អតិថិជនម្នាក់ បានបង់រំលស់ខុនមួយកន្លែង ស្ថិតនៅខណ្ឌជ្រោយចង្វារ រាជធានីភ្នំពេញ ដែលក្រុមហ៊ុនសាងសង់មានឈ្មោះថា «យិន យី វេនឈ័រ ខូអិលធីឌី» ។ ដោយអតិថិជនអត់ការធ្មត់នឹងរង់ចាំសន្យារបស់ក្រុមហ៊ុនទៀតហើយ ព្រោះសន្យាទាំងអស់នោះ គឺជាសន្យាខ្យល់តែប៉ុណ្ណោះ ដូចនេះ អតិថិជនបានសម្រេចទុកភារកិច្ចជូនទៅមេធាវី កេត ច័ន្ទម៉ានីន ជូនដំណឹងទៅខាងក្រុមហ៊ុន សូមរំលាយកិច្ចព្រមព្រៀងទិញលក់ខុនដូ និងសុំឲ្យក្រុមហ៊ុនប្រគល់ប្រាក់ចំនួន ៦.១៤៧៨,៨ដុល្លារ និងសងជំងឺចិត្តជាទឹកប្រាក់ចំនួន ១ម៉ឺនដុល្លារ មកឲ្យអតិថិជន យ៉ាងយូរត្រឹមថ្ងៃទី២១ ខែមករា ឆ្នាំ២០២៤ ។
យោងតាមលិខិតរបស់មេធាវី កេត ច័ន្ទម៉ានីន ជូនដំណឹងទៅក្រុមហ៊ុន «យិន យី វេនឈ័រ ខូអិលធីឌី» បានឲ្យដឹងថា កូនក្តីរបស់ខ្លួន បានចុះកិច្ចព្រមព្រៀងទិញលក់ ឡាវីស្តាវ័ន្ត ខុនដូ ចំនួន១ ចុះថ្ងៃទី២៧ ខែឧសភា ឆ្នាំ២០២១ ជាមួយក្រុមហ៊ុន និងបាបង់ប្រាក់ចំនួន ៣១.៧៩២,៧ដុល្លារ ជាប្រាក់ ៣០% នៅដំណាក់កាលដំបូង និងបានបង់ប្រាក់ថ្លៃទិញលក់ជាប្រចាំខែចំនួន ១.០៦០ដុល្លារ រយៈពេល២៨ខែ ស្មើនឹងចំនួន ២៩.៦៨០ដុល្លារ ។ សរុបមក កូនក្តីរបស់ខ្លួនបានបង់ប្រាក់ចំនួន ៦១.៤៧៨,៨ដុល្លារ ទៅឲ្យក្រុមហ៊ុន ។ ប៉ុន្តែខាងក្រុមហ៊ុនមិនបានសាង់សង់សំណង់ខុនដូឲ្យទាន់ពេលវេលានោះទេ ដោយនៅក្នុងខ្លឹមសារកិច្ចព្រមព្រៀង ក្រុមហ៊ុនត្រូវប្រគល់ផ្ទះដែលសាងសង់រួចរាល់នៅថ្ងៃទី៣០ ខែមិថុនា ឆ្នាំ២០២២ ហើយមកដល់សព្វថ្ងៃនេះ កូនក្តីរបស់ខ្លួនពុំទាន់ទទួលបានផ្ទះដើម្បីចូលទៅរស់នៅទេ ។ លើសពីនេះទៅទៀត ក្រុមហ៊ុនបានធ្វើការជូនដំណឹងអំពីការពន្យាពេលប្រគល់ផ្ទះ ដោយប្រគល់ទៅថ្ងៃទី៣០ ខែកញ្ញា ឆ្នាំ២០២៤ ដោយឯកឯង គ្មានការយល់ព្រមព្រៀងពីកូនក្តីខ្លួន ដែលជាភាគីអ្នកទិញ ។
ដូច្នេះ កូនក្តីខ្លួន សូមរំលាយកិច្ចសន្យា ដោយសារសកម្មភាពរបស់ក្រុមហ៊ុន បានធ្វើឲ្យប៉ះពាល់ ខូចខាតប្រយោជន៍ និងពេលវេលាយ៉ាងធ្ងន់ធ្ងរដល់កូនក្តីរបស់ខ្លួន ដូចនេះ ខ្លួនជាមេធាវីតំណាងដោយអាណត្តិឲ្យអតិថិជន សូមជូនដំណឹងទៅតំណាងក្រុមហ៊ុន យិនយី វេនឈ័រ ខូអិលធីឌី ដើម្បីរំលាយកិច្ចព្រមព្រៀងទិញលក់ ឡាវីស្តាវ័ន្តខុនដូ ចុះថ្ងៃទី២៧ ខេឧសភា ឆ្នាំ២០២១ និងសុំឲ្យប្រគល់ប្រាក់ចំនួន ៦១.៤៧៨,៨ដុល្លារ និងសំណងជំងឺចិត្តជាទឹកប្រាក់ចំនួន ១ម៉ឺនដុល្លារ មកកូនក្តីរបស់ខ្លួន យ៉ាងយូរត្រឹមថ្ងៃទី២១ ខែមករា ឆ្នាំ២០២៤ ។
អង្គភាពសារព័ត៌មានរបស់យើង រង់ចាំការបកស្រាយបំភ្លឺពីភាគីពាក់ព័ន្ធរបស់ក្រុមហ៊ុន យិន យី វេនឈ័រ ខូអិលធីឌី រៀងរាល់ម៉ោងធ្វើការ ៕