ក្រោយពីអង្គភាពសារព័ត៌មាន The Real News បានចុះផ្សាយនូវការលើកឡើងរបស់ប្រជាពលរដ្ឋថា ដីព្រែកមួយកន្លែង នៅភូមិទួលសាងាំ ឃុំអង្កោល ស្រុកដំណាក់ចង្អើរ ខេត្តកែប កំពុងរងការទន្ទ្រាន និងបំផ្លាញយ៉ាងអនាធិបតេយ្យពីសំណាក់ឈ្មួញមានលុយ មានអំណាច មួយកក្ដាប់តូចយកធ្វើជាកម្មសិទ្ធិនោះ នៅយប់ថ្ងៃទី១៧ ខែវិច្ឆិកា ឆ្នាំ២០២៣ នេះ លោក និម្មាបនិក សុទ្ធ ពុទ្ធិម៉ានីន ប្រធានមន្ទីររៀបចំដែនដី នគរូបនីយកម្ម សំណង់ និងសូរិយោដីខេត្តកែប បានចេញមកធ្វើការបកស្រាយបំភ្លឺ និងច្រានចោលការលើកឡើងរបស់ប្រជាពលរដ្ឋ ។ លោកបានបញ្ជាក់ថា ទីតាំងដីខាងលើ ជាកម្មសិទ្ធិរបស់ឯកជន និងមានវិញ្ញាបណ្ណប័ត្រសម្គាល់ម្ចាស់អចលនវត្ថុត្រឹមត្រូវ ។
ទាក់ទិននឹងករណីនេះ បើយោងតាមអនុក្រឹត្យ លេខ ២៥៥ អនក្រ.បក ចុះថ្ងៃទី០៨ ខែធ្នូ ឆ្នាំ២០២២ របស់រាជរដ្ឋាភិបាល ពិតជាបានសម្រេចកាត់ឆ្វៀលដីទំហំ ៧៦៥.០០០ម៉ែត្រករ៉េ មានទីតាំងស្ថិតនៅក្នុងភូមិទួលសាងាំ ឃុំអង្កោល ស្រុកដំណាក់ចង្អើរ ខេត្តកែប ចេញពីផែនទីគម្របព្រៃឈើឆ្នាំ២០២២ និងដែនព្រៃលិចទឹក ធ្វើអនុបយោគជាដីឯកជនរបស់រដ្ឋ ហើយផ្តល់សិទ្ធិជាកម្មសិទ្ធិ ជូនឈ្មោះ អ៊ុក ត្រេវ តំណាងប្រជាពលរដ្ឋចំនួន ៣២គ្រួសារ ពិតប្រាកដមែន ។
