បុរសម្នាក់បានជិះម៉ូតូត្រឡប់មកផ្ទះ ក្នុងពេលយប់ងងឹត និងមានធ្លាក់ភ្លៀងធ្លាក់ផងនោះ ក៏ជ្រុលទៅបុកបង្គោលថ្មសសររបាំងមាត់សណ្តរស្ទឹងព្រែកហូរ ធ្លាក់ចូលក្នុងទឹក ត្រូវបានអាជ្ញាធរជួយអន្តរាគមន៍រាវរកអស់ ១៩ម៉ោង ទើបរកឃើញសពជនរងគ្រោះជាប់មងអ្នកនេសាទត្រី កាលពីវេលាម៉ោង ១៥.៥០នាទីថ្ងៃទី១៩ ខែតុលាឆ្នាំ២០២៤ នៅចំណុចសណ្តរស្ទឹងភូមិព្រែករាំង(១) សង្កាត់កំពង់សំណាញ់ ក្រុងតាខ្មៅ ខេត្តកណ្តាល ។
លោក យ៉ាវ ឡេង ចៅសង្កាត់កំពង់សំណាញ់បានប្រាប់អោយដឹងថា៖ ជនរងគ្រោះមានឈ្មោះ ហេង គឹមហាក់ ភេទប្រុស អាយុ ៣៩ឆ្នាំ មុខរបរកម្មករសំណង់ មានទីលំនៅភូមិអាចម៍កុក សង្កាត់កំពង់សំណាញ់ ក្រុងតាខ្មៅ ខេត្តកណ្តាល ។
លោកចៅសង្កាត់បន្តទៀតថា តាមការបំភ្លឺរបស់ឈ្មោះ សុខ ពេជ្រចិន្តា ជាប្រពន្ធជនរងគ្រោះ មុនពេលកើតហេតុ ប្តីរបស់គាត់ បានជួបជុំពិសារស្រាបៀរជាមួយកម្មករដូចគ្នា តាំងពីម៉ោង ០១ថ្ងៃទី១៨ ខែតុលា ឆ្នាំ២០២៤ រហូតដល់ម៉ោង ២០.៣០នាទីយប់ ទើបជិះម៉ូតូម៉ាក DREAM C125 ពណ៌ខ្មៅ ពាក់ស្លាកលេខ កណ្តាល 1AD- 7771 ត្រឡប់មកផ្ទះជួលវិញនៅនៅភូមិព្រែករាំង (១) លុះជិះមកដល់ចំណុចកើតហេតុ គឺជាផ្លូវកោងក្បែរសណ្តរស្ទឹងព្រែកហូរ និងងងឹតទៀតផង បានធ្វើឲ្យជនរងគ្រោះដែលមានស្ថានភាពស្រវឹងផង ជិះត្រង់ទៅមុខបុកបង្គោលសសរសណ្តរស្ទឹងបាក់មួយដើម ហើយក៏ធ្លាក់ទាំងជនរងគ្រោះ និងម៉ូតូចូលក្នុងបាតទឹកស្ទឹងតែម្តង ភ្លាមៗអាជ្ញាធរ សមត្ថកិច្ច និងប្រជាពលរដ្ធ នាំគ្នាមកមើល ឃើញម៉ូតូនៅក្នុងទឹកស្ទឹង កម្លាំងក៏បានចុះជួយអន្តរាគមន៏រាវរកយកបានតែម៉ូតូ ឯជនរងគ្រោះត្រូវបាត់ខ្លួន រកមិនឃើញ ។
លោកចៅសង្កាត់ បានឲ្យដឹងបន្ថែមទៀតថា ការរាវរកនៅតែបន្តរហូតព្រឹកថ្ងៃទី១៩ ខែតុលា ឆ្នាំ២០២៤ ក៏មានវត្តមានឯកឧត្តម ហាក់ សុខមករា អភិបាលរងខេត្ត ដឹកនាំមន្ត្រីក្រោមឱវាទបានចុះអន្តរាគមន៍ចាត់ចែងជួលទូកប្រើម៉ាស៊ីនខ្យល់ហ៊ឹបរាវរកជនរងគ្រោះនៅក្នុងទឹកស្ទឹង ដោយដំបូងរកឃើញ វិទ្យុទាក់ទង និងក្រោយបន្តិចរកឃើញទូរស័ព្ទរបស់ជនរងគ្រោះ តែមនុស្សនៅមិនទាន់រកឃើញនៅឡើយ ។ រហូតដល់ម៉ោង ១៥.៥០នាទី ថ្ងៃទី១៩ ខែតុលា ឆ្នាំ២០២៤ អ្នកនេសាទត្រីក្នុងស្ទឹងបានរកឃើញសពជនរងគ្រោះ ដោយដៃជនរងគ្រោះបានជាប់មងរបស់គាត់ មានចម្ងាយពីទីតាំងកើតហេតុ ប្រហែល ៨០០ម៉ែត្រ រួចក៏ទាញសពយកមកក្បែរមាត់ច្រាំងព្រែក និងផ្តល់ដំណឹងដល់ អាជ្ញាធរ និងសមត្ថកិច្ច ចុះពិនិត្យនិងធ្វើកោសលវិច្ច័យ ។
យោងតាមការពិនិត្យរបស់ក្រុមគ្រូពេទ្យ និងជំនាញ ជនរងគ្រោះពិតជាស្លាប់ដោយសាលង់ទឹកស្លាប់ (គ្រោះថ្នាក់ចរាចរណ៏ជិះម៉ូតូធ្លាក់ទឹក) និងក៏បានប្រគល់សពជូនក្រុមគ្រួសារធ្វើបុណ្យតាមប្រពៃណី ។
ពាក់ព័ន្ធនឹងហេតុការណ៍ដ៏អកុសលនេះ ឯកឧត្តម គួច ចំរើន អភិបាលខេត្ត ក៏បានចូលរួមថវិការចំនួន ១លានរៀលដល់ភរិយានៃសព ។ ចំណែកលោក ឃឹម សំភារ អភិបាលក្រុងតាខ្មៅ និងលោក យ៉ាវ ឡេង ចៅសង្កាត់កំពង់សំណាញ់បានផ្តល់ប្រាក់ ១លានរៀល ដល់ក្រុមការងារហ៊ឹបទឹក និងប្រាក់ ៦ម៉ឺនរៀល ជូនម្ចាស់មងអ្នកនេសាទត្រី ៕