ដេប៉ូខ្សាច់របស់លោកឧកញ៉ា លឹម សុផា នៅភូមិកោះគរ សង្កាត់រការខ្ពស់ ក្រុងតាខ្មៅ ខេត្តកណ្តាល ដែលធ្លាប់ត្រូវបានអាជ្ញាធរក្រុងតាខ្មៅ ចុះទៅបិទផ្អាក ២លើក ដោយសារធ្វើអាជីវកម្មគ្មានច្បាប់អនុញ្ញាតិនោះ ពេលនេះបានបើកដំណើរការដឹកខ្សាច់ចេញយ៉ាងគគ្រឹកគគ្រេង និងបង្កផលប៉ះពាល់ដល់ប្រជាពលរដ្ឋ ក៏ដូចជាអ្នកដំណើរដូចដើមឡើងវិញហើយ ។
ប្រជាពលរដ្ឋក្នុងសង្កាត់រកាខ្ពស់បានលើកឡើងថា ទីតាំងដេប៉ូខ្សាច់របស់លោកឧកញ៉ា លឹម សុផា ខាងលើនេះ បានបើកដំណើរការយូរខែមកហើយ ក្រោយមកក៏ឃើញអាជ្ញាធរចុះបិទផ្អាកសកម្មភាពចំនួន២លើកផងដែរ ប៉ុន្តែបានមួយរយៈខ្លីស្រាប់តែ ឃើញបើកធ្វើអាជីវកម្មឡើងវិញយ៉ាងគគ្រឹកគគ្រេង ដោយមានរថយន្តជាច្រើនគ្រឿង ចេញចូលដឹកជញ្ជូនខ្សាច់ទាំងយប់ទាំងថ្ងៃ ចុចស៊ីប្លេរ បង្កការំខាន រកដេកពូនមិនបាននោះទេ ។ ជាងនេះទៅទៀត រថយន្តដឹកខ្សាច់ពោញៗហៀរទ្រុង មិនគ្របឱ្យបានត្រឹមត្រូវ ជ្រុះហូរខ្សាច់ពេញផ្លូវ ហុយ និងរអិលពិបាកធ្វើដំណើរខ្លាំងណាស់ ពិសេស ធ្វើឱ្យស្រុតខូចផ្លូវជាអន្លើរៗហើយ ហាក់គ្មានកោតញញើតច្បាប់ និងគ្មានមន្ត្រីជំនាញ ឬអាជ្ញាធរ ណាចេញមកត្រួតពិនិត្យ និងប្រើវិធានការច្បាប់បង្ក្រាបដេប៉ូល្មើសច្បាប់មួយនេះទាល់តែសោះ ឬមួយស្លុតជាមួយអំណាចទឹកលុយរបស់ម្ចាស់ទីតាំង ឬក៏មានអ្វីលាក់បាំងនៅពីក្រោយទេដឹង?
ប្រជាពលរដ្ឋបានបន្តទៀតថា ដេប៉ូខ្សាច់ខាងលើ មិនត្រឹមតែបង្កផលប៉ះពាល់ដល់ការរស់នៅរបស់ប្រជាពលរដ្ឋនោះទេ ម្ចាស់ដេប៉ូនៅបានលុបព្រែកប្រវត្តិសាស្ត្រ (ព្រែកឆ្តោរ) ប្រវែងជិត ៣០០ម៉ែត្រ យកធ្វើជាកម្មសិទ្ធិទៀតផង ។
ពាក់ព័ន្ធនឹងករណីនេះ អង្គភាពសារព័ត៌មានយើង មិនអាចសុំការបំភ្លឺពីសំណាក់ម្ចាស់ដេប៉ូខ្សាច់ខាងលើបានទេ ហើយអង្គភាពយើងក៏បានទូរស័ព្ទទំនាងទំនងសុំការបំភ្លឺពីលោក ឃឹម សំភារ អភិបាលក្រុងតាខ្មៅ ដើម្បីឲ្យលោកបញ្ជាក់ថា តើដេប៉ូខ្សាច់ខាងលើ មានច្បាប់ ឬ គ្មានច្បាប់ ? ប៉ុន្តែលោកអភិបាលក្រុងតាខ្មៅ ឆ្លើយថា ជាប់រវល់ប្រជុំ ។ អង្គភាពសារព័ត៌មានយើង បានព្យាយាមផ្ញើសំណេរជាសំណួរតាមប្រព័ន្ធតេឡេក្រាមទៅលោកបន្ថែមទៀត ប៉ុន្តែមិនឃើញលោកចូលមើលឆ្លើយតបនោះឡើយ ៕
