ពិតជាកូនអកតញ្ញូមែន ធ្លាប់ជាប់ពន្ធនាគារចំនួន ២ឆ្នាំ ពីបទរក្សាទុកនូវសារធាតុញៀនខុសច្បាប់ តែពេលបានចេញមកវិញមិនត្រឹមតែមិនកែ នៅហ៊ានយកកាំបិតប៉័ងតោ គំរាមសម្លាប់ឪម្តាយខ្លួនឯងទៀត ទីបំផុតត្រូវប៉ូលិសចាប់បញ្ចូលគុកសាជាថ្មី ។ អំពើគំរាមស្លាប់ខាងលើ បានកើតឡើងកាលពីវេលាម៉ោងជាង ៦ព្រឹក ថ្ងៃទី២៤ ខែតុលា ឆ្នាំ២០២៤ នៅចំណុចភូមិស្វាយជួរ ឃុំកោះខែល ស្រុកស្អាង ខេត្តកណ្តាល ។
ប្រភពពីសមត្ថកិច្ចបានឲ្យដឹងថា ជនសង្ស័យដែលគំរាមសម្លាប់ឪពុកម្តាយខាងលើ ឈ្មោះ យន់ គឹមស៊ឹង ភេទប្រុស អាយុ ២៦ឆ្នាំ ជនជាតិខ្មែរគ្មានមុខរបរពឹតប្រាកដ រស់ក្នុងបន្ទុកឪពុកម្តាយ មានប្រវត្តិធ្លាប់ជាប់ពន្ធនាគាររយៈពេល ២ឆ្នាំ ពីបទ រក្សាទុកគ្រឿងញៀណដើម្បីប្រើប្រាស់ ។
ប្រភពដដែលបានឲ្យដឹងទៀតថា កន្លងមកជនសង្ស័យជាមនុស្សប្រើប្រាស់គ្រឿងញៀនជាប្រចាំ និងធ្លាប់ប្រើអំពើហិង្សាមកលើជនរងគ្រោះជាឪពុកម្តាយ ជាញឹកញាប់ តែជនរងគ្រោះមិនបានដាក់ពាក្យបណ្ដឹងនោះទេ ។ លុះនៅវេលាថ្ងៃកើតហេតុ ពេលជនរងគ្រោះកំពង់រៀបចំផ្ទះ ស្រាប់តែជនសង្ស័យស្រែកឡូឡា និងបានយកកាំបិតបុ័ងតោ ស្រែកគំរាមកំហែងរកកាប់សម្លាប់ជនរងគ្រោះ ។ ដោយមានការភ័យខ្លាច ជនរងគ្រោះក៏បានរត់ទៅផ្ទះលោកមេភូមិឲ្យជួយទូរស័ព្ទរាយការណ៍មកសមត្ថកិច្ចនគរបាលប៉ុស្តិ៍កោះខែលជួយអន្តរាគមន៍ឃាត់ខ្លួនជនសង្ស័យរួមទាំងវត្ថុតាងយកមកប៉ុស្តិ៍ដើម្បីធ្វើការសាកសួរ ។
បច្ចុប្បន្នជនសង្ស័យត្រូវបានឃាត់ខ្លួនបញ្ជូនមកអធិការដ្ឋាននគរបាលស្រុកស្អាង ដើម្បីកសាងសំណុំរឿងចាត់ការតាមនីតិវិធី ៕
