ភ្នំពេញ៖ មានករណីឃាតកម្មមួយកើតឡើង កាលពីថ្ងៃទី១៥ ខែតុលា ឆ្នាំ២០២៣ បង្កដោយឈ្មោះ លឿង ផល្លី ហៅ លឹប ភេទប្រុស អាយុ ៣៨ឆ្នាំ ជនជាតិខ្មែរ (សង្សារជនរងគ្រោះ) បានធ្វើសកម្មភាពយកកាំបិតបុ័ងតោកាប់ទៅលើជនរងគ្រោះឈ្មោះ ជឿន ស្រីហុង ភេទស្រី អាយុប្រហែល ៣៤ឆ្នាំ ជនជាតិខ្មែរ បណ្តាលឲ្យស្លាប់នៅហ្នឹងកន្លែងកើតហេតុ រួចរត់គេចខ្លួនបាត់។ ក្រោយពីទទួលបានព័ត៌មាន កម្លាំងជំនាញរបស់នាយកដ្ឋាននគរបាលព្រហ្មទណ្ឌ ដោយអនុវត្តតាមបទបញ្ជារបស់នាយឧត្តមសេនីយ៍ ស ថេត អគ្គស្នងការនគរបាលជាតិ, អគ្គស្នងការរងទទួលផែន និង ឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ បានដឹកនាំសហការជាមួយកម្លាំងជំនាញរបស់ស្នងការដ្ឋាននគរបាលរាជធានីភ្នំពេញ ចុះដល់ទីតាំងកន្លែងកើតហេតុ ធ្វើការស្រាវជ្រាវតាមជំនាញនីតិវិធី និងកំណត់បានទីតាំងលាក់ខ្លួនរបស់ជនសង្ស័យ។ នៅថ្ងៃទី១៨ ខែតុលា ឆ្នាំ២០២៣ កម្លាំងជំនាញរបស់នាយកដ្ឋាននគរបាលព្រហ្មទណ្ឌ ដឹកនាំប្រតិបត្តិការផ្ទាល់ដោយ លោកឧត្តមសេនីយ៍ត្រី ហ៊ុន មុន្នីរ័ត្ន និងលោកវរសេនីយ៍ឯក ហែម បូណា អនុប្រធាននាយកដ្ឋាន បានបន្តដឹកនាំជាមួយកម្លាំងជំនាញស្នងការដ្ឋាននគរបាលរាជធានីភ្នំពេញ ស្នងការដ្ឋាននគរបាលខេត្តស្វាយរៀង អធិការដ្ឋាននគរបាលក្រុងបាវិត និងអធិការដ្ឋាននគរបាលខណ្ឌសែនសុខ ធ្វើការឃាត់ខ្លួនជនសង្ស័យឈ្មោះ លឿង ផល្លី នៅចំណុចភូមិអង្គសាលា សង្កាត់ព្រៃអង្គុញ ក្រុងបាវិត ខេត្តស្វាយរៀង។ ក្រោយពីបានធ្វើការឃាត់ខ្លួនជនសង្ស័យខាងលើបានឆ្លើយសារភាពថា ខ្លួនពិតជាបានធ្វើសកម្មភាពប្រើកាំបិតបុ័ងតោ កាប់សម្លាប់លើជនរងគ្រោះឈ្មោះ ជឿន ស្រីហុង ពិតប្រាកដមែន មូលហេតុ ដោយសារប្រច័ណ្ឌ និងជនរងគ្រោះសុំបែក ទៅមានសង្សារថ្មី។ បច្ចុប្បន្ន ជនសង្ស័យខាងលើ ត្រូវបានបញ្ជូនទៅនាយកដ្ឋាននគរបាលព្រហ្មទណ្ឌ ដើម្បីចាត់ការបន្តតាមនីតិវិធី៕
Author: admin
ខេត្តប៉ៃលិន ៖ កាលពីវេលាម៉ោង ១២និង២០នាទីថ្ងៃទី២៤ ខែតុលា ឆ្នាំ២០២៣ កម្លាំងប៉ុស្តិ៍នគរបាលរដ្ឋបាលសាលាក្រៅ បានទទួលសេចក្តីរាយការណ៍តាមទូរស័ព្ទពីជនរងគ្រោះ ដែលជាឱពុកបង្កើត ខណ:ទ្រាំលែងបាននឹងកូនប្រុសរបស់ខ្លួន ដែលតែងតែបង្កអំពើហិង្សាក្នុងគ្រួសារឥតល្អែ ដោយនៅចុងក្រោយនេះ ជនបង្កបានយកដុំថ្មគប់ទៅលើឪពុកបែកចិញ្ចើមបណ្តាលឱ្យឈាមហូរជោកផ្ទៃមុខ រួចទាញយកពូថៅវាយបំបែកឆ្នាំងចាន និងសម្ភារ:ផ្ទះបាយស្ទើរតែខ្ទេចខ្ទីគ្មានសល់ ត្រូវនគរបាល ចាប់ឃាត់ខ្លួន។ហេតុការណ៍កូនប្រុសបង្កើតយកដុំថ្មគប់ទៅលើឪពុក និងយកពូថៅវាយបំបែកសម្ភារ:ផ្ទះបាយខ្ទេចខ្ទីស្ទើរគ្មានសល់នេះ បានកើតឡើងកាលពីវេលាម៉ោង៩ និង៣០នាទីយប់ថ្ងៃទី២៣ ខែតុលា ឆ្នាំ ២០២៣ ស្ថិតនៅក្នុងភូមិកំពុងចម្លងក្រោម ឃុំសាលាក្រៅ ស្រុកសាលាក្រៅ ខេត្តប៉ៃលិន។ ប្រភពព័ត៌មានពីមន្រ្តីនគរបាលបានឱ្យដឹងថា ៖ ជនបង្កមាន ឈ្មោះ ឌី ចូរ ភេទប្រុស អាយុ២៧ឆ្នាំ ជាកសិករ (ត្រូវជាកូនបង្កើត) សង្ស័យប្រើប្រាស់គ្រឿងញៀន។ ចំណែកឯជនរងគ្រោះមាន ឈ្មោះ ស៊ុត ឌី ភេទប្រុស អាយុ៦០ឆ្នាំ ជាកសិករ (ត្រូវជាឱពុកបង្កើត) រស់នៅភូមិ/ឃុំ កើតហេតុខាងលើ រងរបួសបែកចិញ្ចើមខាងស្ដាំ ហូរឈាមស្រោចជោកពេញផ្ទៃមុខ។ មុនពេលកើតហេតុ គឺជនដៃដល់ដើរមក ពីផឹកស៊ីជួបជុំមិត្តភក្តិ ក៏បានប្រកែកជាមួយនឹងឪពុកដែលកំពុងអង្គុយនៅខាងមុខផ្ទះ លុះឪពុកណែនាំឱ្យស្រវឹងចូលទៅសម្រាក ស្រាប់តែកូនប្រុសរបស់គាត់បានធ្វើសកម្មភាពយកដុំឥដ្ឋគប់ទៅលើឱពុកបង្កើតរបស់ខ្លួន បណ្ដាលឲ្យរងរបួសបែកចិញ្ចើមខាងស្ដាំ ស្រែកឱ្យអ្នកភូមិជួយលាងរបួស។ ពេលនោះជនដៃដល់ជាកូន បានទាញយកពូថៅ វាយបំផ្លិចបំផ្លាញ ទ្វារផ្ទះ និងរបស់របរនៅក្នុងផ្ទះផ្សេងទៀត បណ្តាលឱ្យខ្ទេចខ្ទីស្ទើរតែគ្មានសល់តែម្តង។ ប្រភពដដែលបន្តតទៀតថា ក្រោយពេលទទួលសេចក្តីរាយការណ៍នគរបាលបានចុះទៅដល់កន្លែងកើតហេតុ ដើម្បីធ្វើការសួរនាំ និងឃាត់ខ្លួនជនសង្ស័យភ្លាមៗតែម្តង។ ភ្លាមៗនោះ នគរបាលបានដកហូតវត្ថុតាងរួមមានពូថៅ១ដើម ដុំឥដ្ឋ០១ដុំ។ បើតាមនគរបាលបញ្ជាក់ថា ជនបង្កមានប្រវត្តិមិនល្អ និងមានសកម្មភាពពីមុនធ្លាប់ប្រព្រឹត្តិអំពើហិង្សាក្នុងគ្រួសារជាច្រើនលើកច្រើនសារ ព្រមទាំងបំផ្លិចបំផ្លាញរបស់របរក្នុងផ្ទះជាច្រើនលើកច្រើនដង ហើយនគរបាលប៉ុស្តិ៍ធ្លាប់អប់រំរួចមកហើយ តែបុគ្គលនេះនៅតែមិនរាងចាល ហើយធ្វើឱ្យអ្នកភូមិព្រួយបារម្ភយ៉ាងខ្លាំងពីបញ្ហាភូមិឃុំសុវត្ថិភាពផងដែរ។ បច្ចុប្បន្ន ជនសង្ស័យខាងលើ ត្រូវបាននគរបាលឃាត់ខ្លួនបណ្តោះអាសន្ននៅអធិការដ្ឋាននគរបាលស្រុកសាលាក្រៅ ដើម្បីរៀបចំសំនុំរឿងចាត់ការតាមនិតិវិធីច្បាប់៕
ភ្នំពេញ៖ បុរសម្នាក់សង្ស័យមានវិបត្តិគ្រួរសារ និងជំងឺប្រចាំ កាយផងនោះ បានសម្រេចចិត្តបញ្ចប់ជីវិតខ្លួនឯង ដោយយកអំបែងកែវអាកខ្លួនឯងស្លាប់ក្នុងថ្លុកឈាមបង្កការភ្ញាក់ផ្អើលទាំងព្រឹកព្រលឹម ថ្ងៃទី២៧ ខែតុលា ឆ្នាំ២០២៣ នៅចំណុចផ្លូវ១៦៩ កែងផ្លូវ១២២ សង្កាត់មិត្តភាព ខណ្ឌ៧មករា រាជធានីភ្នំពេញ។ សពមានឈ្មោះ ខុង រ៉ាឌី អាយុ៣៨ឆ្នាំ ជាងភ្លើង ស្នាក់នៅបន្ទប់ជួល ម្តុំផ្សារតូចទួលសង្កែ ស្រុកកំណើត នៅភូមិខ្លុយ ឃុំសូរិយូង ស្រុកតាំងគោក ខេត្តកំពង់ធំ មានប្រពន្ធ និងកូនចំនួនពីរនាក់ រស់ស្រុកសណ្តាន់ ខេត្តកំពង់ធំ។ យោងតាមប្រភព័ត៌មានពីបងប្រុសសពរងគ្រោះ បានឱ្យដឹងថា ជនរងគ្រោះមានអាការៈជំងឺគេងអត់លក់ និងបានដាក់ច្បាប់នៅកន្លែងការងារចំនួនពីរថ្ងៃ គាត់ក៏ហៅឱ្យមកស្នាក់នៅផ្ទះគាត់ នៅភូមិត្រពាំងក្រសាំង ខណ្ឌពោធិ៍សែនជ័យ ចំនួន ៤ថ្ងៃហើយ ដេីម្បីព្យាបាលជំងឺ ហើយជនរងគ្រោះបានឈប់លេីសថ្ងៃសុំច្បាប់ចំនួនពីរថ្ងៃ ខាងក្រុមហ៊ុន ក៏បានហៅទូរសព្ទមកសួរនាំគាត់ជាបងប្រុស ហេីយគាត់បានប្រាប់ពីមូលហេតុ ខាងក្រុមហ៊ុនក៏ឱ្យគាត់ទៅជួបនិយាយគ្នា។ នៅព្រឹកថ្ងៃទី២៦ ជនរងគ្រោះបានជិះម៉ូតូចេញពីផ្ទះជួលហើយប្រាប់ថា ទៅធ្វើការ។ បន្ទាប់មកខាងក្រុមហ៊ុន ក៏បានទាក់ទងមកសួរគាត់វិញថា អត់ឃេីញជនរងគ្រោះទៅធ្វើការ គាត់ក៏ចាប់ផ្តើមសង្ស័យ ក៏ព្យាយាមទំនាក់ទំនងទៅប្អូនប្រុស ក៏ហៅទូរសព្ទចូល ប៉ុន្តែមិនមានអ្នកទទួល។ ប្រភពនៅកន្លែងកើតហេតុ បានឱ្យដឹងថា មុនកេីតហេតុនៅព្រឹកម៉ោង៦:១៥នាទី គេឃេីញជនរងគ្រោះជិះម៉ូតូម៉ាកហុងដា គុបជ្រុង ពណ៌ទឹកប៊ិច ពាក់ស្លាកលេខ ភ្នំពេញ1AF-7092 មកឈប់នៅហាងកាហ្វេមួយកន្លែង នៅក្រោយក្រសួងការពារជាតិ ផ្លូវ១២២។ ខណៈកំពុងអង្គុយផឹកការហ្វេរក្នុងទឹកមុខសោកសៅ បុរសរងគ្រោះ ក៏បានវៃបំបែកកែវកាហ្វេ ហេីយយកអំបែងមកអារបំពង់ករខ្លួនឯង បណ្តាលឱ្យឈាមស្រោចខ្លួនរបួសធ្ងន់។ បន្ទាប់មកឃេីញអាការៈហូរឈាមស្រោចពេញខ្លួន ម្ចាស់ហាងបានដេញបុរសនោះឱ្យទៅពេទ្យ ហើយបុរសនោះក៏ដេីរយកដៃខ្ទប់ឈាម ឆ្លងកាត់សួនច្បារហាត់ប្រាណ មកដួលស្លាប់ក្នុងថ្លុកឈាម នៅផ្លូវ១៦៩ កែងផ្លូវ១២២។ ចំពោះមូលហេតុនៃការធ្វើអត្តឃាតរបស់ជនរងគ្រោះត្រូវ បងប្រុសបង្កើតជនរងគ្រោះ បានបង្ហេីបថា ដោយសារជំងឺប្រចាំកាយ គឺជំងឺសតិអារម្មណ៍ ដេកអត់លក់ជាច្រេីនថ្ងៃមកហេីយ និងបញ្ហារជាមួយគ្រួសារ ប្រពន្ធសុំលែង។ បន្ទាប់ពីសមត្ថកិច្ចបច្ចេកទេស និងវិទ្យាសាស្ត្របានធ្វើកោសល្យវិច័យជុំវិញកន្លែងកើតហេតុ បានបញ្ជាក់ថា សពពិតជាស្លាប់ដោយសារធ្វើអត្តឃាត អារកសម្លាប់ខ្លួនពិតពិតប្រាកដ និងបានប្រគល់សពជូនសាច់ញាតិ៕
ភ្នំពេញ៖ មានករណីអគ្គិភ័យឆាបឆេះផ្ទះប្រជាពលរដ្ឋមួយកន្លែង បង្កការភ្ញាក់ផ្អើល ស្ថិតនៅចំណុចបុរី ជីបម៉ុង ផ្ទះលេខ៤៣ ផ្លូវលេខL០៣ ភូមិស្រុកចេក សង្កាត់ជើងឯក ខណ្ឌដង្កោ រាជធានីភ្នំពេញ នៅវេលាម៉ោង ៧:៤០នាទីព្រឹក ថ្ងៃទី២៦ ខែតុលា ឆ្នាំ២០២៣។ ក្រោយកើតហេតុ លោកឧត្តមសេនីយ៍ទោ ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានណែនាំដល់កម្លាំងជំនាញការិយាល័យនគរបាលបង្ការពន្លត់អគ្គិភ័យ និងសង្គ្រោះ ឱ្យជួយសង្គ្រោះប្រជាពលរដ្ឋឲ្យបានទាន់ពេលវេលា។ បន្ទាប់មកលោកវរសេនីយ៍ឯក ព្រហ្ម យ៉ន នាយការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានដឹកនាំបញ្ជាផ្ទាល់ដល់កងម្លាំងពន្លត់អគ្គិភ័យដែលប្រចាំការនៅគោលដៅសាលាខណ្ឌដង្កោ ដើម្បីចេញទៅជួយអន្តរាគមន៍បាញ់ទឹកពន្លត់ឲ្យទាន់ពេលវេលា កុំឲ្យមានការឆាបឆេះបន្តដល់ផ្ទះប្រជាពលរដ្ឋដែលនៅក្បែរនោះ។ ប្រតិបត្តិការពន្លត់អគ្គិភ័យនេះ កម្លាំងសមត្ថកិច្ចជំនាញ បានប្រើប្រាស់រថយន្តពន្លត់អគ្គិភ័យចំនួន ៤គ្រឿង ទើបគ្រប់គ្រង់បានទាំងស្រុងនៅវេលាម៉ោង ៨:៥នាទីព្រឹកថ្ងៃខែឆ្នាំដដែល។ ចំពោះមូលហេតុ បណ្តាលមកពីការឆ្លងចរន្តអគ្គីសនី។ លោកវរសេនីយ៍ឯក ព្រហ្ម យ៉ន បានបញ្ជាក់ថា ចំពោះករណីគ្រោះអគ្គិភ័យខាងលើនេះ ជាប្រភេទសំណង់ ផ្ទះល្វែង ទំហំ (១៤ម៉ែត្រ គុណ ២៣ម៉ែត្រ) បានឆេះបន្ទប់ផ្ទះបាយ និងសម្ភារផ្ទះបាយអស់ទាំងស្រុង និងពុំបានបណ្តាលឲ្យឆេះរាលដាលដល់ផ្ទះអ្នកក្បែរខាងឡើយ៕
ភ្នំពេញ៖ ក្រសួងធនធានទឹក និងឧតុនិយម បានជូនដំណឹងអំពីស្ថានភាពធាតុអាកាសនៅព្រះរាជាណាចក្រកម្ពុជាសម្រាប់ថ្ងៃទី៣១ ខែតុលា ឆ្នាំ២០២៣។ ក្រសួងធនធានទឹក បានឲ្យដឹងថា ព្រះរាជាណាចក្រកម្ពុជាទទួលរងឥទ្ធិពលពីប្រព័ន្ធសម្ពាធខ្ពស់នៃប្រទេសចិនដែលគ្របដណ្ដប់ផ្នែកខាងជើងប្រទេសថៃ និងលាតសន្ធឹងទៅដល់សមុទ្រចិនខាងត្បូង។ ខណៈនេះ នឹងមានលំហូរខ្យល់បក់មកពីទិសខាងជើង និងទិសឦសាន ប្រសព្វគ្នាជាមួយលំហូរខ្យល់បក់ពីទិសអាគេ្នយ៍ ដែលផ្ទុកនូវសំណើមនៃសមុទ្រចិនខាងត្បូង បង្កើតបានជាពពកភ្លៀងលើប្រទេសកម្ពុជា។ ក្រសួង បានបញ្ជាក់ថា ស្ថានភាពធាតុអាកាសបែបនេះ នៅតែបន្តមានរហូតដល់ថ្ងៃទី០៤ ខែវិច្ឆិកា ឆ្នាំ២០២៣។ស្ថានភាពបែបនេះនឹងធ្វើឱ្យ នៅថ្ងៃទី៣១ ខែតុលា បណ្ដាខេត្តមួយចំនួននៅក្នុងតំបន់មាត់សមុទ្រ និងតំបន់ខ្ពង់រាប នឹងមានភ្លៀងធ្លាក់ក្នុងកម្រិតពីតិចទៅបង្គួរ លាយឡំជាមួយផ្គររន្ទះ និងខ្យល់កន្ត្រាក់ គ្របដណ្តប់លើផ្ទៃដីពី ៣០% ទៅ ៥០%។ ចំពោះរាជធានីភ្នំពេញ និងខេត្តមួយចំនួននៅក្នុងតំបន់ទំនាបកណ្ដាល នឹងមានភ្លៀងធ្លាក់ពីមធ្យមទៅបង្គួរ លាយឡំជាមួយផ្គររន្ទះ និងខ្យល់កន្ត្រាក់ គ្របដណ្តប់លើផ្ទៃដីពី ៤០% ទៅ ៦០%។ រីឯចាប់ពីថ្ងៃទី០១ ដល់ថ្ងៃទី០៤ ខែវិច្ឆិកា ភ្លៀងនឹងបន្តធ្លាក់លើខេត្តមួយចំនួនក្នុងតំបន់តាមសមុទ្រ និងតំបន់ខ្ពង់រាប ក្នុងកម្រិតពីតិចទៅបង្គួរ លាយឡំជាមួយផ្គររន្ទះ និងខ្យល់កន្ត្រាក់គ្របដណ្តប់លើផ្ទៃដីពី ៣០% ទៅ ៥០%។ ចំណែកឯ រាជធានីភ្នំពេញ និងខេត្តមួយចំនួននៅក្នុងតំបន់ទំនាបកណ្ដាលនឹងមានភ្លៀងធ្លាក់ពីមធ្យមទៅបង្គួរ លាយឡំ ជាមួយផ្គររន្ទះ និងខ្យល់កន្ត្រាក់ គ្របដណ្តប់លើផ្ទៃដីពី ៤០ % ទៅ ៦០%៕
ភ្នំពេញ៖ រាជរដ្ឋាភិបាលកម្ពុជា បានឯកភាពតាមក្រសួងព័ត៌មានសម្រេច លុបអាជ្ញាបណ្ណអាជីវកម្មប្រព័ន្ធផ្សព្វផ្សាយគ្រប់ប្រភេទ និងសមាគមអ្នកសារព័ត៌មាន ដែលបានចុះ បញ្ជីហើយមិនដំណើរការក្នុងរយៈពេល១ឆ្នាំ។ ដោយឡែក សម្រាប់ស្ថានីយទូរទស្សន៍ គ្រប់ប្រភេទទុកលទ្ធភាពជូនក្នុងរយៈពេល៣ឆ្នាំ ដោយសារប្រើទុនវិនិយោគច្រើន និងត្រូវសិក្សារយៈពេលយូរ។ នេះបើយោងតាមលិខិតរបស់ទីស្ដីការគណៈរដ្ឋមន្ដ្រី កាលពីថ្ងៃទី៣០ ខែតុលា ឆ្នាំ២០២៣ ដែល CNC ទទួលបាន។ ក្នុងឯកសារនោះ បានបញ្ជាក់ថា រាជរដ្ឋាភិបាលឯកភាពជាគោលការណ៍ជូនក្រសួងព័ត៌មានដោយណែនាំឱ្យម្ចាស់អង្គភាពអាជីវកម្មប្រព័ន្ធផ្សព្វផ្សាយទាំងអស់ដែលកំពុងដំណើរការផ្សាយដោយគ្មាន អាជ្ញាបណ្ណ ត្រូវមកសុំច្បាប់អនុញ្ញាតប្រកបអាជីវកម្មពីក្រសួងព័ត៌មានដោយទុករយៈពេល៣ខែ។ ផុតរយៈពេលកំណត់ បុគ្គលណាដែលធ្វើអាជីវកម្មប្រព័ន្ធផ្សព្វផ្សាយដោយគ្មានច្បាប់អនុញ្ញាត ត្រូវប្រឈមចំពោះមុខច្បាប់។ចំណែកឯអង្គភាពប្រព័ន្ធផ្សព្វផ្សាយទាំងអស់ត្រូវគោរព និងអនុវត្តតាមច្បាប់ស្តីពីរបបសារព័ត៌មាន និង ក្រមសីលធម៌ វិជ្ជាជីវៈ ដើម្បីពង្រឹងគុណភាពនៃការផ្សព្វផ្សាយ។ «ករណីម្ចាស់អង្គភាពប្រព័ន្ធផ្សព្វផ្សាយណាបំពានវិជ្ជាជីវៈ មិនព្រមអនុវត្តតាមការណែនាំ ក្រសួងព័ត៌មានត្រូវដកហូតអាជ្ញាបណ្ណ បញ្ឈប់ការធ្វើអាជីវកម្មជាស្ថាពរ»។ នេះជាការគូសបញ្ជាក់របស់ឯកសារខាងលើ៕
ភ្នំពេញ៖ សរុបរយៈពេល ៩ខែ ឆ្នាំ២០២៣ អគ្គនាយកដ្ឋានពន្ធដារប្រមូលបានជាក់ស្ដែងតាមប្រព័ន្ធគ្រប់គ្រងទិន្នន័យចំណូលអនឡាញ មានចំនួនប្រមាណជា ២៨០៦,៣៧លានដុល្លារ ស្មើនឹង ៧៨,៥៧% នៃផែនការច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៣។ ហើយគិតត្រឹមថ្ងៃទី៣០ ខែតុលា ឆ្នាំ២០២៣ នេះ គឺសម្រេចបានប្រមាណជា ៣០៦០,៩៥លានដុល្លារ ស្មើនឹង ៨៥,៧០% នៃផែនការប្រចាំឆ្នាំ ២០២៣។ ការលើកឡើងឲ្យដឹងបែបនេះរបស់លោក គង់ វិបុល រដ្ឋមន្តី្រប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដារ ក្នុងកិច្ចប្រជុំបូកសរុបលទ្ធផលការងារប្រមូលចំណូលពន្ធប្រចាំខែកញ្ញា និងប្រចាំត្រីមាសទី៣ ឆ្នាំ២០២៣ ព្រមទាំងទិសដៅសម្រាប់អនុវត្តបន្តរបស់អគ្គនាយកដ្ឋានពន្ធដារ នៅថ្ងៃទី៣០ ខែតុលា ឆ្នាំ២០២៣ នាសាលប្រជុំសាលាជាតិពន្ធដារ ក្រោមវត្តមាន របស់លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ។ ចំពោះលទ្ធផលប្រមូលពន្ធក្នុងខែកញ្ញា ឆ្នាំ២០២៣ លោក គង់ វិបុល បានបង្ហាញថា ចំណូលពន្ធអាករគ្រប់ប្រភេទដែលអគ្គនាយកដ្ឋានពន្ធដារប្រមូលបានជាក់ស្តែងតាមប្រព័ន្ធគ្រប់គ្រងទិន្នន័យចំណូលអនឡាញរបស់អគ្គនាយកដ្ឋានពន្ធដារមានចំនួនប្រមាណ ២៥៥,៧៧លានដុល្លារ ស្មើនឹង ៧,១៦% នៃផែនការច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៣។ គិតត្រឹមខែកញ្ញា ឆ្នាំ២០២៣ កម្ពុជាបាន និងកំពុងអនុវត្តកិច្ចព្រមព្រៀងស្ដីពីការចៀសវាងការយកពន្ធត្រួតគ្នា (DTA) ជាមួយរដ្ឋបាលសារពើពន្ធចំនួន ៩ រួមមាន ថៃ, សិង្ហបុរី, ព្រុយណេ, ចិន, វៀតណាម, តំបន់រដ្ឋបាល ពិសេសហុងកុង, ម៉ាឡេស៊ី, ឥណ្ឌូណេស៊ី និងកូរ៉េខាងត្បូង ខណៈ DTA កម្ពុជា-ម៉ាកាវ ដែលបានចូលជាធរមាន និងមានប្រសិទ្ធភាពអនុវត្ត ចាប់ពីថ្ងៃទី១ ខែមករា ឆ្នាំ២០២៤ ហើយ DTA កម្ពុជា-តួកគី បានបញ្ចប់នីតិវិធីផ្ទៃក្នុង ដើម្បីដាក់ឱ្យកិច្ចព្រមព្រៀងទាំងពីរចូលជាធរមាន។ សម្រាប់រយៈពេល៩ខែ ឆ្នាំ២០២៣ មានសហគ្រាសចំនួន ៣៤៧ បានស្នើសុំនិងទទួលបានអត្ថប្រយោជន៍ ពីការអនុវត្តកិច្ចព្រមព្រៀងស្ដីពីការចៀសវាងការយកពន្ធត្រួតគ្នា។ លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បាន ណែនាំសម្រាប់ជាទិសដៅអនុវត្តបន្តរបស់អគ្គនាយកដ្ឋានពន្ធដារ ជាពិសេស ការងារអាទិភាពសំខាន់ៗ ក្នុងការពង្រឹង និងធ្វើឱ្យប្រសើរឡើងនូវការផ្ដល់សេវាអ្នកជាប់ពន្ធ ការដាក់ចេញនូវអាទិភាពការងារនិងដោះស្រាយនូវបញ្ហាប្រឈមនានារបស់វិស័យឯកជន…
មណ្ឌលគិរី៖ លោក ហ៊ាញ ប៊ុណ្ណា នាយករងរដ្ឋបាលសាលាខេត្តមណ្ឌលគិរី បានឱ្យដឹងថា មកដល់បច្ចុប្បន្ន តាមរយៈកិច្ចខិតខំប្រឹងប្រែងរបស់រាជរដ្ឋាភិបាល ជាមួយអង្គការដៃគូអភិវឌ្ឍន៍ និងស្ថាប័នពាក់ព័ន្ធនានា បានដំណើរការរៀបចំ និងទទួលស្គាល់សហគមន៍ចុះបញ្ជីដីសមូហភាពជនជាតិដើមភាគតិចបានចំនួន២៥សហគមន៍ នៅក្នុងខេត្តមណ្ឌលគិរី ដែលក្នុងនោះមានសហគមន៍ចំនួន១៧បានទទួលស្គាល់ដោយក្រសួងមហាផ្ទៃ និងសហគមន៍ចំនួន៧បានទទួលប័ណកម្មសិទ្ធិដីសហមូលហភាពជនជាតិដើមភាគតិច។ លោកថាយ៉ាងណាមិញ សហគមន៍ជនជាតិដើមភាគតិចប្រមាណ១៨សហគមន៍ក្នុងខេត្តមណ្ឌលគិរី បាននិងកំពុងស្ថិតក្នុងដំណើរការចុះបញ្ជីដីសមូភាពជនជាតិដើមភាគតិចដើម្បីសន្តិសុខដីធ្លី និងការគ្រប់គ្រងធនធានធម្មជាតិប្រកបដោយនិរន្តរភាព។ ការថ្លែងនេះរបស់លោក ហ៊ាញ ប៊ុណ្ណា ក្នុងគ្រាដែលរដ្ឋបាលសាលាខេត្តមណ្ឌលគិរី បានបើកសិក្ខាសាលាឆ្លុះបញ្ចាំង ស្តីពីការអនុវត្តគម្រោង សុវត្ថិភាពដីធ្លីសហគមន៍ជនជាតិដើមភាគតិចខេត្តមណ្ឌលគិរី និងខេត្តស្ទឹងត្រែង រយៈពេល០៦ខែ ឆ្នាំ២០២៣ ដែលប្រព្រឹត្តទៅ នៅសាលប្រជុំសណ្ឋាគារពេជ្រាដា ក្នុងខេត្តមណ្ឌលគិរី នាព្រឹកថ្ងៃទី៣១ ខែតុលា ឆ្នាំ២០២៣។ ក្នុងឱកាសនេះ លោក ហ៊ាញ ប៊ុណ្ណា ក៏បានអំពាវនាវដល់ស្ថាប័នពាក់ព័ន្ធ អង្គការដៃគូអភិវឌ្ឍន៍ ម្ចាស់ជំនួយនានា ជាពិសេសអង្គការ លេនដីសា សូមបន្តការគាំទ្រ សហការក្នុងការពង្រឹងសមត្ថភាពប្រជាសហគមន៍ និងដំណើការការចុះបញ្ជីដីសមូហភាពជនជាតិដើមភាគតិច ដើម្បីចូលរួមក្នុងការគ្រប់គ្រងធនធានធម្មជាតិ ការការពារ ការអភិរក្ស វប្បធម៌ ទំនៀមទម្លាប់ ប្រពៃណីជនជាតិដើមភាគតិច ជាពិសេសការធ្វើឱ្យប្រសើរឡើងនូវនិរន្តរភាពបរិស្ថាន និងលើកកម្ពស់ជីវភាពប្រជាសហគមន៍។ ជាមួយគ្នានេះដែរ លោក ម៉ា សៀវឆេ តំណាងអង្គការភូមិខ្ញុំ បានឱ្យដឹងថា ការរៀបចំសិក្ខាសាលានេះឡើង ក្នុងគោលបំណង ដើម្បីឱ្យសហគមន៍បង្ហាញពីលទ្ធផលសម្រេចបាន បញ្ហាប្រឈម និងសំណូមរពរ លើកិច្ចការសហគមន៍ជនជាតិដើមភាគតិច ចូលរួមចែករំលែកចំណេះដឹង និងបទពិសោធលើការងារគ្រប់គ្រងធនធានដីធ្លីពីគ្នាទៅវិញទៅមក និងបង្កើនកិច្ចសហការរវាងសហគមន៍ អ្នកពាក់ព័ន្ធ អាជ្ញាធរមូលដ្ឋាន សម្រាប់ការអនុវត្តន៍ផែនការបន្ត។ លោក បានបន្ថែមថា ធនធានដីធ្លី ពិតជាមានសារៈសំខាន់ណាស់សម្រាប់សហគមន៍ជនជាតិដើមភាគតិចទាក់ទងនឹងជីវភាពរស់នៅ វប្បធម៌ និងប្រពៃណីដ៏ល្អផូរផង់របស់ពួកគាត់។ ជាងនេះទៅទៀត ព្រៃឈើ និងអនុផលព្រៃឈើនៅលើដីក្នុងសហគមន៍ជនជាតិដើមភាគតិច បានផ្គត់ផ្គង់អាហារ និងប្រាក់ចំណូលដល់ពួកគាត់ផងដែរ ហើយដីមួយចំនួនត្រូវបានប្រើប្រាស់សម្រាប់ការ អភិរក្សវប្បធម៌ ដូចជាដីកប់សព និងព្រៃអរក្សជាដើម៕
រតនគិរី៖ លោក សុខ រដ្ឋា សមាជិកក្រុមប្រឹក្សាខេត្តតំណាង លោក ណាប់ ប៊ុនហេង ប្រធានក្រុមប្រឹក្សាខេត្តមានប្រសាសន៍ថា វេទិកាផ្សព្វផ្សាយ និង ពិគ្រោះយោបល់ គឺ អាចដល់ព័ត៌មានដល់ប្រជាពលរដ្ឋនិងផ្ដល់ឱកាសដល់ពលរដ្ឋបានបញ្ចេញនូវមតិយោបល់សំណូមពររួមទាំងបញ្ហាប្រឈមរបស់ខ្លួនដើម្បីវិភាគការងាររកដំណោះស្រាយ ជូនពួកគាត់ឲ្យទាន់ពេលវេលានិងតម្លាភាព។ ប្រសាសន៍បែបនេះរបស់លោក គឺ បានលើកឡើងនៅក្នុងឱកាសដែលលោកបានអញ្ជើញជាអធិបតីភាព ក្នុង វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត ជាមួយបងប្អូនប្រជាពលរដ្ឋនៅស្រុកអូយ៉ាដាវ ព្រឹកថ្ងៃទី ៣១ខែតុលាឆ្នាំ ២០២៣។ ពិធីនេះក៏មានការអញ្ជើញចូលរួម លោក លន់សុភាព អភិបាលរងខេត្ត លោក ហេង បុន្នី អភិបាលស្រុកអូរយ៉ាដាវ និង មន្ទីរជំនាញពាក់ព័ន្ធ រួមជាមួយប្រជាពលរដ្ឋជាច្រើនរូបនៅសាលាស្រុកអូយ៉ាដាវ ។ មានប្រសាសន៍បើកវេទិកាផ្សព្វផ្សាយនិងពិគ្រោះយោបល់ របស់ក្រុមប្រឹក្សាខេត្ត នាពេលនេះលោក សុខ រដ្ឋា សមាជិកក្រុមប្រឹក្សាខេត្តបានលើកឡើងថា វេទិការនេះមានគោលបំណង ដើម្បីបង្កើននូវវប្បធម៌ពិភាក្សា រវាងក្រុមប្រឹក្សាថ្នាក់ក្រោមជាតិ ដៃគូអភិវឌ្ឍនានា សម្រាប់លើកកម្ពស់គណនេយ្យភាព តម្លាភាព និងសមធម៌ ក្នុងកិច្ចដំណើការអភិបាលកិច្ចល្អ និងតាមបែបប្រជាធិបតេយ្យនៅមូលដ្ឋាន។ ជាពិសេស វេទិកាផ្សព្វផ្សាយ និងពិគ្រោះយោបល់នេះនឹងបានផ្តល់ព័ត៌មាន ដល់ប្រជាពលរដ្ឋ នូវសមិទ្ធផលដែលរដ្ឋបាលខេត្ត សម្រេចបានកន្លងមក និងមានគម្រោងជា អទិភាពនានា ក្នុងឆ្នាំកន្លងមក ហើយក៏នឹងផ្តល់ឱកាសដល់ប្រជាពលរដ្ឋ បានបញ្ចេញនូវមតិយោបល់ សំណូមពរ រួមទាំងបញ្ហាប្រឈម របស់ខ្លួន ដើម្បីឲ្យវាគ្មិន មន្ទីរជំនាញពាក់ព័ន្ធ បកស្រាយ និងនាំយកបញ្ហាទាំងនោះមកពិភាក្សានាំគ្នាដោះស្រាយនិងឆ្លើយតបប្រកប់ដោយប្រសិទ្ធភាព។ ថ្លែងនៅក្នុងឱកាសនេះផងដែរ លោក លន់ សុភាព អភិបាលរងខេត្ត បានលើកឡើងថា រាល់បញ្ហាដែលប្រជាពលរដ្ឋបានលើកឡើង និងសំណូមពរថ្នាក់ដឹកនាំខេត្ត ស្វែងរកនូវដំណោះស្រាយមួយ ល្អប្រសើជូនប្រជាពលរដ្ឋ ហើយចំពោះបញ្ហាដែលនៅសេសសល់បន្ទាប់ពីការបកស្រាយ របស់អង្គភាពជំនាញ ពាក់ព័ន្ធថ្នាក់ដឹកនាំខេត្ត និងយកទៅពិភាក្សា និងជំរុញឲ្យមានដំណោះស្រាយជាបន្តបន្ទាប់ ជាពិសេសនៅក្នុងកិច្ចប្រជុំនានារបស់រដ្ឋបាលខេត្ត និងកិច្ចប្រជុំរបស់ក្រុមប្រឹក្សាខេត្តដើម្បីពង្រឹងនូវការផ្តល់សេវាសាធារណៈធ្វើឲ្យមានគណនេយ្យភាព តម្លាភាព គុណភាព និងប្រសិទ្ធិភាព ៕