កាលពីវេលាម៉ោងប្រមាណ ១០ព្រឹក ថ្ងៃទី០៥ ខែវិច្ឆិកា ឆ្នាំ២០២៤ ម្សិលមិញ មានករណីបាក់ស្រុតផ្លូវបេតុងទាំងផ្ទាំងៗ អស់ប្រវែង ២៥ម៉ែត្រ នៅចំណុចផ្សាកំពង់វត្ត ភូមិកំពោធិ និងភូមិអំពិលទឹក ឃុំកំពង់ភ្នំ ស្រុកលើកដែក ខេត្តកណ្តាល ។
លោក ចាប ចាន់វិទ្យា អភិបាលស្រុកលើកដែកបានមានប្រសាសន៏ថា ក្រោយទទួលបានព័ត៌មានករណីបាក់ស្រុតផ្លូវបេតុងខាងលើ នៅព្រឹកថ្ងៃទី០៦ ខែវិច្ឆិកា ឆ្នាំ២០២៤នេះ លោករួមជាមួយមន្ត្រីជំនាញបច្ចេកទេសស្រុក និងអាជ្ញាធរភូមិ-ឃុំ បានចុះដល់ទីតាំង និងពិនិត្យស្ថានភាពផ្លូវបេតុងដែលបាក់ស្រុត ដែលបណ្តោយ ប្រវែង ២៥ម៉ែត្រ ទទឹង៥ម៉ែត្រ ជំជ្រៅជាមធ្យមពី ០,៣ម៉ែត្រទៅ ១,៤ម៉ែត្រ ។
លោកបានបញ្ជាក់ថា មូលហេតុដែលបាក់ផ្លូវបេតុងខាងលើនេះ គឺបណ្តាលមកពីមាន ការបែកប្រព័ន្ធលូររំដោះទឹកដែលកប់ខាងក្រោមផ្លូវបេតុង ។ បន្ទាប់ពីចុះពិនិត្យ និងក្រោយការសិក្សារួចឃើញថា ដើម្បីធានាបានគុណភាព និងស្តង់ដារបច្ចេកទេស ក្រុមការងារសម្រេចពង្រីកផ្លូវបេតុង អោយបានប្រវែង ទទឹង៩ម៉ែត្រ និងបណ្តោយប្រវែង ៥៩ម៉ែត្រ ដោយរៀបចំគ្រឹះតួរផ្លូវជាដីជំរៅប្រវែង ៤ម៉ែត្រ អមដោយការរៀបប្រព័ន្ធលូររំដោះទឹកសងខាងផ្លូវផងដែរ ដោយប្រើប្រាស់ថវិកាអភិវឌ្ឍន៍របស់ស្រុកឆ្នាំ២០២៥ និងចាប់ដំណើរការនាដើមឆ្នាំក្រោយ ។
លោកអភិបាលបានបញ្ជាក់បន្ថែមថា ការងារចំពោះមុខ គឺយើងបានរៀបចំចាក់ខ្សាច់ និងដីភ្នំ ដើម្បីសម្រួលចរាចរណ៍របស់បងប្អូនជាបណ្តោះអាសន្នសិន ៕
