ប្រភពព័ត៌មានពីប្រជាពលរដ្ឋបានប្រាប់ The Real News ឲ្យដឹងថា ឃ្លាំងស្តុបលក់គ្រឿងអេឡិចត្រូនិចដ៏ធំ មួយកន្លែង គ្មានស្លាកយីហោ ស្ថិតនៅលើកំណាត់ផ្លូវបេតុង២០០៤ ក្នុងភូមិអូរគីដេ សង្កាត់អូរបែកក្អម ខណ្ឌសែនសុខ សង្ស័យគ្មានច្បាប់អនុញ្ញាតិ កំពុងធ្វើសកម្មភាពចែកចាយគ្រឿងអេឡិចត្រូនិច និងកំព្យួទ័រ យ៉ាងសកម្មនៅតាមទីផ្សារក្នុងព្រះរាជាណាចក្រកម្ពុជា ។
ប្រភពបានបន្តទៀតថា ឃ្លាំងខាងលើ គឺមានថៅកែជាជនជាតិចិនចំនួន ២នាក់ ជាអ្នកគ្រប់គ្រង ហើយបានធ្វើសកម្មភាពប្រមាណជាងកន្លះឆ្នាំមកហើយ ដោយពួកគេបានធ្វើការផ្គត់ផ្គង់ សម្ភារៈគ្រឿងអេឡិចត្រូនិចគ្រប់ប្រភេទ ពិសេស កុំព្យួទ័រ ឱ្យទៅក្រុមហ៊ុន និងកាស៊ីណូ ដែលគ្រប់គ្រងដោយជនជាតិចិនតែប៉ុណ្ណោះ ពោលគឺធ្វើសកម្មភាពចែកចាយជាលក្ខណៈបោះដុំ ទូទាំងប្រទេស តាមរយៈការដឹកជញ្ជូន តាមរថយន្ដទៅដល់ទីកន្លែងតែម្ដង ។
ប្រភពបានឲ្យដឹងបន្ថែមថា ការធ្វើសកម្មភាពចែកចាយ និងផ្គត់ផ្គង់ គ្រឿងអេឡិចត្រូនិចរបស់ជនជាតិចិនខាងលើ គេសង្ស័យថាប្រហែលគ្មានអាជ្ញាប័ណ្ណ ឬ ការចុះបញ្ជីការណាមួយ ពីក្រសួងពាក់ព័ន្ធទេមើលទៅ ទើបឃ្លាំងមួយកន្លែងនេះបន្តដំណើរការ ចុះបើគ្មានអាជ្ញាប័ណ្ណ ហេតុអ្វី បានជាជនជាតិចិន ជាថៅកែឃ្លាំងខាងលើ ហ៊ានធ្វើសកម្មភាពចែកចាយទំនិញគ្រឿងអេឡិចត្រូនិចដោយរលូនបែបនេះទៅវិញ ។
តាមប្រភពដដែល បានរៀបរាប់ថា ទីតាំងខាងលើនេះធ្វើសកម្មភាពផ្គត់ផ្គង់គ្រឿងអេឡិចត្រូនិចគ្រប់ប្រភេទ ដឹកចេញ ដឹកចូល ទាំងយប់ ទាំងថ្ងៃ និងមិនដែលប្រទះឃើញថា មានមន្ដ្រីជំនាញណាមួយ ចុះមកពិនិត្យម្ដងណានោះទេ និយាយជារួម ជនជាតិចិនពីរនាក់ ដែលជាថៅកែគ្រប់គ្រងនៅទីនោះ ហាក់ដូចជាមានឥទ្ធិពលខ្លាំង ប្រហែលជាមានខ្នងបង្អែកធំនៅពីក្រោយខ្នងហើយមើលទៅ ទើបអាចធ្វើសកម្មភាពបានដោយរលូនបែបនេះ ។
ពលរដ្ឋស្នើឱ្យមន្ត្រីមានសមត្ថកិច្ច មេត្តាជួយចុះពិនិត្យទីតាំងឃ្លាំងខាងលើផង បើពុំនោះទេ អាចនឹងធ្វើឱ្យខាតបង់ចំណូលពន្ធចូលរដ្ឋ ជាក់ជាមិនខាន ៕