ្រោះថ្នាក់ដ៏រន្ធត់នេះបានបណ្ដាលឲ្យអ្នកបើកម៉ូតូម៉ាក HONDA CUB គឺលោក ផាន់ សុផល រងរបួសធ្ងន់ធ្ងរ ហើយបានបាត់បង់ជីវិតពេលក្រុមគ្រួសារបញ្ជូនទៅដល់មន្ទីរពេទ្យ។ ចំណែកកូនស្រីរួមដំណើរជាមួយ គឺកុមារី លាង គី អាយុ ១០ឆ្នាំ ក៏រងរបួសធ្ងន់ធ្ងរផងដែរ ត្រូវបានក្រុមគ្រួសារដឹកទៅសង្គ្រោះបន្ទាន់នៅមន្ទីរពេទ្យគន្ធបុប្ផា។ រីឯអ្នកបើកម៉ូតូ HONDA DREAM គឺនាង រុំ ស្រីកា ក៏រងរបួសធ្ងន់ ហើយត្រូវបានបងប្អូនដឹកយកទៅមន្ទីរពេទ្យដោយខ្លួនឯង។ ម៉ូតូទាំង២គ្រឿងរងការខូចខាតធ្ងន់ធ្ងរ។

សមត្ថកិច្ចបានធ្វើការសន្និដ្ឋានបឋមថា មូលហេតុនៃគ្រោះថ្នាក់នេះបណ្ដាលមកពីអ្នកបើកបរម៉ូតូម៉ាក HONDA CUB បើកបត់ឆ្វេងឆ្លងកាត់ផ្លូវខ្វះការប្រុងប្រយ័ត្ន។ រីឯអ្នកបើកម៉ូតូម៉ាក HONDA DREAM បានបើកបរមានល្បឿនលឿនខ្វះការប្រុងប្រយ័ត្ន។

បច្ចុប្បន្ន មធ្យោបាយពាក់ព័ន្ធទាំង២គ្រឿង ត្រូវបានយកទៅរក្សាទុកនៅអធិការដ្ឋាននគរបាលក្រុងតាខ្មៅ ដើម្បីចាត់ការតាមនីតិវិធីច្បាប់។