ក្មេងទំនើងមួយក្រុមប្រដាប់ដោយដាវ កាំបិត ត្រូវបានកម្លាំងនគរបាលខេត្តបាត់ដំបងបង្ក្រាបឃាត់ខ្លួន កាលពីវេលាម៉ោងជាង ១១យប់ ថ្ងៃទី១៥ ខែវិច្ឆិកា ឆ្នាំ២០២៣ នៅចំណុចក្បែរវត្តបវេល ភូមិបវេល២ ឃុំបួវិល ស្រុកបវេល ខេត្តបាត់ដំបង ខណៈដែលពួកគេកំពុងស្វែងរកគូរប្រយុទ្ធ មួយក្រុមទៀតនៅក្នុងមូលដ្ឋាន ។
បើតាមសមត្ថកិច្ចនគរបាលខេត្តបាត់ដំបង បានឲ្យដឹងថា នៅវេលាម៉ោងកើតហេតុ កម្លាំងនគរបាលបានចុះល្បាតតាមមូលដ្ឋាន ក៏ប្រទះឃើញក្មេងទំនើងមួយក្រុម មានគ្នាប្រមាណ ១០នាក់ ជិះម៉ូតូ ០៥គ្រឿង កាន់អាវុធ ០៥ដើម គោលបំណងទៅរកកាប់ក្រុមក្មេងមួយក្រុមទៀត នៅឃុំល្វា ស្រុកបវេល ភ្លាមៗនោះ សមត្ថកិច្ចបានធ្វើការបង្ក្រាបឃាត់ខ្លួនបានជនសង្ស័យ ០៦នាក់ រួមនឹងអាវុធ កាំបិតខ្វែវដងឈើចំនួន ០១ដើម, កាំបិតកញ្ចែតចំនួន ០១ដើម, ដាវសាម៉ូរ៉ៃចំនួន ០១ដើម និងមធ្យោបាយម៉ូតូ ០២គ្រឿង ៕