ជនសង្ស័យម្នាក់ ធ្លាប់ជាប់ពន្ធនាគារ ២ឆ្នាំ ករណីប្រើប្រាស់គ្រឿងញៀន ពេលបានចេញមកវិញមិនកែប្រែ នៅតែបន្តប្រើប្រាស់គ្រឿងញៀន មិនតែប៉ុណ្ណោះ នៅហ៊ានគំរាមសម្លាប់ឪពុកខ្លួនឯងទៀត ចុងក្រោយក៏ត្រូវសមត្ថកិច្ចចាប់វាយខ្នោះ ។ ហេតុការណ៍ខាងលើ បានកើតឡើងកាលពីល្ងាច ចុងសប្តាហ៍កន្លងទៅ នៅចំណុចភូមិព្រែកស្លែង ឃុំតាលន់ ស្រុកស្អាង ខេត្តកណ្តាល ។
លោកវរសេនីយ៍ឯក រស់ ចាន់ថា អធិការនគរបាលស្រុកស្អាងបានប្រាប់អោយដឹងថា ជនរងគ្រោះមានឈ្មោះ ហោ អឿន ភេទប្រុស អាយុ ៦៣ឆ្នាំ ជនជាតិខ្មែរ មានទីលំនៅភូមិព្រែកស្លែង ឃុំតាលន់ ស្រុកស្អាង (ត្រូវជាឪពុកបង្កើត) ។
ចំណែកជនសង្ស័យឈ្មោះ អឿន អ៊ីម ហៅ សល់ ភេទប្រុស អាយុ ៣២ឆ្នាំ ជនជាតិខ្មែរ មុខរបរមិនពិតប្រាកដ ទីលំនៅ ក្នុងភូមិឃុំកើតហេតុ (ត្រូវជាកូនបង្កើត) ធ្លាប់ជាប់ពន្ធធនាគារខេត្តកណ្ដាល ២ឆ្នាំ ករណីរក្សាទុក និងប្រើប្រាស់គ្រឿងញៀន ។
លោកអធិការបានឲ្យដឹងបន្ថែមទៀតថា ជនសង្ស័យជាមនុស្សប្រើប្រាស់គ្រឿងញៀន តែងតែរអ៊ូរទាំជេបញ្ចោគំរាមសម្លាប់ឪពុកម្តាយជាញឹកញាប់ ។ នៅថ្ងែកើតហេតុ ជនរងគ្រោះបានដឹកគោមកពីឃ្វាលវិញ ពេលមកដល់ផ្ទះភ្លាម ជនសង្ស័យបានជេបញ្ចោ និងបានវាយជនរងគ្រោះជាឪពុកមួយដៃត្រូវចំកញ្ចឹងក រួចបានយកកាំបិតកាន់ គំរាមកំហែងរកអាកឪពុកសម្លាប់ទៀតផង ។
លុះព្រឹកឡើងថ្ងៃទី១៩ ខែតុលា ឆ្នាំ២០២៤ វេលាម៉ោង ០៨និង០០នាទី ជនរងគ្រោះ ជាឪពុក អត់ទ្រាំនឹងទង្វើរបស់កូនលែងបាន ក៏បានសម្រេចចិត្ត មកដាក់ពាក្យបណ្ដឹងនៅប៉ុស្តិ៍នគរបាលតាលន់ ហើយសមត្ថកិច្ចក៏បានចុះទៅនាំខ្លួនជនសង្ស័យយកធ្វើការសាកសួរ ។ នៅចំពោះមុខសមត្ថកិច្ច ជនសង្ស័យបានឆ្លើយសារភាពថា ខ្លួនពិតជាបានវាយនិងបានយកកាំបិតគំរាមសម្លាប់ជនរងគ្រោះជាឪពុកខ្លួនឯង ពិតប្រាកដមែន ។
បច្ចុប្បន្នជនសង្ស័យត្រូវបានឃាត់ខ្លួនបញ្ជូនមកអធិការដ្ឋាននគរបាលស្រុកស្អាងដើម្បីកសាងសំណុំរឿងចាត់ការតាមនីតិវិធី៕