ជនសង្ស័យ ៤នាក់ ជិះម៉ូតូ ២គ្រឿង បានធ្វើសកម្មភាពឆ្កឹះសោទ្វារផ្ទះរបស់ប្រជាពលរដ្ឋ ចូលទៅលួចទ្រព្យសម្បត្តិ ស្របពេលនោះ កម្លាំងនគរបាលប៉ុស្តិ៍រដ្ឋបាលពើក កំពុងល្បាតប្រទះឃើញ ដេញតាមក្របួចជាប់ ៣នាក់ ។ ហេតុការណ៍នេះ បានកើតឡើងកាលពីវេលាម៉ោងជាង ២រំលងអធ្រាត្រ ថ្ងៃទី១៤ ខែកុម្ភៈ ឆ្នាំ២០២៤ នៅចំណុចភូមិអង្គស្នួលទី៣ ឃុំពើក ស្រុកអង្គស្នួល ខេត្តកណ្ដាល ។
ម្ចាស់ផ្ទះរងគ្រោះ ឈ្មោះ ចាំង សុខវេង ភេទប្រុស អាយុ ៦២ឆ្នាំ រស់នៅភូមិ-ឃុំកើតហេតុ ។ ចំណែកជនសង្ស័យ មានគ្នា ៤នាក់ ក្នុងនោះ សមត្ថកិច្ចឃាត់ខ្លួនបាន ៣នាក់ ទី១-ឈ្មោះ ឃឹម វិចិត្រ ភេទប្រុស អាយុ២៩ឆ្នាំ ជនជាតិខ្មែរ មុខរបរ មិនពិត ស្នាក់នៅភូមិមានជ័យទី១ សង្កាត់មានជ័យ ខណ្ឌមានជ័យ រាជធានីភ្នំពេញ (មានសារធាតុក្នុងទឹកនោម), ទី២-ឈ្មោះ វណ្ណី លាប ភេទប្រុស អាយុ ៣៧ឆ្នាំ ជនជាតិខ្មែរ មុខរបរ មិនពិត ស្នាក់នៅភូមិមានជ័យទី១ សង្កាត់មានជ័យ ខណ្ឌមានជ័យ រាជធានីភ្នំពេញ (មានសារធាតុក្នុងទឹកនោម) និងទី៣-ឈ្មោះ ផាន់ សុភ័ត្ត្រ ភេទប្រុស អាយុ ២៧ឆ្នាំ ជនជាតិខ្មែរ មុខរបរ មិនពិត ស្នាក់នៅភូមិភ្នៀត សង្កាត់មានជ័យ ខណ្ឌមានជ័យ រាជធានីភ្នំពេញ (មានសារធាតុក្នុងទឹកនោម) ។
ចំពោះវត្ថុតាងដកហូតបានពីជនសង្ស័យរួមមាន៖ ម៉ូតូចំនួនពីរគ្រឿង ជារបស់ជនសង្ស័យជិះធ្វើសកម្មភាព, ទូរសព្ទដៃ មួយគ្រឿង ម៉ាក OPPO A83 ពណ៌ទឹកមាស (ជារបស់ជនសង្ស័យ), ដែកសរសៃសម្រាប់ឆ្កឹះសោចំនួន ០១ដើម, សោខ្វែងមុខ៣ ចំនួន០១, កូនដង្កាប់ចំនួន០១, ទូណឺវីសចំនួន ០១ដើម, កូនពិលចំនួន០១, កូនកាបូបដាក់លុយចំនួន០៣ (ជារបស់ជនសង្ស័យ) និងម៉ូទ័រសម្រាប់កោរពុកមាត់ចំនួន០១គ្រឿង, នាឡិកាដៃចំនួន០៦គ្រឿង, ឆ្នាំងសាកកុំព្យូទ័រចំនួន០១ (ជារបស់ជនរងគ្រោះ យកបានមកវិញ) ។
សមត្ថកិច្ចបានឱ្យដឹងថា នៅវេលាម៉ោងកើតហេតុខាងលើ កម្លាំងប៉ុស្តិ៍នគរបាលរដ្ឋបាលពើក បានចេញល្បាតក្នុងមូលដ្ឋាន លុះមកដល់ចំណុចផ្ទះជនរងគ្រោះស្រាប់តែឃើញជនសង្ស័យ ០៤នាក់ ជិះម៉ូតូចំនួន០២គ្រឿង បានធ្វើសកម្មភាពឆ្កឹះសោចាក់ទ្វារផ្ទះរបស់ជនរងគ្រោះចូលទៅលួចទ្រព្យសម្បត្តិ ។ នៅពេលនោះកម្លាំងប៉ុស្តិ៍ពើក ក៏បានទៅសួរនាំស្រាប់តែជនសង្ស័យទាំង ០៤នាក់ បាននាំគ្នារត់គេចខ្លួនដោយបន្សល់នូវម៉ូតូ ០១គ្រឿង នៅកន្លែងកើតហេតុ បន្ទាប់មកជនសង្ស័យទាំង ០៤នាក់បានជិះម៉ូតូ ០១គ្រឿងទៀត (គ្នា០៤នាក់) ជិះរត់ទៅទិសខាងត្បូង ភ្លាមនោះកម្លាំងប៉ុស្តិ៍ពើក សហការជាមួយកម្លាំងផ្នែកជំនាញនគរបាលស្រុក កម្លាំងប៉ុស្តិ៍ព្រៃពួច និងកម្លាំងប៉ុស្តិ៍ក្រាំងម្កាក់ បានដេញឃាត់ខ្លួនជនសង្ស័យបានចំនួន០៣នាក់ និងម៉ូតូ ០១គ្រឿងទៀត បន្ទាប់មកបាននាំខ្លួនជនសង្ស័យទៅអធិការដ្ឋាននគរបានស្រុកដើម្បីសួរនាំតាមនីតិវិធីច្បាប់ ។
នៅចំពោះមុខសមត្ថកិច្ច ជនសង្ស័យ និងបក្ខពួកបានឆ្លើយសារភាពថា ខ្លួនពិតជាបានធ្វើសកម្មភាពឆ្កឹះសោទ្វារផ្ទះចូលលួចទ្រព្យសម្បត្តិរបស់ជនរងគ្រោះពិតប្រាកដមែន ៕
