នៅវេលាម៉ោងជាង ៨ព្រឹក ថ្ងៃទី១៧ តុលា ២០២៤ នេះ មានអគ្គិភ័យឆាបឆេះពូកនៅក្នុងបន្ទប់ផ្ទះសំណាក់ យីហោ «ជំនោត្រជាក់» ដែលស្ថិតក្នុងភូមិព្រែកឯក ឃុំត្រើយស្លា ស្រុកស្អាង ខេត្តកណ្តាល បង្កការភ្ញាក់ផ្អើលដល់អាជ្ញាធរ សមត្ថកិច្ច ប្រជាពលរដ្ធ និងកម្លាំងប្រជាការពារជួយអន្តរាគមន៏ពន្លត់បានទាន់ពេលវេលា ។
ម្ចាស់ផ្ទះសំណាក់ខាងលើឈ្មោះ ស៊ាប សារួន ភេទប្រុស អាយុ ៤២ឆ្នាំ មានទីលំនៅក្នុងភូមិឃុំកើតហេតុ ហើយមូលហេតុដែលឆេះ គឺបណ្តាលមកពីភ្ញៀវ មុនគាត់ចាកចេញពីក្នុងបន្ទប់ផ្ទះសំណាក់ គាត់បានដាក់កន្ទុយបារីកំពុងឆេះ នៅលើពូកគ្រែ ទើបបណ្តាលឱ្យភ្លើងឆេះពូក បង្កឱ្យមានផ្សែងខ្មៅហុយពេញបន្ទប់ ធ្វើឱ្យមានការភ្ញាក់ផ្អើលតែម្តង ។ បន្ទាប់ពីទទួលបានព័ត៌មានភ្លាម កម្លាំងនគរបាលប៉ុស្តិ៍ត្រើយស្លា សហការជាមួយរដ្ឋបាលឃុំ ប្រជាការពារ និងម្ចាស់ផ្ទះសំណាក់ បានធ្វើការពន្លត់ភ្លាមៗ ទាន់ពេលវេលា ។
ចំណែកសម្ភារៈដែលឆេះខូចខាតរួមមាន៖ ពូកមួយ, គ្រែមួយខូចខាតបន្តិចបន្តួច, មានផ្សែងខ្មៅជាប់ជញ្ជាំង និងកង្ហារមួយគ្រឿង ៕
