សេចក្តីរាយការណ៍ពីប្រជាពលរដ្ឋបានឲ្យដឹងថា ឃ្លាំងមួយកន្លែង ស្ថិតនៅភូមិឆេះរទេះលិច សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ សង្ស័យកំពុងធ្វើសកម្មភាពវិចខ្ចប់ ស្តុក និងចែកចាយបារី ដោយមិនមានច្បាប់អនុញ្ញាតិ។ ប្រភពដដែលបានឲ្យដឹងទៀតថា ឃ្លាំងខាងលើ ពុំមានលើកផ្លាកសម្គាល់អ្វីទាំងអស់ មានតែបិទផ្លាកថា «ឃ្លាំងជួល» ហើយនៅបរិវេណខាងក្រៅ មានការយាមកាមតឹងរ៉ឹង មិនអនុញ្ញាតឱ្យមនុស្សចេញចូលផ្ដេសផ្ដាសឡើយ ប្រៀបដូចគេប្រុងប្រយ័ត្នខ្លាចបែកការណ៍រឿងផ្ទៃក្នុង ឬខ្លាចអ្នកក្រៅដឹងពីទង្វើមិនគប្បីណាមួយនៅខាងក្នុងយ៉ាងដូច្នោះដែរ។ ពាក់ព័ន្ធនឹងករណីនេះ អង្គភាពសារព័ត៌មានយើង មិនអាចទំនាក់ទំនងសុំការបញ្ជាក់ពីលោកប្រធានមន្ទីរឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ រាជធានីភ្នំពេញ និងតំណាងរោងចក្រខាងលើបាននៅឡើយនោះទេ ដោយសារពុំមានលេខទំនាក់ទំនង ហើយអង្គភាពយើង នឹងរង់ចាំការបកស្រាយបំភ្លឺ រៀងរាល់ម៉ោងធ្វើការ។ ទោះជាយ៉ាងណា ប្រជាពលរដ្ឋបានស្នើសុំយ៉ាងទទូច ដល់លោក ឃឹម ស៊ុនសូដា អភិបាលខណ្ឌកំបូល ពិសេស ឯកឧត្តម ឃួង ស្រេង អភិបាលរាជធានីភ្នំពេញ រួមទាំងមន្ត្រីជំនាញពាក់ព័ន្ធ សូមមេត្តាជួយចុះត្រួតពិនិត្យមើលទីតាំងខាងលើនេះផង ចៀសវាងការធ្វើអាជីវកម្មដោនគ្មានច្បាប់អនុញ្ញាត ប៉ះពាល់ដល់ចំណូលពន្ធរដ្ឋ៕
Author: admin
ស្នងការដ្ឋាននគរបាលខេត្តកណ្តាល បានចេញសេចក្តីបំភ្លឺមួយ ទាក់ទងនឹងករណីរាយការណ៍អំពីការប្លន់មួយដែលត្រូវបានរកឃើញថាជាការប្រឌិត។ បុរសម្នាក់ឈ្មោះ សុខ មករា បានរាយការណ៍ទៅកាន់អ្នកសារព័ត៌មានថា រូបគេត្រូវបានជនមិនស្គាល់មុខប្រមាណ ៦នាក់ ជិះម៉ូតូចំនួន ៣គ្រឿង ប្លន់យកប្រាក់ដុល្លារចំនួន ៦០០ដុល្លារ ប្រាក់រៀលចំនួន ១៦ម៉ឺនរៀល ខ្សែក និងចិញ្ចៀន នៅតាមបណ្តោយផ្លូវក្រវ៉ាត់ក្រុងទី៣ ស្ថិតក្នុងភូមិលេខ៥ សង្កាត់ស្វាយរលំ ក្រុងតាខ្មៅ ខេត្តកណ្តាល។ ក្រោយពីទទួលបានព័ត៌មាននេះ លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្ត បានបញ្ជាកម្លាំងជំនាញ និងសមត្ថកិច្ចមូលដ្ឋានឱ្យធ្វើការស្រាវជ្រាវជាបន្ទាន់។ ការស្រាវជ្រាវបានបង្ហាញថា លោក សុខ មករា ប្រឌិតរឿងទាំងមូល។ តាមការសារភាព លោក មករា បានប្រាប់សមត្ថកិច្ចថា គាត់បានឈរឈ្មោះជំនួសមិត្តភក្តិម្នាក់ដើម្បីខ្ចីប្រាក់ពីអង្គការមួយនៅក្នុងរោងចក្រចំនួន ៥៨០ដុល្លារ។ មិត្តភក្តិរបស់គាត់បានគេចខ្លួនទៅប្រទេសថៃដោយមិនសងប្រាក់នេះ ធ្វើឱ្យគាត់ជាប់បំណុល។ ដើម្បីរកប្រាក់សងអង្គការ លោក មករា បានលក់ខ្សែក និងចិញ្ចៀនរបស់ខ្លួននៅផ្សារតាខ្មៅបានចំនួន ៤០០ដុល្លារ ហើយបងស្រីរបស់គាត់បានផ្ញើប្រាក់ចំនួន ២០០ដុល្លារបន្ថែមទៀត ដើម្បីយកទៅសងប្រាក់បំណុល។ ការប្រឌិតរឿងប្លន់នេះកើតឡើងនៅថ្ងៃទី១១ ខែមីនា ឆ្នាំ២០២៥ ពេលដែលគាត់កំពុងធ្វើដំណើរត្រឡប់ទៅផ្ទះជួលនៅភូមិឬស្សីស្រុកវិញ បន្ទាប់ពីចេញមកទិញម្ហូបនៅក្រុងតាខ្មៅ។ បច្ចុប្បន្ន សមត្ថកិច្ចកំពុងកសាងសំណុំរឿងនេះ ដើម្បីចាត់ការទៅតាមនីតិវិធីច្បាប់ ចំពោះការផ្តល់ព័ត៌មានមិនពិតដល់សមត្ថកិច្ច និងសាធារណជន។ សមត្ថកិច្ចក៏បានអំពាវនាវដល់សាធារណជន និងបណ្តាញសារព័ត៌មានឱ្យប្រុងប្រយ័ត្នក្នុងការផ្សព្វផ្សាយព័ត៌មានប្រភេទនេះ ដោយត្រូវពិនិត្យផ្ទៀងផ្ទាត់ឱ្យបានត្រឹមត្រូវជាមុនសិន៕
កិច្ចប្រជុំកំពូលឥស្លាម ក្រោមប្រធានបទ “ឥស្លាម និងពុទ្ធសាសនា” បានប្រព្រឹត្តទៅកាលពីម្សិលមិញ ក្រោមអធិបតីភាពដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។ វេទិកានេះបានក្លាយជាឱកាសដ៏សំខាន់សម្រាប់ប្រទេសកម្ពុជា ក្នុងការបង្ហាញពីគំរូសន្តិភាព សហវិជ្ជមាន និងសុខដុមនីយកម្មជាតិសាសន៍ និងសាសនាទាំងអស់ក្នុងប្រទេស។ សម្តេចនាយករដ្ឋមន្ត្រីបានមានប្រសាសន៍ថា៖ ប្រទេសកម្ពុជាត្រូវបានទទួលស្គាល់ជាប្រទេសគំរូដោយអង្គការសម្ព័ន្ធពិភពឥស្លាម, បណ្តារដ្ឋសមាជិកទាំង ៥៧ នៃអង្គការសហប្រតិបត្តិការអ៊ិស្លាម(OIC) និងប្រទេសនានា លើសាកលលោក ក្នុងការបញ្ចប់សង្គ្រាមរ៉ាំរ៉ៃ និងលើកកម្ពស់សេរីភាពជំនឿសាសនា។ សម្តេចបានគូសបញ្ជាក់ថា “ក្រោយថ្ងៃរំដោះ ៧ មករា ឆ្នាំ១៩៧៩ ទើបសេរីភាពនៃជំនឿសាសនានៅកម្ពុជាត្រូវបានស្ដារ និងសង្គ្រោះឡើងវិញ” ។ សម្តេចនាយករដ្ឋមន្ត្រីបានសង្កត់ធ្ងន់ថា “គ្មានសង្គមណាមួយមានភាពបរិសុទ្ធឥតខ្ចោះនៃជាតិសាសន៍ និងសាសនានោះទេ”។ សង្គមដែលព្យាយាមទាមទារភាពបរិសុទ្ធបែបនេះ តែងតែនាំមកនូវសោកនាដកម្ម ការធ្វើទុក្ខបុកម្នេញ និងការសងសឹកគ្មានទីបញ្ចប់។ ក្នុងឱកាសនោះដែរ ឯកឧត្តមបណ្ឌិត អូស្មាន ហាស្សាន់ រដ្ឋមន្ត្រីទទួលបន្ទុកបេសកកម្មពិសេស និងជាសមាជិកឧត្តមក្រុមប្រឹក្សានៃអង្គការសម្ព័ន្ធពិភពឥស្លាម បានលើកឡើងថា៖ “កម្ពុជាត្រូវបានពិភពលោកទទួលស្គាល់ជាប្រទេសគំរូ ដែលមានសុខដុមនីយកម្មជាតិសាសន៍ និងសាសនា ហើយមិនធ្លាប់មានជម្លោះ ឬអំពើហិង្សាសាសនានោះទេ”។ ទោះបីប្រទេសកម្ពុជាមានប្រជាជនកាន់ព្រះពុទ្ធសាសនាប្រមាណ ៩៣% ខណៈដែលសាសនាឥស្លាមមានប្រមាណ ៥% ប៉ុណ្ណោះ ប៉ុន្តែរាជរដ្ឋាភិបាលបានយកចិត្តទុកដាក់យ៉ាងខ្លាំងចំពោះសហគមន៍ឥស្លាម ដោយបានផ្តល់តួនាទីដល់សមាជិកសហគមន៍ឥស្លាមនៅតាមរាជរដ្ឋាភិបាលទាំងថ្នាក់ជាតិ និងថ្នាក់ក្រោមជាតិ, បញ្ចូលគ្រូបង្រៀនខ្មែរឥស្លាម ១.៥០០ នាក់ និងគ្រូជាប់កិច្ចសន្យា ១៧៨នាក់ ចូលក្នុងក្របខណ្ឌក្រសួងអប់រំ និងផ្តល់ប្រាក់បៀវត្សរ៍ជាង ៦.៦ លានដុល្លារអាមេរិកក្នុងមួយឆ្នាំដល់គ្រូបង្រៀនខ្មែរឥស្លាម ។ ឯកឧត្តមបណ្ឌិត បានគូសបញ្ជាក់ថា កិច្ចប្រជុំកំពូលនេះបានក្លាយជាឱកាសដ៏ល្អសម្រាប់ប្រទេសនានាក្នុងពិភពលោក បានសិក្សារៀនសូត្រពីបទពិសោធន៍របស់កម្ពុជាក្នុងការកសាងភាពសុខដុមរមនា និងការរស់នៅប្រកបដោយសន្តិសហវិជ្ជមានរវាងប្រជាជនចម្រុះជាតិសាសន៍ និងសាសនា៕
កម្លាំងនគរបាលផ្នែកប្រឆាំងគ្រឿងញៀនស្រុកស្អាង បានអនុវត្តដីកាបង្គាប់ឲ្យចាប់ខ្លួន បឿន មនោ អាយុ ៣០ឆ្នាំ ជនជាតិខ្មែរ មានទីលំនៅភូមិព្រែកស្លែង ឃុំតាលន់ ស្រុកស្អាង ខេត្តកណ្ដាល។ ការចាប់ខ្លួននេះ សមត្ថកិច្ចធ្វើឡើងកាលពីថ្ងៃទី១៨ កុម្ភៈ ២០២៥ វេលាម៉ោង ២១:៣០នាទី នៅចំណុចភូមិព្រែកតាឯក ឃុំតាលន់ ស្រុកស្អាង ខេត្តកណ្ដាល ដោយសហការជាមួយកម្លាំងប៉ុស្តិ៍នគរបាលរដ្ឋបាលតាលន់ ។ ជនសង្ស័យមានដីកាបង្គាប់ឲ្យចាប់ខ្លួន ចំនួន៤ ពាក់ព័ន្ធនឹងបទល្មើស ជួញដូរ រក្សាទុក និងប្រើប្រាស់សារធាតុញៀន។ ការពិនិត្យទឹកនោម វិជ្ជមាន (+)។ បច្ចុប្បន្ន សមត្ថកិច្ចកំពុងបន្តកសាងសំណុំរឿងតាមនីតិវិធីច្បាប់ ៕
កណ្តាល៖ កាលពីថ្ងៃអង្គារ ទី១៨ កុម្ភៈ ២០២៥ វេលាម៉ោង ១៧:៥០នាទី មានគ្រោះថ្នាក់ចរាចរណ៍ផ្លូវគោកមួយកើតឡើងលើផ្លូវជាតិលេខ១ (KM 20-21) ភូមិចិនកោះ ឃុំគគីរ ស្រុកកៀនស្វាយ បណ្តាលឲ្យមានអ្នករងរបួស ២នាក់។ គ្រោះថ្នាក់នេះ កើតឡើងដោយសារម៉ូតូ HONDA DREAM C125 ដោយលោក ជា សាវឿន (៥២ឆ្នាំ) រួមដំណើរដោយអ្នកស្រី ឡូញ មុំ (៥៦ឆ្នាំ) បានឆ្លងថ្នល់ ខណៈនោះក៏មានម៉ូតូមួយគ្រឿងទៀតម៉ាក HONDA CBR បើកបរដោយយុវជនឈ្មោះ បាន ស៊ុនឡាង (១៩ឆ្នាំ) បានបុកចំពីក្រោយ បណ្តាលឲ្យអ្នករួមដំណើរជាមួយម៉ូតូ HONDA DREAM រងរបួសបាក់ដៃ រីឯអ្នកបើកម៉ូតូ CBR រងរបួសស្រាល ។ ក្រោយកើតហេតុ ជនរងគ្រោះត្រូវបានបញ្ជូនទៅមន្ទីរពេទ្យបង្អែកស្រុកកៀនស្វាយ ហើយកម្លាំងជំនាញបានចុះវាស់វែង និងយកម៉ូតូទាំងពីរទៅរក្សាទុក ដើម្បីបន្តនីតិវិធី ៕
ក្រោយពីទទួលព័ត៌មានតាមរយៈអេបអាជ្ញាធរជាតិប្រយុទ្ធប្រឆាំងគ្រឿងញៀន កម្លាំងអធិការនគរបាលស្រុកកៀនស្វាយសហការជាមួយមូលដ្ឋានបង្ក្រាបសំបុកចែកចាយគ្រឿងញៀនមួយ ឃាត់បានម្ចាស់ទំនិញម្នាក់និងអ្នកស៊ីឈ្នួលម្នាក់ បញ្ជូនទៅកាន់តុលាការ ។ លោក វរៈសេនីយ៍ឯក ព្រំ សំណាង អធិការនគរបាលស្រុកកៀនស្វាយ បានឱ្យដឹងថា ប្រតិបត្តិការបង្ក្រាបនេះ ធ្វើឡើងកាលពីវេលាម៉ោងប្រមាណ១៥និង១០នាទីរសៀល ថ្ងៃទី១៧ កុម្ភៈ ២០២៥កន្លងទៅនេះ នៅក្នុងភូមិព្រែកដូង ឃុំកំពង់ស្វាយ ស្រុកកៀនស្វាយ ហើយ ជនសង្ស័យទាំង២នាក់ រួមមាន ឈ្មោះ ផល សុភណ្ឌ័ ភេទប្រុស អាយុ៣៥ឆ្នាំ ជាម្ចាស់គ្រឿងញៀន រស់នៅភូមិកើតហេតុ និងឈ្មោះ ប៊ុន រតនៈ ហៅឆាយ ភេទប្រុស អាយុ២៣ឆ្នាំ អ្នកស៊ីឈ្នួលកាន់លក់ មានទីលំនៅភូមិស្រែអំពិល ឃុំឈើទាល ស្រុកកៀនស្វាយ។ លោកអធិការបានបញ្ជាក់ថា ក្រោយពីទទួលសេចក្តីរាយការណ៍ពី App No Drug ថា នៅទីតាំងខាងលើ មានករណីប្រើប្រាស់និងជួញដូរគ្រឿងញៀន កម្លាំងជំនាញសហការជាមួយកម្លាំងប៉ុស្តិកំពង់ស្វាយ ប៉ុស្តិឈើទាល និងកម្លាំងប្រជាការពារ ឡោមព័ទ្ធ ឃាត់បានជនសង្ស័យចំនួន២នាក់ និងឆែករកឃើញម្សៅ ស ថ្លា សង្ស័យសារធាតុញៀនម៉ាទឹកកក ជាក់ស្តែង ចំនួន៦កញ្ចប់មធ្យម ទម្ងន់១២,៦៧ក្រាម រួមជាមួយសម្ភារៈប្រើប្រាស់ និងវេចខ្ចប់ មួយចំនួនធំ។ បន្ទាប់ពីឃាត់ខ្លួន ជនសង្ស័យ ផល សុភណ្ឌ័ បានសារភាពថា ថ្នាំញៀនម៉ា ទឹកកកទាំងអស់នេះ ពិតជារបស់គេប្រាកដមែន និងបានលក់អស់មួយចំនួនហើយ ហើយបានទិញបុរសមិនស្គាល់ឈ្មោះម្នាក់ នៅម្តុំវត្តសិត្បូ សង្កាត់សិត្បូ ក្រុងតាខ្មៅ ដើម្បីយកមករំលែកជាកញ្ចប់តូចៗលក់ឱ្យអ្នកប្រើប្រាស់បន្ត។ ចំណែកឈ្មោះ ប៊ុន រតនៈ ក៏បានឆ្លើយផងដែរថា រូបគេចេះជក់គ្រឿងញៀនជាង៣ឆ្នាំមកហើយ និងធ្លាប់បានស៊ីឈ្នួលកាន់គ្រឿងញៀនរបស់ ផល សុភណ្ឌ័ យកទៅលក់ឱ្យអ្នកប្រើប្រាស់ចំនួន៣លើកផងដែរ ជាថ្នូរបានថ្នាំញៀនជក់ និងលុយចាយ ហើយបច្ចុប្បន្នជនសង្ស័យទាំង២នាក់ រួមជាមួយវត្ថុតាង កំពុងឃាត់ខ្លួនបណ្តោះអាសន្ននៅអធិការដ្ឋាននគរបាលស្រុកកៀនស្វាយ ដើម្បីកសាងសំណុំរឿងបញ្ជូនទៅសាលាដំបូងខេត្តកណ្តាល ចាត់ការតាមច្បាប់ ៕
ទោះបីព្យាយាមបិទបាំងដោយការបញ្ជូនលេខ និងស៊ីសង តាមប្រពន្ធ័ទូរសព្ទ័យ៉ាងណា ក៏មិនអាចគេចផុតពីភ្នែកសមត្ថកិច្ចបានឡើយ ហើយបើមិនចង់ជាប់សំណាញ់ច្បាប់ សូមបញ្ឈប់ជាបន្ទាន់ ព្រោះល្បែងនាំនូវក្តីវិនាស និងអសន្តិសុខសង្គម ។ លោកវរៈសេនីយ៍ឯក ព្រំ សំណាង អធិការនគរបាលស្រុកកៀនស្វាយ បានប្រាប់ឱ្យដឹងថា យោងមតិដឹកនាំរបស់លោក ឡូវ សុខសាន អភិបាលស្រុក និងដើម្បីចូលរួមពង្រឹងគោលនយោបាយភូមិ-ឃុំ មានសុវត្ថិភាព កាលពីវេលាម៉ោងប្រមាណ១៥និង៤០នាទី ថ្ងៃទី១៧ កុម្ភៈ ២០២៥កន្លងទៅនេះ កម្លាំងយើងបានបង្ក្រាបល្បែងស៊ីសងខុសច្បាប់(កន្ទុយលេខ) ១ករណី នៅក្នុងភូមិព្រែកតានប់២ ឃុំកំពង់ស្វាយ ស្រុកកៀនស្វាយ ដោយបានឃាត់ខ្លួនស្ត្រីអ្នកកត់ម្នាក់ ឈ្មោះ សុន សុភី អាយុ៤២ឆ្នាំ មុខរបរកត់ឆ្នោត រស់នៅក្នុងភូមិព្រែកដូង ឃុំកំពង់ស្វាយ ជាមួយវត្ថុតាងមួយចំនួន កសាងសំណុំរឿងបញ្ជូនទៅតុលាការចាត់ការតាមច្បាប់។ លោកអធិការបានបន្ថែមថា នាវេលាកើតហេតុខាងលើ នៅពេលដែលកម្លាំងផ្នែកព្រហ្មទណ្ឌស្រុក ចុះល្បាតដើម្បីពង្រឹងសន្តិសុខ សណ្តាប់ធ្នាប់សង្គម ក្នុងភូមិសាស្ត្រទទួលខុសត្រូវរបស់ខ្លួន ក៏បានប្រទះឃើញជនសង្ស័យជាស្ត្រីខាងលើ កំពុងអង្គុយកត់ឆ្នោតជាប់ហ្នឹងផ្លូវលំ ក្នុងភូមិ ក៏បានសហការជាមួយកម្លាំងប៉ុស្តិកំពង់ស្វាយ ក្រុមប្រឹក្សាឃុំ ធ្វើការឃាត់ខ្លួន និងដកហូតជាក់ស្តែងនូវ ទូរសព្ទ័១គ្រឿង ក្រដាស់កត់ឆ្នោតរួច និងមិនទាន់កត់ជាច្រើន ប្រដាប់កិប ម៉ាស៊ីនគិតលេខ ប៊ិច ក្រដាស់ផ្តាន កាបូបស្ពាយ២ និងប្រាក់ជាង៦ម៉ឺនរៀល ផងដែរ។ ក្រោយឃាត់បានជាក់ស្តែង ជនសង្ស័យបានឆ្លើយប្រាប់ថា ខ្លួនបានកត់ឆ្នោតវៀតណាម នឹងខ្មែររយៈពេល៣ឆ្នាំមកហើយ រហូតមកដល់បច្ចុប្បន្ន ក្នុង១ថ្ងៃកត់ឆ្នោតបានប្រាក់ប្រមាណពី១០ម៉ឺនរៀល ទៅ៤០ម៉ឺនរៀល ដោយគិតទឹកក្នុង១ម៉ឺនរៀល បានទឹក៩៣០រៀល ដោយបានបញ្ជូនលេខទៅមេតាមរយៈឆាត ហើយពេលព្រឹកឡើងបានប្រមូលប្រាក់ឲ្យទៅមេម្នាក់(មិនស្គាល់ទីលំនៅ) ជារៀងរាល់ថ្ងៃ ៕
នៅយប់ថ្ងៃអាទិត្យ ទី១៦ កុម្ភៈ ២០២៥ ម្សិលមិញ មានគ្រោះថ្នាក់ចរាចរណ៍មួយកើតឡើងនៅលើកំណាត់មហាវិថីសម្តេចតេជោ (ផ្លូវ60M) ចំណុចខាងមុខក្រុមហ៊ុន ជឺជាំង ស៊ីនជឺ ត្រេដីង ស្ថិតក្នុងភូមិបត្តាជី សង្កាត់ព្រែកហូរ ក្រុងតាខ្មៅ ខេត្តកណ្តាល ។ គ្រោះថ្នាក់នេះ បង្កឡើងដោយម៉ូតូម៉ាក SUZUKI NEX ពណ៌សលាយខៀវ ពាក់ផ្លាកលេខកណ្តាល 1AT-1563 បុកជាមួយរថយន្តម៉ាក TOYOTA WIGO ពណ៌ក្រហម ពាក់ផ្លាកលេខភ្នំពេញ 2BW-4593។ អ្នកបើកបរម៉ូតូដែលពាក់មួកសុវត្ថិភាព និងអ្នករួមដំណើរម្នាក់ដែលមិនពាក់មួកសុវត្ថិភាព បានរងរបួសធ្ងន់ និងត្រូវបានបញ្ជូនទៅសង្គ្រោះនៅមន្ទីរពេទ្យក្នុងរាជធានីភ្នំពេញ។ ចំណែកអ្នកបើកបររថយន្តរត់គេចចេញពីកន្លែងកើតហេតុ។ តាមការសន្និដ្ឋានបឋមរបស់សមត្ថកិ្ច គ្រោះថ្នាក់នេះ បណ្តាលមកពីអ្នកបើកបរម៉ូតូបើកបរខ្ជីខ្ជា ខ្វះការប្រុងប្រយ័ត្ន និងបានចូលទៅចំណែកផ្លូវខាងរថយន្ត។ យានជំនិះទាំងពីរទទួលរងការខូចខាតធ្ងន់ និងត្រូវបានយកទៅរក្សាទុកនៅអធិការដ្ឋាននគរបាលក្រុងតាខ្មៅ ដើម្បីចាត់ការតាមនីតិវិធីច្បាប់ ៕
កម្លាំងនគរបាលស្រុកស្អាង ខេត្តកណ្តាល បានឃាត់ខ្លួនជនសង្ស័យម្នាក់ពាក់ព័ន្ធនឹងការរក្សាទុកសារធាតុញៀនខុសច្បាប់ នៅថ្ងៃទី ១៦ ខែកុម្ភៈ ២០២៥ វេលាម៉ោង ២២:៣០ នាទី នៅភូមិត្រេីយត្រឹង្ស ឃុំព្រែកអំបិល ។ ជនសង្ស័យមានឈ្មោះ សាន សិទ្ធ ភេទប្រុស អាយុ ១៩ ឆ្នាំ មានទីលំនៅភូមិព្រែកថ្មី ត្រូវបានសមត្ថកិច្ចឃាត់ខ្លួន។ រីឯវត្ថុតាងដែលត្រូវបានចាប់យក៖ សារធាតុញៀន “Ice” ០.០៦ ក្រាម។ ទូរស័ព្ទ NOKIA ០១ គ្រឿង។ បច្ចុប្បន្ន ជនសង្ស័យកំពុងស្ថិតក្នុងការឃាត់ខ្លួននៅអធិការដ្ឋាននគរបាលស្អាង ដើម្បីអនុវត្តតាមនីតិវិធី។