ជនសង្ស័យមុខសញ្ញាជួញដូរគ្រឿងញៀនម្នាក់ ត្រូវបានកម្លាំងនគរបាលប៉ុស្តិ៍ចំនួន ៣ សហការជាមួយជំនាញ ធ្វើប្រដេញពួនស្ទាក់បង្ក្រាប និងឃាត់ខ្លួន ខណៈរូបគេនាំយកថ្នាំញៀនពីខេត្តកំពង់ស្ពឺ មកលក់ចែកចាយក្នុងភូមិសាស្ត្រស្រុកអង្គស្នួល ខេត្តកណ្តាល ។
អធិការនគរបាលស្រុកអង្គស្នួល លោកវរៈសេនីយ៍ឯក មាន សំណាង បានប្រាប់ឱ្យដឹងថា ប្រតិបត្តិការបង្ក្រាបនេះ ធ្វើឡើងកាលពីវេលាម៉ោងជាង ៣រសៀល ថ្ងៃទី១៩ វិច្ឆកា ២០២៤ នៅលើផ្លូវបេតុង ស្ថិតក្នុងភូមិត្រពាំងត្រាច ឃុំដំណាក់អំពិល ស្រុកអង្គស្នួល ហើយជនសង្ស័យដែលត្រូវបានឃាត់ខ្លួន ឈ្មោះ ឆាំ អុល ភេទប្រុស អាយុ ៣៤ឆ្នាំ មានទីលំនៅភូមិព្រៃសាលា ឃុំរលាំងគ្រើល ស្រុកសំរោងទង ខេត្តកំពង់ស្ពឹ ។
លោកអធិការបានបញ្ជាក់ថា បន្ទាប់ពីទទួលព័ត៌មានច្បាស់ការណ៍ថា មានមុខសញ្ញានាំយកគ្រឿងញៀនពីខេត្តកំពង់ស្ពឺ មកលក់ចែកចាយ នៅក្នុងភូមិសាស្ត្រស្រុកអង្គស្នួល លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានដឹកនាំបញ្ជារឱ្យកម្លាំងផ្នែកប្រឆាំងគ្រឿងញៀន សហការជាមួយកម្លាំងប៉ុស្តិ៍រដ្ឋបាលឃុំដំណាក់អំពិល ប៉ុស្តិ៍សំរោងលើ និងប៉ុស្តិ៍ពើក ចេញធ្វើការឃ្លាំមើលនិងពួនស្ទាក់ ។ រួចក៏បានជួបជនសង្ស័យបើករថយន្តម៉ាក Toyota Prius សេរីឆ្នាំ២០១២ ពណ៌ទឹកប្រាក់ ពាក់ស្លាកលេខភ្នំពេញ2BF.4636 មកដល់ ក៏បានឃាត់ដើម្បីសួរនាំ និងឆែករកឃើញ ម្សៅក្រាម ស ថ្លាសង្ស័យសារធាតុញៀន(ម៉ាទឹកកក) ៥កញ្ចប់ (ធំ០២កញ្ចប់ ,មធ្យម០៣កញ្ចប់) ទម្ងន់ ២២៣,៨ក្រាម អាវុធខ្លី១ដើម ម៉ាកK54 (បង់១ ,គ្រាប់៦គ្រាប់) ជញ្ជីងថ្លឹងថ្នាំញៀន១ ប្រាក់រៀលចំនួន៤លាន ទូរសព្ទ័ម៉ាកOppo មួយគ្រឿង រួមជាមួយឧបករណ៍ប្រើប្រាស់ និងវេចខ្ចប់មួយចំនួន នាំមកកាន់អធិការដ្ឋាននគរបាលស្រុកអង្គស្នួល ធ្វើការសួរនាំ។ បន្ទាប់ពីឃាត់ខ្លួនរូបគេបានឆ្លើយសារភាពថា ថ្នាំញៀនម៉ាទឹកកក ទាំងនេះ រូបគេបានទិញពីឈ្មោះ ធី អាយុ៣៧ឆ្នាំ នៅខេត្តកំពង់ស្ពឺ ដើម្បីយកទៅលក់បន្ត ហើយកំពុងតែធ្វើដំណើរ ក៏ត្រូវនគរបាលស្ទាក់ផ្លូវឃាត់ខ្លួនតែម្តងទៅ ហើយបច្ចុប្បន្ន ជនសង្ស័យរួមទាំងវត្ថុតាង កំពុងឃាតខ្លួនជាបណ្តោះអាសន្ននៅអធិការដ្ឋាននគរបាលស្រុកអង្គស្នួល ដើម្បីផ្តុំសំណុំរឿងបញ្ជូនទៅកាន់សាលាដំបូងខេត្តកណ្តាល ចាត់ការបន្តតាមនីតិវិធី ៕
