ដេប៉ូខ្សាច់ «ជា ហ៊ីម» និងដេប៉ូខ្សាច់ «មេគង្គ» នៅភូមិព្រែកត្រែង សង្កាត់សិត្បូ ក្រុងតាខ្មៅ ខេត្តកណ្តាល បានបង្កផលប៉ះពាល់យ៉ាងខ្លាំងដល់សុខភាព ជីវភាពរបស់ប្រជាពលរដ្ឋដែលរស់នៅជុំវិញនោះ ជាពិសេស ធ្វើឱ្យជន់លិចដំណាំរបស់ពួកគាត់ រយៈពេលជាងមួយឆ្នាំមកហើយ រហូតមកដល់ពេលនេះ ម្ចាស់ដេប៉ូខ្សាច់ទាំងពីរខាងលើ គ្មានទំនួលខុសត្រូវសងសំណងផលប៉ះពាល់ ដូចការសន្យានោះទេ ។ នេះបើតាមការលើកឡើងរបស់ប្រជាពលរដ្ឋ ។
ពាក់ព័ន្ធនឹងករណីនេះ អង្គភាពសារព័ត៌មាន The Real News មិនទាចទំនាក់ទំនងសុំការបកស្រាយពីម្ចាស់ដេប៉ូខ្សាច់ទាំងពីរខាងលើនេះបានទេ ។ រីឯលោក សែត វន្នី ចៅសង្កាត់សិត្បូ ភ្នាក់ងារយើងបានព្យាយាមទំនាក់ទំនងតាមទូរស័ព្ទចូល តែមិនមានអ្នកលើកទទួល ។
ចំណែកលោក ឃឹម សំភារ អភិបាលក្រុងតាខ្មៅ ភ្នាក់ងារយើងបានទំនាក់ទំនងនៅរសៀលថ្ងៃទី១៨ ខែវិច្ឆិកា ឆ្នាំ២០២៣ ម្សិលមិញ ប៉ុន្តែលោកឆ្លើយថា ជាប់រវល់មកបុណ្យកឋិន ។ អង្គភាពយើង នឹងរង់ចាំទទួលការបកស្រាយ រៀងរាល់ម៉ោងធ្វើការ ៕
