ខេត្តកណ្តាល៖ កាលពីវេលាម៉ោងប្រមាណ ១១យប់ ថ្ងៃទី១៨ ខែសីហា ឆ្នាំ២០២៤ កម្លាំងប៉ុស្តិ៍រដ្ឋបាលកំពង់ភ្នំ បានដើរល្បាតក្នុងភូមិសាស្ត្រឃុំកំពង់ភ្នំ លុះមកដល់ចំណុចផ្លូវរទេះចាស់ក្បែរផ្លូវជាតិ ០១ ស្ថិតក្នុងភូមិអំពិលទឹក ឃុំកំពង់ភ្នំ ស្រុកលើកដែក បានប្រទះឃើញជនសង្ស័យចំនួន ២នាក់ (ឈ្មោះ រិន សូណា ហៅ ឃុន ភេទប្រុស អាយុ ៣៨ ឆ្នាំ និងឈ្មោះ សាន ឈឿន ភេទប្រុស អាយុ ៣៧ឆ្នាំ) កំពុងឈរនៅក្បែរចិញ្ចើមផ្លូវ ដោយមានការសង្ស័យកម្លាំងបានសុំធ្វើការត្រួតពិនិត្យលើខ្លួនជនសង្ស័យ រកឃើញថ្នាំញៀនប្រភេទម៉ាទឹកកក ចំនួន ០១ថង់ ស្មើនឹង ០៦កញ្ចប់តូច លាក់ក្នុងកញ្ចប់បារីដាក់ក្នុងហោប៉ៅខាងឆ្វេងរបស់ឈ្មោះ រិន សូណា រួមទាំងវត្ថុតាងពាក់ព័ន្ធមួយចំនួនទៀត បន្ទាប់មកកម្លាំងក៏នាំខ្លួនជនសង្ស័យទាំង២នាក់ និង វត្ថុតាងបញ្ជូនមកអធិការដ្ឋានបន្តនីតិវិធី ។
ក្រោយការសាកសួរ ឈ្មោះ រិន សូណា បានសារភាពថា ខ្លួនបានទិញថ្នាំញៀនពី ឈ្មោះ ថន សុផល នៅចំណុចម្តុំផ្លូវកែងលេខ១៤ ឃុំព្រែកទន្លាប់ ស្រុកលើកដែក ចំនួន ៥០.០០០៛(ប្រាំមុឺន)រៀល មករក្សាទុកដើម្បីលក់បន្ត ចំណែក ជនសង្ស័យឈ្មោះ សាន ឈឿន បានសារភាពថា នៅម៉ោងប្រហែល៧ព្រឹក ក្នុងថ្ងៃកើតហេតុ ឈ្មោះ រិន សូណា បានខ្ចីទូរស័ព្ទខ្លួនតេទាក់ទងទិញថ្នាំញៀនពីឈ្មោះ ថន សុផល ហើយបានឲ្យទូរស័ព្ទមកខ្លួនវិញ លុះដល់មុនម៉ោងកើត ខ្លួនបានដើរចេញពីផ្ទះទៅអង្គុយលេងនៅមុខច្រកចូលផ្លូវរទេះចាស់ (ផ្លូវចេញចូលផ្ទះ រិន សូណា) បន្ទាប់មក ឈ្មោះ រិន សូណា បានដើរចេញពីផ្ទះតាមផ្លូវរទេះមកជួបគ្នាហើយខ្លួនបានសុំបារីជក់ បន្ទាប់មកកម្លាំងប៉ូលិសបានមកដល់ឃាត់ខ្លួនសួរនាំ និងរកឃើញថ្នាំញៀននៅក្នុងខ្លួនឈ្មោះ រិន សូណា បន្ទាប់មកក៏បញ្ជូនពួកខ្លួនមកអធិការដ្ឋានតែម្តង ។
បច្ចុប្បន្ន ជនសង្ស័យទាំងពីរនាក់ រួមនឹងវត្ថុតាង ត្រូវបានកម្លាំងជំនាញកសាងសំណុំរឿង ចាត់ការតាមនិតិវិធីច្បាប់ ៕