កាលពីរសៀលថ្ងៃទី២៥ ខែមេសា ឆ្នាំ២០២៤ ម្សិលមិញនេះ អាជ្ញាធរ និងមន្ត្រីជំនាញពាក់ព័ន្ធ បានចុះទៅទីតាំងសំណង់អាហារដ្ឋានល្មើសច្បាប់នៅភូមិចុងកោះ សង្កាត់កោះអន្លង់ចិន ក្រុងតាខ្មៅ ដើម្បីត្រួពិនិត្យ និងហាមឃាត់មិនឲ្យបន្តការសាងសង់ ក្រោយពីទទួលបានព័ត៌មានថា ការដ្ឋានសំណង់មួយនេះ នៅតែលួចបន្តសាងសង់ ដោយបំពានទៅនឹងបម្រាមរបស់រដ្ឋបាលក្រុងតាខ្មៅ ដែលបានចុះផ្អាកហាមឃាត់ជាច្រើនលើក ។
ប៉ុន្តែប្រតិបត្តិការចុះត្រួតពិនិត្យ ហាមឃាត់សំណង់ល្មើសច្បាប់ខាងលើនេះ គឺមិនទទួលបានលទ្ធផលអ្វីនោះទេ ព្រោះម្ចាស់សំណង់មិនបានសហការ ហើយចាក់សោរទ្វាររបងពីខាងក្នុង ជាហេតុធ្វើឲ្យមន្ត្រីជំនាញមិនអាចចូលទៅត្រួតពិនិត្យបាន ចុងក្រោយ អាជ្ញាធរ និងមន្ត្រីជំនាញ បានត្រឹមតែធ្វើកំណត់ហេតុ ហើយត្រឡប់ទៅវិញ ។
ពាក់ព័ន្ធនឹងករណីនេះ នៅព្រឹកថ្ងៃទី២៦ ខែមេសា ឆ្នាំ២០២៤ អង្គភាពសារព័ត៌មានយើង បានផ្ញើរសំណេរជាសំណួរ ទៅឯកឧត្តម ឌឹម បូរ៉ា អភិបាលរងខេត្តកណ្តាល និងជាអ្នកនាំពាក្យរដ្ឋបាលខេត្ត ដើម្បីចង់ដឹងថា តើរដ្ឋបាលខេត្ត នឹងមានចំណាត់ការបែបណាបន្ត ទៅលើទីតាំងសំណង់ខុសច្បាប់មួយនេះ ។
ជាការឆ្លើតប ឯកឧត្តម អ្នកនាំពាក្យរដ្ឋបាលខេត្តកណ្តាល បានបញ្ជាក់យ៉ាងដូច្នេះថា៖ «ដូចបានឃើញស្រាប់ហើយ ក្រុមការងាររដ្ឋបាលក្រុង ខេត្ត និងក្រុមការងារមន្ទីរជំនាញបានចុះទៅធ្វើការហាមឃាត់ហើយ ហើយរដ្ឋបាលក្រុង នៅតែបន្តចំណាត់ការទៅតាមមនីតិវិធី ដោយសុំគោលការណ៍ដឹកនាំពី ឯកឧត្តមអភិបាលខេត្ត» ។
គួរបញ្ជាក់ថា សំណង់អាហារដ្ឋានល្មើសច្បាប់រំលោភដីចំណីទន្លេរបស់លោក ងន សុគន្ធ និងលោកស្រី ហាយ ស៊ីលីន ធ្លាប់ត្រូវបានអាជ្ញាធរ និងមន្ត្រីជំនាញ ចុះទៅផ្អាកតាំងតែពីថ្ងៃទី២០ ខែកញ្ញា ឆ្នាំ២០២៣ មកម្លេះ ក្រោយមកម្ចាស់នៅតែបន្តលួចសាង់សង់បំពាននឹងបម្រាម ហើយអាជ្ញាធរ និងមន្ត្រីជំនាញ ក៏បានចុះទៅផ្អាជាបន្តបន្ទាប់ រហូតមកដល់សព្វថ្ងៃនេះ ។
មហាជនកំពុងរង់ចាំមើលថា តើឯកឧត្តមអភិបាលខេត្តកណ្តាល នឹងចាត់វិធានការបែបណាទៅលើសំណង់រឹងល្មើសច្បាប់សាងសង់លើដំចំណីទន្លេមួយនេះ ព្រោះមន្ត្រីជំនាញពាក្យព័ន្ធទាំងអស់ នៅរង់ចាំតែគោលការណ៍ពីឯកឧត្តមអភិបាលខេត្តតែប៉ុណ្ណោះ ៕