ជនសង្ស័យ ៣នាក់ ដែលញៀនល្បែងជល់មាន រួមនឹងម៉ូតូចំនួន ១៨គ្រឿង មាន់ជល់ ២ក្បាល ត្រូវបានសមត្ថកិច្ច បង្ក្រាបបាន កាលពីវេលាម៉ោង ១១និង៥០នាទី ថ្ងៃទី៣០ ខែមករា ឆ្នាំ២០២៥ នៅចំណុចដីចំការស្វាយ ( ម្ចាស់នៅភ្នំពេញ) ដែលស្ថិតក្នុងភូមិពោធិរលំ ឃុំរកាកោង(២) ស្រុកមុខកំពូល ខេត្តកណ្តាល ។
លោកវរសេនីយ៏ឯក ឯក លន់ អធិការនគរបាលស្រុកមុខកំពូល បានប្រាប់ឱ្យដឹងថា ជនសង្ស័យ ៣នាក់ ខាងលើ ទី១-ឈ្មោះ ឈួន ចាន់នី ភេទប្រុស អាយុ ៣៧ឆ្នាំ ជនជាតិខ្មែរ មុខរបរ បុគ្គលិកក្រុមហ៊ុន មានទីលំនៅ ភូមិល្វាលើ ឃុំស្ដៅ ស្រុកកងមាស ខេត្តកំពង់ចាម, ទី២-ឈ្មោះ លី សុខពីវ ភេទប្រុស អាយុ ៣០ឆ្នាំ ជនជាតិខ្មែរ មុខរបរ កម្មករសំណង់ មានទីលំនៅ ភូមិល្វាក្រោម ឃុំស្ដៅ ស្រុកកងមាស ខេត្តកំពង់ចាម និងទី៣-ឈ្មោះ ស្រេង អូន ភេទប្រុស អាយុ ៥១ឆ្នាំ ជនជាតិខ្មែរ មុខរបរ កម្មករសំណង់ មានទីលំនៅ ភូមិព្រែកផ្ដៅ ឃុំរការកោងទី(១) ស្រុកមុខកំពូល ខេត្តកណ្តាល ។ ចំណែកក្រុមអ្នកលេងជល់មាន់មួយចំនួនទៀតមិនស្គាល់អត្តសញ្ញាណ បានរត់គេចខ្លួន ។ រីឯវត្ថុតាងចាប់យក រួមមាន៖ មាន់ជល់ចំនួន ២ក្បាល, កន្ត្រកដាក់មាន់ ចំនួន ០៤, ម៉ូតូចំនួន ១៨គ្រឿង, កញ្ចក់ចំនួន០១, ជញ្ជីងថ្លឹងមាន់ ចំនួន០១, សំបកស្កុតរុំមាន់ ជាច្រើនដុំ និងក្រដាសបុង ១ដុំ។
លោកអធិការបានប្រាប់អោយដឹងទៀតថា ក្រោយទទួលបានព័ត៌មានថា មានការលួចលេងល្បែងស៊ីសងជល់មាន់នៅចំណុចកើតហេតុខាងលើភ្លាម កម្លាំងជំនាញនៃអធិដ្ឋាននគរបាលស្រុក បានសហការជាមួយប៉ុស្ដិ៍នគរបាលរដ្ឋបាលស្វាយអំពារ និងកម្លាំងប្រជាការពារ ចុះទៅដល់កន្លែងកើតហេតុធ្វើការបង្ក្រាប ដោយឃាត់បានជនសង្ស័យចំនួន ០៣នាក់ រួមនឹងវត្ថុតាងខាងលើ ដោយឡែកក្រុមជនសង្ស័យមួយចំនួនទៀតបានរត់គេចខ្លួន ។ ក្រោយពីធ្វើការបង្ក្រាបកម្លាំងយើងបានយកជនសង្ស័យ រួមនិងវត្ថុតាងមកសួរនាំនៅអធិការដ្ឋាននគរបាលស្រុកមុខកំពូល និងកសាងសំណុំរឿងដើម្បីបន្តចាត់ការតាមនីតិវិធី ៕
