ប្រសិនបើគ្មានកិច្ចអន្តរាគមន៍ពីរថយន្តពន្លត់អគ្គីភ័យទាន់ពេលវេលានោះទេ មិនដឹងជាមានលំនៅដ្ឋានរបស់ប្រជាពលរដ្ឋប៉ុន្មានខ្នងដែលរងការឆាបឆេះ ដោយការធ្វេសប្រហេស របស់ម្ចាស់យានដ្ឋានជួសជុលរថយន្តអុជធូបសែនខ្មោចប្តី ។
គ្រោះអគ្គីភ័យដែលបណ្តាលមកពីអុជធូនសែនព្រលឹងខ្មោចប្តីទុកចោល ធ្វើឱ្យធ្លាក់កំទេចធូបបង្កើតជាអណ្តាតភ្លើងឆេះសន្ធោសន្ធៅ នាំឱ្យអ្នកជិះខាងភ័យព្រលឹងចុងសក់នេះ បានកើតឡើងកាលពីអំឡុងម៉ោងប្រមាណ ១០ព្រឹក ថ្ងៃទី២៧ តុលា ២០២៤ នៅចំណុចបន្ទប់ស្នាក់របស់ម្ចាស់យានដ្ឋានជួសជុលរថយន្ត និងរោងជាងក្រឡឹងមួយកន្លែង ស្ថិតនៅក្នុងភូមិកណ្តាល ឃុំព្រែកអញ្ចាញ ស្រុកមុខកំពូល ខេត្តកណ្តាល ។
ប្រភពពីសមត្ថកិច្ចនគរបាលស្រុកមុខកំពូល បានឱ្យដឹងថា យានដ្ឋានជួសជុលរថយន្ត និងរោងជាងក្រឡឹង ដែលរងការឆាបឆេះខាងលើ ម្ចាស់ឈ្មោះ ធី នាន់ទី ភេទស្រី អាយុ ៣៤ឆ្នាំ រស់នៅក្នុងទីតាំងកើតហេតុខាងលើ ហើយនៅមុនពេលកើតហេតុ ស្ត្រីជាម្ចាស់ផ្ទះ បានរៀបចំអុជធូបសែនបាយទឹក នំ ចំណី ជូនព្រលឹងខ្មោចប្តី ។ ក្រោយពីរៀបចំសែនរួច ក៏បានដើរចេញ ស្រាប់តែមួយសន្ទុះធំក្រោយមកក៏ បានផ្សែងខ្មួលខ្មាញ់ និងអណ្តាតភ្លើងឆេះសន្ធោសន្ធៅឡើង ទើបស្រែកឆោឡោឱ្យអ្នកជិតខាងជួយ និងទូរសព្ទ័ប្តឹងប៉ូលិស ទើបសមត្ថកិច្ចបានចេញរថយន្តពន្លត់អគ្គីភ័យ ២គ្រឿង ចេញអន្តរាគមន៍ ក្នុងនោះរថយន្តរបស់អធិការដ្ឋាននគរបាលស្រុកមុខកំពូល ១គ្រឿង និង១គ្រឿងទៀត មកពីអធិការដ្ឋាននគរបាលស្រុកខ្សាច់កណ្តាល និងបាញ់ទឹកអស់ចំនួន ២រថយន្ត ហើយប្រើពេលអស់ជាង ៤៥នាទីទើបរលត់ជាស្ថាពរ ។
ហេតុការណ៍អគ្គិភ័យនេះ បានបណ្តាលឲ្យបន្ទប់សង់អំពីថ្ម មានទំហំទទឹង ៤ម៉ែត្រនិ ងបណ្តោយ ៥ម៉ែត្រ រួមជាសម្ភារៈប្រើប្រាស់ក្នុងបន្ទប់រងការឆាបឆេះទាំងស្រុង ប៉ុន្តែមិនមាននរណាម្នាក់រងរបួសនោះទេ ហើយក៏មិនបានរាលដាលទៅដល់លំនៅដ្ឋានរបស់ប្រជាពលរដ្ឋនៅក្បែរខាងនោះដែរ ៕
