ល្បែងកន្ទុយលេខ ដែលគេស្គាល់ថាជាឆ្នោតយួន កំពុងបើកលេងយ៉ាងអនាធិបតេយ្យនៅភូមិយកបាត្រ១ សង្កាត់ក្បាលកោះ ខណ្ឌច្បារអំពៅ ដោយមិនរំខានដល់សមត្ថកិច្ច ឬអាជ្ញាធរភូមិ-សង្កាត់ បន្តិចសោះ ឯណាទៅគោលនយោបាយភូមិ-ឃុំ-សង្កាត់ មានសុវត្ថិភាពទាំង ៧ចំណុច របស់រាជរដ្ឋាភិបាល ឯណាទៅអនុសាស្ត្ររបស់សម្តេចអគ្គមហាសេនាបតីតេជោ ហ៊ុន សែន ដែលធ្លាប់បានបាក់ដាក់បញ្ជាក់ដាច់ណាត់ឲ្យអាជ្ញាធរ និងសមត្ថកិច្ចពាក់ព័ន្ធបង្ក្រាបល្បែងស៊ីសងខុសច្បាប់គ្រប់ប្រភេទនោះ ?
កាលណាមានល្បែងស៊ីសងនៅក្នុងមូលដ្ឋានភូមិ-ឃុំ-សង្កាត់ ច្បាស់ណាស់ វានឹងអាចកើមានអំពើចោរកម្ម លួចឆក់ប្លន់ និងហិង្សានៅក្នុងគ្រួសារ ជាដើម ។
ជាក់ស្តែងល្បែងកន្ទុយលេខ ឆ្នោតយួន ដែលកំពុងបើកលេងយ៉ាងអនាធិបតេយ្យនៅភូមិយកបាត្រ សង្កាត់ក្បាលកោះ ខណ្ឌច្បារអំពៅនេះ គឺកំពុងអូសទាញឲ្យប្រជាពលរដ្ឋមួយចំនួនឈ្លក់វង្វេងរហូតអស់លុយពីខ្លួន កើតអារម្មណ៍មួម៉ៅជះកំហឹងដាក់ក្រុមគ្រួសារសាច់ញាតិ ខ្លះឈានដល់ប្រើអំពើហិង្សាក៏មាន ។
ប្រជាពលរដ្ឋ សំណូមពរយ៉ាងទទូច ដល់ គណៈកម្មការគ្រប់គ្រងល្បែងពាណិជ្ជកម្មកម្ពុជា មេត្តាចាត់វិធានការទៅលើល្បែងកន្ទុយលេងខុសច្បាប់ នៅក្នុងមូលដ្ឋានសង្កាត់ក្បាលកោះនេះផង បើពុំនោះទេ វានឹងបង្កអសន្តិសុខ កើតមានអំពើលួច ឆក់ ប្លន់ និងអំពើហិង្សាជាក់ជាមិនខាន ជាក់ជាមិនខាន ៕