បុរសម្នាក់ បានដើរគាស់មើមរមៀតនៅក្នុងចម្ការរបស់ខ្លួន ស្រាប់តែជាន់គ្រាប់មីន បណ្ដាលឱ្យផ្ទុះរបួសដាច់ជើងទាំងពីរ និងរបួសដៃខ្លះផង ហើយត្រូវកម្លាំងនគរបាលវរសេនាតូចការពារព្រំដែនគោកលេខ៣១០ ដែលប្រចាំការតាមប៉ុស្ដិ៍ជាប់ព្រំដែនខ្មែរ-ថៃ ជួយអន្តរាគមន៍សែងចេញពីចំណុចកើតហេតុ រួចដឹកទៅកាន់មន្ទីរពេទ្យដើម្បីសង្គ្រោះបន្ទាន់ ។
ហេតុការណ៍នេះ បានកើតឡើងកាលពីវេលាម៉ោងជាង ៩ព្រឹក ថ្ងៃទី០៤ ខែកុម្ភៈ ឆ្នាំ២០២៤ នៅចំណុចដីចម្ការរមៀតរបស់ជនរងគ្រោះ ចម្ងាយពីបន្ទាត់ព្រំដែនខ្មែរ-ថៃ ប្រហែល ៣០០ម៉ែត្រ ត្រង់ចន្លោះប៉ុស្ដិ៍នគរបាលការពារព្រំដែនគោក «ចរិយា និងទីងមោង» ស្ថិតក្នុងភូមិភ្នំរៃ ឃុំតតោក ស្រុកសំឡូត ខេត្តបាត់ដំបង ។ ជនរងគ្រោះឈ្មោះ ស៊ីម សុភាព ភេទប្រុស អាយុ ៥៥ឆ្នាំ រស់នៅក្នុងភូមិ ឃុំកើតហេតុខាងលើ ។
បើតាមលោក អ៊ុក សារិន មេបញ្ជាការវរសេនាតូចនគរបាលការពារព្រំដែនគោកលេខ៣១០ បានឲ្យដឹងថា ជនរងគ្រោះខាងលើ បានដើរជាន់មីនប្រភេទសញ្ញាលេខបូក ដែលកប់ក្នុងដីសេសសល់ពីសម័យសង្គ្រាម មានចម្ងាយពីព្រំដែនខ្មែរ-ថៃប្រហែល ៣០០ម៉ែត្រ ។
លោកបានបន្តទៀតថា ដីចម្ការនៅតំបន់នោះ មានប្រជាពលរដ្ឋកាប់ឆ្ការដាំដំណាំរាល់ឆ្នាំ តែមិនធ្លាប់បានដោះមីនទេ ហើយក៏មិនធ្លាប់ប្រើប្រាស់ត្រាក់ទ័រភ្ជួរដីម្ដងណាដែរ ដោយប្រជាពលរដ្ឋប្រើប្រាស់ត្រឹមចបកាប់ ដើម្បីកាប់ដីដាំដំណាំ ដែលភាគច្រើនពលរដ្ឋដាំរមៀត ហើយនៅព្រឹកកើតហេតុ ជនរងគ្រោះបានដើរគាស់មើមរមៀត តែអកុសល្យក៏ជាន់ចំគ្រាប់មីន បណ្ដាលឱ្យផ្ទុះរបួសដាច់ជើងទាំងសងខាងតែម្ដង ។
ក្រោយទទួលបានព័ត៌មាននេះ កម្លាំងរបស់លោកដែលប្រចាំការតាមប៉ុស្ដិ៍នៅក្បែរនោះ បាននាំគ្នាទៅជួយអន្តរាគមន៍ ដើម្បីសែងជនរងគ្រោះចេញពីចំណុចគ្រោះថ្នាក់ រួចដឹកតាមរថយន្តបញ្ជូនគាត់ទៅមន្ទីរពេទ្យបង្អែកស្រុកសំឡូត ដើម្បីសង្គ្រោះបន្ទាន់ ៕
