ឯកឧត្តម គង់ សោភ័ណ្ឌ អភិបាលខេត្តកណ្ដាល ព្រមទាំមន្ត្រីរាជការ កងម្លាំង និងប្រជាពលរដ្ឋទូទាំងខេត្ត បានប្រកាសគាំទ្រយ៉ាងពេញទំហឹង ចំពោះគម្រោងព្រែកជីកហ្វូណន-តេជោ ក្រោមគំនិតផ្តួចផ្តើមប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា ប្រធានឧត្តមប្រឹក្សាផ្ទាល់ព្រះមហាក្សត្រ និងជាអតីតនាយករដ្ឋមន្ត្រី ហើយបច្ចុប្បន្ន សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បាននឹងកំពុងបន្តអនុវត្តយ៉ាងស្វាហាប់ និងម៉ឺងម៉ាត់បំផុត ដោយគ្មានការរាថយ ចំពោះគម្រោងព្រែកជីកហ្វូណន-តេជោ សម្រាប់ជាផលប្រយោជន៍ប្រវត្តិសាស្ត្រដល់កូនចៅជំនាន់ក្រោយរបស់យើងទាំងអស់គ្នា ។
ការប្រកាសគាំទ្រយ៉ាងពេញទំហឹងរបស់មន្ត្រីរាជការ កងម្លាំង និងប្រជាពលរដ្ឋ ធ្វើឡើងក្នុងពិធីបុណ្យឆ្លងមហាកុដិ សមិទ្ធផលនានា និងស្រោចស្រពសុគន្ធវារី ព្រះចៅអធិការវវត្តកែវមុនីវ័ន ស្ថិតនៅភូមិព្រែកឬស្ស ឃុំសំបួរមាស ស្រុកមុខកំពូល ខេត្តកណ្តាល ក្រោមអធិបតីភាពឯកឧត្ដម នូ សាខន ប្រធានក្រុមប្រឹក្សាខេត្ត និងឯកឧត្ដម គង់ សោភ័ណ្ឌ អភិបាល នៃគណៈអភិបាលខេត្តកណ្ដាល នារសៀលថ្ងៃទី២៧ ខែមេសា ឆ្នាំ២០២៤ ។
ឯកឧត្ដម គង់ សោភ័ណ្ឌ អភិបាលខេត្តកណ្ដាល បានមានប្រសាសន៍ថា៖ គម្រោងព្រែកជីកហ្វូណន-តេជោ គឺ ជាគម្រោងប្រវត្តិសាស្ត្រលើកទី១ ក្នុងវិស័យដឹកជញ្ជូនផ្លូវទឹករបស់កម្ពុជា ដើម្បីតភ្ជាប់ប្រព័ន្ធទន្លេមេគង្គ និងផ្លូវសមុទ្រ។ គម្រោងនេះ ធ្វើឡើងដើម្បីពង្រីកវិសាលភាពនៃការប្រើប្រាស់សក្តានុពលលើការដឹកជញ្ជូនតាមផ្លូវទឹក សំដៅចូលរួមលើកកម្ពស់សកម្មភាពសេដ្ឋកិច្ច-សង្គម ឱ្យកាន់តែមានការរីកចម្រើនឈានទៅមុខមួយកម្រិតថែមទៀត និងផ្តល់ជាដំណោះស្រាយសមស្របលើបញ្ហាប្រឈម និងឧបសគ្គនានា នៃវិស័យដឹក ជញ្ជូនតាមផ្លូវទឹកដែលយើងបាននិងកំពុងជួបប្រទះនាពេលបច្ចុប្បន្ន។ គម្រោងព្រែកជីកហ្វូណន-តេជោ នឹងធ្វើឱ្យកកម្ពុជាចំណេញពេលវេលា ចំណេញចំងាយ ចំនេញនីតិវិធី និងថវិកា កាត់បន្ថយពេលវេលា ចំងាយ និងថវិកា កាត់បន្ថយនីតិវិធីសម្រាប់នាវា និងទំនិញចេញចូល ធ្វើឱ្យចំណេញ និងបង្កើនល្បឿននៃការអភិវឌ្ឍ សេដ្ឋកិច្ចជាតិ កាត់បន្ថយការខូតខាតផ្លូវថ្នល់ ការកកស្ទះចរាចរណ៍ និងកាត់បន្ថយនូវគ្រោះថ្នាក់ចរាចរណ៍ លើផ្លូវថ្នល់ផង ។
ជាមួយគ្នានេះផងដែរ ឯកឧត្ដម គង់ សោភ័ណ្ឌ អភិបាល នៃគណៈអភិបាលខេត្តកណ្ដាល បានកាត់ខ្សែបូ និងសម្ពោធ ឆ្លងកុដិធម្មត្រ័យ ក្នុងវត្តកែវមុនីវ័ន និងដាក់ឱ្យប្រើប្រាស់ ដែលជាសមិទ្ធផលថ្មីមួយទៀត ជាមួយ និងសមិទ្ធផលនានាជាច្រើនផ្សេងទៀតរបស់ស្រុកមុខកំពូលទាំងពុទ្ធចក្រ និងអាណាចក្រ ក្នុងវិស័យសេដ្ឋកិច្ច សង្គម ប្រកបដោយ សោភ័ណ្ឌភាព ផាសុខភាព សមធម៌ និងបរិយាប័ន្ន ៕