យុវជនម្នាក់ ត្រូវជនសង្ស័យលបកាប់នឹងកាំបិតផ្គាក់ ត្រូវចំសៀតផ្កា បណ្តាលឱ្យស្លាប់យ៉ាងអាណោចអាធ័ម បង្កការភ្ញាក់ផ្អើល កាលពីវេលាម៉ោងប្រមាណ ១១យប់ ថ្ងៃទី១៤ ខែកុម្ភៈ ឆ្នាំ២០២៤ នៅចំណុចភូមិព្រែកក្រូច ឃុំព្រែកនរិន្ទ ស្រុកឯកភ្នំ ខេត្តបាត់ដំបង ។
ជនរងគ្រោះមានឈ្មោះ សោម មេសា ភេទប្រុស អាយុ ១៦ឆ្នាំ រស់នៅក្រុមទី១៦ ភូមិព្រែកក្រូច ឃុំព្រែកនរិន្ទ ស្រុកឯកភ្នំ ខេត្តបាត់ដំបង ។ រីឯជនសង្ស័យឈ្មោះ ឃន ចម្រើន ហៅងិត ភេទប្រុស អាយុ ៣០ឆ្នាំ រស់នៅក្រុមទី ១៧ ភូមិព្រែកតាច្រែង ឃុំព្រែកនរិន្ទ ស្រុកឯកភ្នំ ជាមនុស្សប្រើប្រាស់គ្រឿងញៀន ។
សមត្ថកិច្ចឱ្យដឹងថា នៅវេលាកើតហេតុខាងលើ ខណៈដែលជនរងគ្រោះកំពុងអង្គុយលេងក្រោមផ្ទះមិត្តភក្តិ ស្រាប់តែជនសង្ស័យខាងលើ ដែលទំនងជាបែកថ្នាំ បានលបមកកាប់ត្រូវចំសៀតផ្កា លើត្រចៀកខាងឆ្វេង បណ្តាលឱ្យស្លាប់ភ្លាមៗ ។
ក្រោយកើតហេតុ កម្លាំងអធិការដ្ឋានបានស្រាវជ្រាវស៊ើបអង្កេត លុះដល់ថ្ងៃទី១៥ ខែកុម្ភៈ ឆ្នាំ២០២៤ វេលាម៉ោងជិត ៨ព្រឹក ទើបកម្លាំងផ្នែកព្រហ្មទណ្ឌ សហការជាមួយកម្លាំងអន្តរាគមន៍បានបើកប្រតិបត្តិការចុះបង្រ្កាប និងឃាត់ខ្លួនជនសង្ស័យខាងលើ នៅចំណុចភូមិព្រែកតាច្រែង ឃុំព្រែកនរិន្ទ ស្រុកឯកភ្នំ យកមកសាកសួរនៅអធិការដ្ឋាននគរបាលស្រុកឯកភ្នំ ។
បច្ចុប្បន្នកម្លាំងអធិការដ្ឋានបាននឹងកំពុងរៀបចំកសាងសំណុំរឿង ដើម្បី ចាត់ការតាមនីតិវិធីច្បាប់ ៕
