ក្រុមក្មេងទំនើង ៤នាក់ ក្រោយសម្រាកការងារ បានទូរស័ព្ទណាត់គ្នាជិះម៉ូតូដើរលេង ដោយជិះក្នុងល្បឿនលឿនរញ៉េរញ៉ៃពេញដងផ្លូវធ្វើឲ្យអ្នកដំណើរដ៏ទៃទៀតភ័យខ្លាច ចុក្រោយក៏ត្រូវសមត្ថកិច្ចប៉ុស្តិ៍ទួលព្រេជ ឃាត់ខ្លួនយកមកអប់រំរយៈពេល ៣៦ម៉ោង រួចអញ្ជើញអាណាព្យាបាលមកទទួលទៅអប់រំបន្តនៅផ្ទះ ។
ហេតុការណ៍នេះ បានកើតឡើងកាលពីវេលាម៉ោងជាង ៣រសៀល ថ្ងៃទី១៨ ខែសីហា ឆ្នាំ២០២៤ នៅចំណុចផ្លូវកៅស៊ូភូមិខ្នារ ឃុំទួលព្រេជ ស្រុកអង្គស្នួល ខេត្តកណ្តាល ។
ក្មេងទំនើងទាំង ៤នាក់ខាងលើ ១-ឈ្មោះ សៀប ចាន់ដារ៉ា ហៅចេក ភេទប្រុស អាយុ ១៧ឆ្នាំ ជនជាតិខ្មែរ មុខរបរកម្មករ ស្នាក់នៅភូមិអង្គស្នួលទី២ ឃុំពើក ស្រុកអង្គស្នួល, ២-ឈ្មោះ រុំ សារ៉ន ហៅម៉ៅ ភេទប្រុស អាយុ ១៧ឆ្នាំ ជនជាតិខ្មែរ មុខរបរកម្មករ រស់នៅភូមិក្របីព្រៃ ឃុំភ្នំតូច ស្រុកសាមគ្គីមុនីជ័យ ខេត្តកំពង់ស្ពឺ, ៣-ឈ្មោះ ថុល មករា ភេទប្រុស អាយុ ១៦ឆ្នាំ ជនជាតិខ្មែរ មុខរបរកម្មករ រស់នៅភូមិបឹង ឃុំសំរោងលើ ស្រុកអង្គស្នួល ខេត្តកណ្ដាល និងទី៤-ឈ្មោះ ស្រឿន រតនា ហៅអ៊ីង ភេទប្រុស អាយុ ១៥ឆ្នាំ ជនជាតិខ្មែរ មុខរបរកម្មករ រស់នៅភូមិត្រពាំងពើក ឃុំពើក ស្រុកអង្គស្នួល ខេត្តកណ្ដាល ។
បច្ចុប្បន្ន ក្មេងទំនើងទាំង ៤នាក់ ក្រោយធ្វើការអប់រំរយៈពេល ៣៦ម៉ោង នៅអធិការដ្ឋាននគរបាលស្រុក សមត្ថកិច្ចបានអញ្ជើញឪពុកម្តាយមកទទួលយកទៅអប់រំនៅផ្ទះបន្ត ៕
