បុរសម្នាក់ មិនដឹងយ៉ាងមិច ស្រាប់តែរត់ឆ្លងកាត់មុខរថយន្ត ​បុកស្លាប់ពេលបញ្ជូនដល់មន្ទីរពេទ្យ

គ្រោះថ្នាក់ចរាចរដ៏រន្ធត់ ខណៈរថយន្តធន់ធំកំពុងបើក​បរ ស្រាប់តែមានបុរសម្នាក់ មិនដឹងមានមូលហេតុអ្វី បានរត់ឆ្លងកាត់ផ្លូវពីមុខរថយន្ត បណ្តាលឲ្យបុកពេញទំហឹងរងរបួសធ្ងន់ធ្ងរ ត្រូវបានដឹក​បញ្ជូនទៅសង្គ្រោះ តែអកុសល ជនរងគ្រោះបានស្លាប់​ពេលបញ្ជូនដល់មន្ទីរពេទ្យ ដែលហេតុការគ្រោះថ្នាក់ចរាចរខាងលើនេះ បានកើតឡើងនៅវេលាម៉ោង ១៣.៤០នាទី ថ្ងៃទី២១ ខែតុលា ឆ្នាំ២០២៤ នៅចំណុច កំណាត់ផ្លូវមហាវិថីស៊ីជីងពីង (បឹងត្នោត) ស្ថិតភូមិសិត្បូ សង្កាត់សិត្បូ ក្រុងតាខ្មៅ ខេត្តកណ្តាល ។ 

ជនរងគ្រោះ ​មានឈ្មោះ ឃឿន សុបញ្ញា អាយុ ៣៤ឆ្នាំ មានស្រុកកំណើតនៅឯភូមិព្រែកទន្លាប់ ឃុំព្រែកទន្លាប់ ស្រុកលើកដែក ខេត្តកណ្តាល និងបានមកស្នាក់នៅផ្ទះជួល ក្នុងភូមិលេខ 1(ក) សង្កាត់ស្វាយរលំ ក្រុងតាខ្មៅ ខេត្តកណ្តាល ។

បើតាមបុរសវ័យចំណាស់ម្នាក់ ​សុំមិនបញ្ចេញឈ្មោះ ដែលបានឃើញហេតុការ បានប្រាប់អោយដឹងថា មុនពេលកើតហេតុ គាត់ឃើញបុរសជាជនរងគ្រោះដើរម្នាក់ឯងអែបខាងស្តាំលើចិញ្ចើមផ្លូវពីលិចទៅកើត បានបន្តិចក៏មានរថយន្តមួយគ្រឿងមិនស្គាល់ម៉ាក មិនស្គាល់អត្តសញ្ញាណអ្នកបើកបរ បានបើកពីលិចមកកើតដែរ លុះពេលរថយន្តជិតមកដល់ទន្ទឹមជនរងគ្រោះ ក៏ស្រាប់តែឃើញជនរងគ្រោះរត់ឆ្លងកាត់ពីខាងមុខរថយន្ត  ដែលបណ្តាលអោយរថយន្តបុកពេញទំហឹងហើយរថយន្តព្យាយាមបើករត់គេចបាត់ មុនពេលសមត្ថកិច្ចទៅដល់ ៕