ប្រភពព័ត៌មានពីប្រជាពលរដ្ឋបានប្រាប់អង្គភាពសារព័ត៌មាន The Real ឲ្យដឹងថា ទីតាំងដីមួយកន្លែង ស្ថិតនៅសង្កាត់ព្រែកថ្មី ខណ្ឌច្បារអំពៅ បាននឹងកំពុងធ្វើសកម្មភាព ចាក់ដីរំលោភចូលផ្ទៃទន្លេរ និងបុកគ្រឹះសាងសង់សំណង់រឹង បានយ៉ាងរលូន មិនដឹងជាមានច្បាប់ទម្លាប់ ឬយ៉ាងណានោះទេ ប៉ុន្តែបើស្នើសុំច្បាប់តើមានអ្នកណាហ៊ានអនុញ្ញាត? ព្រោះរំលោភចូលដីចំណីទន្លេបែបនេះ ។
ប្រភពបានបន្តទៀតថា ម្ចាស់ទីតាំងដែលចាក់ដីរំលោភយកផ្ទៃទន្លេរ និងសង់សំណង់រឹងនោះ ច្បាស់ជាបុគ្គលមានលុយ មានអំណាចហើយ ទើបអាចធ្វើសកម្មភាពបានដោយរលូនមិនមានមន្ត្រីជំនាញណា ធ្វើការហាមឃាត់ទប់ស្កាត់បែបនេះ ព្រោះបើប្រជាពលរដ្ឋធម្មតាវិញ ហ៊ានតែចាក់ដីចូលទន្លេមួយបង្គីរសាកមើល ច្បាស់ជាអាជ្ញាធរ និងមន្រ្តីជំនាញចុះមកហាមឃាត់ភ្លាមជាក់ជាមិនខាន ។
ជុំវិញករណីនេះ លោក ចេង មុនីរ៉ា អភិបាលខណ្ឌច្បារអំពៅ បានឆ្លើយប្រាប់សារព័ត៌មានក្នុងស្រុកថា លោកមិនបានដឹងនោះទេ ។ នៅព្រឹកថ្ងៃទី ១៧ ខែមករា ឆ្នាំ២០២៤ នេះ អង្គភាពសារព័ត៌មានយើង ក៏បានព្យាយាមសុំការបំភ្លឺបន្ថែមតាមប្រព័ន្ធ Telegram ពីលោក ចេង មុនីរ៉ា អភិបាលខណ្ឌច្បារអំពៅ ប៉ុន្តែលោកចូលមើលហើយ មិនឆ្លើយតបអ្វីទាំងអស់ ។
យោងតាមអនុក្រឹត្យ ស្តីពីគ្រប់គ្រងអាងទន្លេររបស់រាជរដ្ឋាភិបាលកម្ពុជា ចុះថ្ងៃទី២៤ ខែកក្កដា ឆ្នាំ២០១៥ ត្រង់មាត្រា៨ បានកំណត់យ៉ាងច្បាស់ថា ការសាង់សង់ត្រូវមានរយៈចម្ងាយ ៥០ម៉ែត្រ គិតចាប់ពីមាត់ច្រាងទន្លរ ប៉ុន្តែបើមើលទៅទីតាំងដែលកំពុងចាក់ដី និងសង់សំណង់រឹងខាងលើនោះ គឺបាននឹងកំពុងរំលោភនឹងអនុក្រឹត្យរបស់រាជរដ្ឋាភិបាលកម្ពុជាយ៉ាងច្បាស់ក្រឡែតតែម្តង ។
ប្រជាពលរដ្ឋដែលរស់នៅមូលដ្ឋានសង្កាត់ព្រែកថ្មី ខណ្ឌច្បារអំពៅ បានសំណូមពរយ៉ាងទទូច ដល់លោក ឃួង ស្រេង អភិបាលរាជធានីភ្នំពេញ មេត្តាចាត់មន្ត្រីជំនាញចុះមកពិនិត្យទីតាំងនោះផង ដើម្បីកុំឲ្យផ្ទៃទន្លេរ ដែលជាសម្បត្តិសាធារណៈរបស់រដ្ឋ ត្រូវបានបុគ្គលមានលុយ មានអំណាច រំលោភយកធ្វើជាកម្មសិទ្ធិផ្ទាល់ខ្លួន ៕