ពិជាគួរឲ្យអនិច្ចាខ្លាំងណាស់ ដែលស្ត្រីម្នាក់គ្មានអ្នកជួយបាន ដោយឆក់ខ្សែភ្លើងបូមទឹកខ្លួនឯង នៅខាងក្នុងព្រែកក្រោយផ្ទះស្លាប់ ក្រោយពេលប្តីចេញទៅធ្វើការសំណង់ ដែលហេតុការខាងលើ បានកើតឡើងកាលពីវេលាម៉ោង ១៦និង៤០នាទី ថ្ងៃទី២៣ ខែមករា ឆ្នាំ២០២៥ នៅចំណុចមាត់ព្រែកមុខកំពូល ខាងក្រោយផ្ទះ ស្ថិតក្នុងភូមិអន្លុង់ស្លែង ឃុំសំបួរមាស ស្រុកមុខកំពូល ខេត្តកណ្តាល ។
លោកវរសេនីយ៍ឯក ឯក លន់ អធិការនគរបាលស្រុកមុខកំពូល បានប្រាប់អោយដឹងថា ជនរងគ្រោះមានឈ្មោះ ចែម សុខ ហៅតឿ អាយុ ៥៣ឆ្នាំ ជនជាតិខ្មែរ មុខរបរ នៅផ្ទះ មានទីលំនៅក្នុងភូមិឃុំកើតហេតុ ។
លោកអធិការបន្តទៀតថា យោងតាមការបំភ្លឺរបស់ឈ្មោះ សុខ សៀន ដែលត្រូវជាប្ដី និងឈ្មោះ រតនា ឆេងអាន់ ដែលត្រូវជាក្មួយបានឲ្យដឹងថា នៅមុនកើតហេតុ វេលាម៉ោង ១១ ក្រោយជួបជុំពិសារបាយរួច ប្តីរបស់ស្ត្រីរងគ្រោះ បានចាកចេញទៅធ្វើការសំណងចម្ងាយ ០១គីឡូម៉ែត្រពីផ្ទះ ចំណែកឯជនរងគ្រោះសម្រាកនៅផ្ទះធម្មតា ។ លុះដល់វេលាម៉ោង ១៦និង៣០នាទី ឈ្មោះ រតនា ឆេងអាន់ បានមកផ្ទះរបស់ម្តាយមីង (ស្ត្រីរងគ្រោះ) តែមិនឃើញ ក៏ទូរសព្ទ័រក ក៏មិនមានអ្នកលើក រួចក៏ព្យាយាមសួរអ្នកជិតខាងក៏គ្មានអ្នកណាបានឃើញ ។ លុះដល់វេលាម៉ោង ១៦និង៤០នាទី ឈ្មោះ រតនា ឆេងអាន់ ក៏បានដើរទៅនិយាយទូរស័ព្ទនៅខាងក្រោយផ្ទះ ក៏ស្រាប់តែឃើញ ម្តាយមីងអណ្ដែតទឹក ដោយផ្ងារខ្លួន ហើយដៃមានរុំព័ទ្ធដោយខ្សែភ្លើងម៉ូទ័របូមទឹក ដោយមានសភាពរឹងខ្លួន ឃើញដូច្នេះ ឈ្មោះ រតនា ឆេងអាន់ ក៏បានស្រែកហៅបងប្អូនអ្នកភូមិឱ្យមកជួយ ដោយស្រង់ចេញពីក្នុងទឹក យកឡើងមកលើគោក និងបានទូរស័ព្ទប្រាប់ទៅប្ដីរបស់ជនរងគ្រោះ និងរាយការណ៍ជូនសមត្ថកិច្ចប៉ុស្តិ៍តែម្ដង ។
ក្រោយពីទទួលព័ត៌មានភ្លាម កម្លាំងជំនាញបានសហការជាមួយកម្លាំងប៉ុស្តិ៍ អាជ្ញាធរ គ្រូពេទ្យបង្អែក ធ្វើការពិនិត្យសាកសពជនរងគ្រោះឃើញថា សពជនរង តាមការសន្និដ្ឋាន ស្ត្រីរងគ្រោះពិតជាស្លាប់ដោយសារឆក់ខ្សែរភ្លើងពិតប្រាកដមែន ៕
