ប្រជាពលរដ្ឋនៅភូមិព្រែកត្រែង សង្កាត់សិត្បូរ ក្រុងតាខ្មៅ ខេត្តកណ្តាល នៅតែស្នើសុំយ៉ាងទទូចដល់អាជ្ញាធរក្រុងតាខ្មៅ ជួយណែនាំដល់ម្ចាស់ដេប៉ូខ្សាច់ «ជា ហ៊ីម» និងដេប៉ូខ្សាច់ «មេគង្គ» ធ្វើយ៉ាងណាកុំឲ្យមានទឹកហូរចូលលំនៅដ្ឋាន ដីចម្ការ របស់ពួកគាត់ បើទោះបីជាម្ចាស់ដេប៉ូខ្សាច់ទាំងពីរបានសងសំណងផលប៉ះពាល់មួយចំនួនដល់ពួកគាត់ក្តី ។
បើតាមសម្តីអ្នកមីង ដែលមានផ្ទះជាប់នឹងដេប៉ូខ្សាច់ «មេគង្គ» បានប្រាប់អង្គភាពសារព័ត៌មាន The Real យើងថា អាជ្ញាធរ បានអញ្ជើញពួកគាត់ទៅសាលាសង្កាត់ ដើម្បីសម្របសម្រួលដោះស្រាយផលប៉ះពាល់ ប៉ុន្តែខាងម្ចាស់ដេប៉ូខ្សាច់ទាំងពីរមិនបានមកនោះទេ ។ តាមរយៈលោកចៅសង្កាត់ ខាងម្ចាស់ដេប៉ូខ្សាច់ទាំងពីរបានយល់ព្រមសងសំណងផលប៉ះពាល់ តាមការស្នើសុំរបស់ពួកគាត់ ដោយអ្នកខ្លះសុំ ៥០ម៉ឺនរៀល ខ្លះទៀត ៣០ម៉ឺនរៀល ទៅតាមទំហំនៃការខូចខាត ។
អ្នកមីងបន្តថា គាត់ទទួលសំណងផលប៉ះពាល់នេះ គឺសម្រាប់ការខូចខាតដំណាំរបស់ពួកគាត់មួយពេលចុងក្រោយនេះតែប៉ុណ្ណោះ ហើយគាត់នៅតែស្នើសុំឲ្យម្ចាស់ដេប៉ូខ្សាច់ធ្វើយ៉ាងមិច កុំឲ្យមានខ្សាច់ ឬទឹកហូរចូលមកដីចម្ការរបស់គាត់បន្តទៀត ជាហេតុធ្វើឲ្យគាត់មិនអាចប្រកបមុខរបរដាំដុះចិញ្ចឹមជីវភាព ។
ពាក់ព័ន្ធនឹងករណីនេះ លោក សែត វន្នី ចៅសង្កាត់សិត្បូរ បានប្រាប់អង្គភាព The Real ឲ្យដឹងតាមទូរស័ព្ទផងដែរថា លោកបានអញ្ជើញប្រជាពលរដ្ឋ ៦គ្រួសារ ដែលរងផលប៉ះពាល់ដោយសារដេប៉ូខ្សាច់ មកសម្របសម្រួលដោះស្រាយរួចរាល់ហើយ កាលពីថ្ងៃសុក្រ ទី០២ ខែធ្នូ ឆ្នាំ២០២៣ ហើយលោកក៏បានណែនាំដល់ម្ចាស់ដេប៉ូខ្សាច់ទាំងពីរ ធ្វើមិចកុំឲ្យហ៊ុយ ពិសេស កុំឲ្យមានខ្សាច់ ឬទឹកហូរចូលដីចម្ការរបស់ប្រជាពលរដ្ឋបន្តទៀត ៕