វាមិនមែនជារឿងចម្លែកអីទេ សម្រាប់ការរំលោភបំពានយកចំណីផ្លូវសាធារណៈធ្វើអាជីវកម្ម នៅក្នុងភូមិសាស្ត្ររាជធានីភ្នំពេញ… ប៉ុន្តែសម្រាប់ការ៉ាស់ជួសជុលរថយន្តមួយកន្លែងនេះវិញ គឺហាក់ដូចជាថ្លើមធំ និងធ្វើសកម្មភាពអនាធិបតេយ្យហួសហេតុពេកហើយ!
ជាក់ស្តែង នៅព្រឹកទី២៥ ខែកុម្ភៈ ឆ្នាំ២០២៦នេះ ក្រុមការងារ ដឹរៀលញូស៍ យើង បានចុះទៅដល់ទីតាំងផ្លូវលេខ១៥៦ ក្នុងសង្កាត់វាលវង្ស ខណ្ឌ៧មករា និងបានប្រទះឃើញទិដ្ឋភាពដែលមិនអាចទទួលយកបាន។ ម្ចាស់ទីតាំងបានធ្វើសកម្មភាពជួសជុល និងរុះរើគ្រឿងម៉ាស៊ីននៅកណ្ដាលទ្រូងផ្លូវតែម្ដង ដោយមានការប្រើប្រាស់ឧបករណ៍ដងស្ទូច លើកដាក់គ្រឿងម៉ាស៊ីនរថយន្តយ៉ាងរំភើយ និងមានរថយន្តស៊េរីទំនើបៗចតចោលរាយប៉ាយពេញដងផ្លូវថែមទៀតផង ដែលនេះជាការរំលោភបំពានយ៉ាងច្បាស់ក្រឡែតទៅលើច្បាប់ស្តីពីចរាចរណ៍ផ្លូវគោក និងច្បាប់ស្តីពីផ្លូវថ្នល់ បង្កឱ្យមានការកកស្ទះ និងបាត់បង់សណ្តាប់ធ្នាប់សាធារណៈយ៉ាងធ្ងន់ធ្ងរ។
ជុំវិញភាពអនាធិបតេយ្យដែលនៅតែបន្តកើតមាននេះ លោក ថេង សុថុន អភិបាលខណ្ឌ៧មករា បានបកស្រាយមកកាន់អង្គភាពយើងថា កន្លងមកអាជ្ញាធរធ្លាប់បានចុះចាត់វិធានការស្ទូចយករថយន្ត និងក្បាលឡានចាស់ៗចេញអស់មួយចំនួនធំរួចមកហើយ ដោយលោកអះអាងថា បច្ចុប្បន្នសម្រេចបានភាពស្អាតបាតរហូតដល់៨០%។ ទោះជាយ៉ាងណា លោកអភិបាលខណ្ឌបានទទួលស្គាល់ថា នៅសេសសល់ការឈប់ចតរំលោភផ្លូវបន្តិចបន្តួច ដោយសារតែទីតាំងខាងក្នុងការ៉ាស់ពេញពេក។
ផ្ទុយពីការបកស្រាយនេះ ភស្តុតាងជាក់ស្តែងដែលក្រុមការងារយើងថតបាននៅព្រឹកមិញនេះ បង្ហាញថា ម្ចាស់ទីតាំងមិនមែនគ្រាន់តែយកផ្លូវរដ្ឋធ្វើជាកន្លែងចតរថយន្តបណ្តោះអាសន្នដូចការលើកឡើងនោះទេ ប៉ុន្តែបានយកដងស្ទូចម៉ាស៊ីនរថយន្ត មកដាក់ធ្វើសកម្មភាពជួសជុល និងលើកដាក់គ្រឿងម៉ាស៊ីនយ៉ាងអនាធិបតេយ្យនៅកណ្តាលផ្លូវតែម្តង ដែលសកម្មភាពនេះគឺកំពុងរំលោភច្បាប់យ៉ាងចំហ។
សំណួរត្រូវបានចោទឡើងថា តើការថាស្អាតបាន៨០% វាគ្រប់គ្រាន់ហើយឬនៅសម្រាប់សណ្តាប់ធ្នាប់រាជធានី? ព្រោះទិដ្ឋភាពជាក់ស្តែង២០%ដែលសេសសល់ គឺកំពុងធ្វើទុក្ខបុកម្នេញដល់អ្នកធ្វើដំណើរយ៉ាងខ្លាំង។ ក្នុងនាមប្រជាពលរដ្ឋ និងអ្នកធ្វើដំណើរដែលរងផលប៉ះពាល់ នៅតែទទូចសំណូមពរយ៉ាងទទូចដល់ ឯកឧត្តម ឃួង ស្រេង អភិបាលរាជធានីភ្នំពេញ មេត្តាជួយពិនិត្យមើលចំណាត់ការរបស់អាជ្ញាធរថ្នាក់ក្រោមផង ដើម្បីកុំឱ្យយកលេសថា ‘ខាងក្នុងពេញ’ មកធ្វើជាខែលការពារការរំលោភច្បាប់រដ្ឋបន្តទៀត។ អង្គភាព ដឹរៀលញូស៍ យើងខ្ញុំ នឹងបន្តតាមដានករណីនេះរហូតមានចំណាត់ការច្បាស់លាស់ ៕