អតីតកោះឈើខ្មៅដែលធ្លាប់មានសណ្ឋានជាកោះនោះ បច្ចុប្បន្នបានប្រែក្លាយជាដីខ្ពបហើយលែងមានសណ្ឋានកោះទៀតហើយ។ ជាង ៤០ ឆ្នាំមកនេះ ដីនេះបានក្លាយទៅជាចំការដំណាំចម្រុះដែលជាប្រភពចំណូលដ៏សំខាន់សម្រាប់ផ្គត់ផ្គង់ជីវភាពគ្រួសារប្រជាពលរដ្ឋ។ ហេតុដូច្នេះ ប្រជាពលរដ្ឋបានស្នើសុំទៅឯកឧត្តមអភិបាលខេត្តមេត្តាជួយចុះបញ្ជីចេញប្លង់កម្មសិទ្ធិស្របច្បាប់ជូនពួកគាត់ផង។
ប្រជាពលរដ្ឋប្រមាណ ៥០ នាក់ រួមទាំងអនុភូមិ និងមេភូមិទាំងប្រាំនៃសង្កាត់ជ្រោយតាកែវនិងសង្កាត់ឈើខ្មៅ ក្រុងសំពៅពូន បានរួមគ្នាយកពាក្យដាក់ស្នើសុំឲ្យឯកឧត្តមអភិបាលខេត្តកណ្ដាល មេត្តាជួយអន្តរាគមន៍ឲ្យក្រុមការងារចុះបញ្ជីដីធ្លីជាប្រព័ន្ធចុះវាស់វែងនិងចេញបណ្ណកម្មសិទ្ធិជូនពួកគាត់។
ពួកគាត់បានបញ្ជាក់ថា ប្រជាពលរដ្ឋប្រមាណ ១៨០ គ្រួសារ ដែលរស់នៅក្នុងភូមិទាំង ៥ គឺភូមិព្រែកភូមិ ភូមិដើមពោធិ៍ នៃសង្កាត់ជ្រោយតាកែវ និងភូមិក្បាលកោះ ភូមិកោះតូច ភូមិឈើខ្មៅ នៃសង្កាត់ឈើខ្មៅ ក្រុងសំពៅពូន បានកាន់កាប់និងអាស្រ័យផលលើអតីតដីកោះឈើខ្មៅនេះ តាំងពីអំឡុងឆ្នាំ ១៩៨០ មកម្ល៉េះ ដែលមានផ្ទៃដីជាង ៧០ ហិកតា។ អាជ្ញាធរមូលដ្ឋានក៏បានទទួលស្គាល់ការកាន់កាប់នេះផងដែរ។
ប្រជាពលរដ្ឋបានបញ្ជាក់បន្ថែមទៀតថា ដីនេះ បច្ចុប្បន្ន បានក្លាយជាចំការស្វាយ មៀន និងដំណាំអនុផលចម្រុះ ដែលជាប្រភពចំណូលសម្រាប់ផ្គត់ផ្គង់ជីវភាពផងដែរ ហើយបន្ទាប់ក្រុមការងារចុះបញ្ជីរដីធ្លីជាប្រពន្ធ័ ធ្វើកាស់វាស់ ធ្វើបណ្ណ័កម្មសិទ្ធិដីលំនៅដ្ឋាន និងដីស្រែ រួចរាល់ មិនឃើញវាស់ដីអនុផលឱ្យ។ កាលពីខែកុម្ភៈ ឆ្នាំ ២០២៤ ពួកគាត់ធ្លាប់បានដាក់សំណើទៅអភិបាលក្រុងសំពៅពូនរួចម្តងហើយ ដើម្បីស្នើសុំការវាស់វែងនិងចេញប្លង់ដូចដីលំនៅឋាននិងដីស្រែដែរ។ ប៉ុន្តែខាងក្រុងបានឆ្លើយតបថា ករណីនេះទាល់តែមានការសម្រេចពីរដ្ឋបាលខេត្ត។
នេះជាមូលហេតុដែលជំរុញឲ្យពួកគាត់នាំគ្នាឡើងមកដាក់ពាក្យស្នើសុំឲ្យឯកឧត្តម គួច ចំរើន អភិបាលខេត្តកណ្ដាល មេត្តាជួយផ្តល់ប្លង់រឹងជូនពួកគាត់ ប្លង់រឹងនេះនឹងក្លាយជាទំនុកចិត្តមួយដ៏ធំសម្រាប់ពួកគាត់ ហើយអាចយកទៅដាក់បញ្ចាំធនាគារដើម្បីយកប្រាក់មកធ្វើដើមទុនពង្រីកមុខរបរបាន។
ពួកគាត់ក៏បានបង្ហាញក្ដីរីករាយជាខ្លាំងនៅពេលដែលលោកនាយករដ្ឋបាលខេត្តកណ្ដាល បានចេញមកទទួលសំណើដោយផ្ទាល់ និងបានសន្យាថានឹងដាក់សំណើនេះជូនឯកឧត្តមអភិបាលខេត្តពិនិត្យសម្រេច។ ពួកគាត់សង្ឃឹមយ៉ាងមុតមាំថា រដ្ឋបាលខេត្តនឹងសម្រេចវាស់វែងនិងធ្វើប្លង់ជូនពួកគាត់ដូចដីភូមិនិងដីស្រែដែរ។
លោក ជី ស៊ីវុត្ថា នាយករដ្ឋបាលសាលាខេត្តកណ្ដាល បានបញ្ជាក់ថា លោកបានទទួលសំណើរបស់បងប្អូនប្រជាពលរដ្ឋទាំងប្រាំភូមិមកពីសង្កាត់ជ្រោយតាកែវនិងសង្កាត់ឈើខ្មៅ ក្រុងសំពៅពូនរួចហើយ។ លោកនឹងធ្វើការកោះអញ្ជើញអាជ្ញាធរពាក់ព័ន្ធមកធ្វើការសាកសួរព័ត៌មានលម្អិតទាក់ទងនឹងទីតាំងដីដែលប្រជាពលរដ្ឋបានដាក់សំណើនោះ ដើម្បីធ្វើរបាយការណ៍ដាក់ជូនឯកឧត្តមអភិបាលខេត្តពិនិត្យនិងសម្រេច។