ជនសង្ស័យប្រុស-ស្រី ចំនួន ៥នាក់ ត្រូវបានកម្លាំងនគរបាលស្រុកកៀនស្វាយ បង្ក្រាប និងឃាត់ខ្លួនជាបន្តបន្ទាប់ពាក់ព័ន្ធនឹងគ្រឿងញៀន ។
ប្រតិបត្តិការបង្ក្រាបនេះ សមត្ថកិច្ចធ្វើឡើងកាលពីវេលាម៉ោងជាង ៩ព្រឹក ថ្ងៃទី២៦ មករា ២០២៥ នៅចំណុចភូមិជ័យឧត្តម២ ឃុំសំរោងធំ ស្រុកកៀនស្វាយ ខេត្តកណ្ដាល ។
លោកវរសេនីយ៍ឯក ព្រុំ សំណាង អធិការនគរបាលស្រុកកៀនស្វាយបានឱ្យដឹងថា ជនសង្ស័យទាំង ៥នាក់ ខាងលើ ទី១-ឈ្មោះ ណូ ទិវា (ក្តាម) ភេទប្រុស អាយុ ២៤ឆ្នាំ ជនជាតិខ្មែរ មុខរបរមិនពិត មានទីលំនៅភូមិជ័យឧត្តម ឃុំសំរោងធំ ស្រុកកៀនស្វាយ (ជួញដូរ), ទី២-ឈ្មោះ ខន សុខ ភេទប្រុស អាយុ ២៥ឆ្នាំ ជនជាតិខ្មែរ មុខរបរ មិនពិត មានទីលំនៅភូមិជ័យឧត្តម២ ឃុំសំរោងធំ ស្រុកកៀន
ស្វាយ (ជួញដូរ), ទី៣-ឈ្មោះ វឿន វុធធឿន (ចាយ) ភេទប្រុសអាយុ ៣០ឆ្នាំ ជនជាតិខ្មែរ មុខរបរមិនពិត មានទីលំនៅភូមិជយ័ឧត្តម២ ឃុំសំរោងធំ ស្រុកកៀនស្វាយ (ប្រើប្រាស់), ទី៤-ឈ្មោះ អ៊ុន ស្រីឡេ ភេទស្រី អាយុ ២២ឆ្នាំ ជនជាតិខ្មែរ មុខរបរមិនពិត មានទីលំនៅភូមិព្រែកប៉ុល ឃុំបន្ទាយដែក ស្រុកកៀនស្វាយ (ប្រើប្រាស់) និងទី៥-ឈ្មោះ ជឹម ស្រីលក្ខណ ភេទស្រី អាយុ ៣២ឆ្នាំ ជនជាតិខ្មែរ មុខរបរមិនពិត មានទីលំនៅភូមិស្តៅកន្លែង៤ ឃុំដីឥដ្ឋស្រុកកៀនស្វាយ (ប្រើប្រាស់) ។ ចំណែកវត្ថុរឹបអូសបានមាន ម្សៅក្រាមពណ៌សថ្លា សង្ស័យជាសារធាតុញៀនម៉ាទឹកកក ចំនួន១ កញ្ចប់តូច (ទម្ងន់០,០៤ក្រាម) ។
លោកអធិការបានឱ្យដឹងទៀតថា នៅចំពោះមុខសមត្ថកិច្ច ជនសង្ស័យ ឈ្មោះ ខន សុខ និងឈ្មោះ ណូ ទិវា បានសារភាពថាឈ្មោះ ថាវ ឡុច (ប៉ក់) ធ្លាប់ប្រើពួកខ្លួនយកថ្នាំញៀនលក់អោយគេជាច្រើនដងមកហើយ ចំពោះថ្នាំញៀនម៉ាទឹកកកចំនួន ១កញ្ចប់តូចនេះ ជារបស់ឈ្មោះ ថាវ ឡុច (ប៉ក់) មិនដឹងទិញមកពីណាទេ ។ ចំណែកឈ្មោះ វឿន វុធធឿន (ចាយ) ឈ្មោះ ជឹមស្រីលក្ខណ៍ និងឈ្មោះ អ៊ុន ស្រីឡេ បានសារភាពថា ពួកខ្លួនធ្លាប់ប្រើប្រាស់ថ្នាំញៀនជាមួយឈ្មោះ ថាវ ឡុច (ប៉ក់) ជាច្រើនដងមកហើយ និងចេះប្រើប្រាស់ថ្នាំញៀន ១ឆ្នាំមកហើយ ។ រីឯឈ្មោះ ថាវ ឡុច (ប៉ក់) ភេទប្រុស ផ្នែកប្រឆាំងគ្រឿងញៀនស្រុក សហការជាមួយប៉ុស្តិ៍សំរោងធំបន្តស្រាវជ្រាវរហូតដល់ម៉ោង ១៣:៤០នាទី តែរកពុំឃើញ ។ ក្រោយសួរនាំរួច ជនសង្ស័យទាំង ៥នាក់ (ស្រី២) រួមទាំងវត្ថុតាងបានបញ្ជូនមកអធិការដ្ឋាននគរបាលស្រុកកៀនស្វាយ ដើម្បីចាត់ការតាមនីតិវិធី ៕
