ជនសង្ស័យម្នាក់ បានចូលទៅទិញស្រាបៀរចំនួន ២កំប៉ុង ខណៈដែលម្ចាស់រវល់តែទៅយកស្បោងច្រកឱ្យ ស្រាប់តែជនសង្ស័យរូបនេះឆ្លៀតឱកាស ឆក់ទូរសព្ទអាហ្វូនភ្នែកបីរបស់អ្នកលក់រត់បាត់ ក៏ត្រូវម្ចាស់ទូរសព្ទប្តឹងកម្លាំងអាវុធហត្ថឱ្យជួយឃាត់ខ្លួន ។
ហេតុការណ៍ឆក់ទូរសព្ទដៃខាងលើ បានកើតឡើងកាលពីថ្ងៃទី១៣ ខែកុម្ភៈ ឆ្នាំ២០២៤ នៅចំណុចផ្ទះជនរងគ្រោះលក់ទំនិញចាប់ហួយ ស្ថិតក្នុងភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ។
ជនសង្ស័យខាងលើ មានឈ្មោះ រ៉េត បាត់ ភេទប្រុសអាយុ ១៨ឆ្នាំ រស់នៅភូមិចក់ពួក ឃុំស្លរក្រាម ស្រុកស្វាយចេក ខេត្តបន្ទាយមានជ័យ ។ ចំណែកជនរងគ្រោះឈ្មោះ ទួន ឃឹម ភេទប្រុស អាយុ ៣៧ឆ្នាំ រស់នៅភូមិ-ឃុំកើតហេតុ ។
មន្ត្រីអាវុធហត្ថបានឱ្យថា នៅវេលាកើតហេតុ មានជនសង្ស័យម្នាក់ បានចូលទៅទិញស្រាបៀពីរកំប៉ុង នៅចំណុចផ្ទះលក់ចាប់ហួយ ស្ថិតក្នុងភូមិ-ឃុំខាងលើ ខណៈដែលអ្នកលក់រវល់យកស្បោងច្រកស្រាបៀរឱ្យ ស្រាប់តែជនសង្ស័យរូបនេះ បានឆក់ទូរសព្ទ Iphone របស់អ្នកលក់ ហើយរត់គេចខ្លួនបាត់ ។
ក្រោយទទួលបានពាក្យបណ្តឹងពីម្ចាស់ទូរសព្ទ កម្លាំងជំនាញបានធ្វើការស្រាវជ្រាវ និងកំណត់មុខសញ្ញាឃាត់ខ្លួនជនសង្ស័យឈ្មោះ រ៉េត បាត់ និងយកបានទូរសព្ទបានមកវិញនៅថ្ងៃទី១៤ ខែកុម្ភៈ ឆ្នាំ២០២៤ នៅចំណុចភូមិប៉ាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ។ បច្ចុប្បន្ន ជនសង្ស័យត្រូវបានសមត្ថកិច្ចជំនាញកសាងសំណុំរឿងបញ្ជូនទៅសាលាដំបូងខេត្តបន្ទាយមានជ័យ ចាត់ការតាមច្បាប់ ៕