ឯកឧត្តម គួច ចំរើន អភិបាលខេត្តកណ្តាលបានព្រមានយ៉ាងម៉ឺងម៉ាត់ថា អ្នកដែលសាងសង់សំណង់ ឬរំលោភបំពានដីកម្មសិទ្ធិស្របច្បាប់របស់អ្នកដទៃក្នុងភូមិសាស្ត្រខេត្តកណ្ដាល នឹងត្រូវផ្ដន្ទាទោសតាមច្បាប់ដោយគ្មានការលើកលែងឡើយ។ ការថ្លែងបែបនេះធ្វើឡើងនៅក្នុងពិធីចែកវិញ្ញាបនបត្រសម្គាល់ម្ចាស់អចលនវត្ថុ (ប្លង់រឹង) ជូនប្រជាពលរដ្ឋចំនួន ៣ភូមិ នៅស្រុកស្អាង នាព្រឹកថ្ងៃទី៣០ កក្កដា ២០២៥។
ពិធីដ៏មានសារៈសំខាន់នេះ បានប្រព្រឹត្តទៅក្រោមអធិបតីភាពឯកឧត្ដម ឈឿន ប៊ុនណ្ណារ័ត្ន រដ្ឋលេខាធិការក្រសួងរៀបចំដែនដី នគររូបនីយកម្ម និងសំណង់, ឯកឧត្ដម នូ សាខន ប្រធានក្រុមប្រឹក្សាខេត្តកណ្ដាល និងឯកឧត្ដម គួច ចំរើន អភិបាលខេត្តកណ្ដាល។
ឯកឧត្តមបានបន្តថា ការផ្តល់ជូននូវវិញ្ញាបនប័ត្រសម្គាល់ម្ចាស់អចលនវត្ថុ គឺផ្តល់នូវការធានាបាននូវសិទ្ធិពេញលេញជាកម្មសិទ្ធិករស្របច្បាប់លើដីធ្លី។ ដូច្នេះ ប្រសិនបើមានអ្នកណាម្នាក់មករំលោភលើប័ណ្ណកម្មសិទ្ធិករស្របច្បាប់នេះ ដោយសាងសង់លំនៅឋាន ឬធ្វើអ្វីមួយនៅលើដីកម្មសិទ្ធិកររបស់អ្នកដទៃ នោះមានន័យថាអ្នកទាំងនោះបានប្រព្រឹត្តនូវអំពើល្មើសច្បាប់ ហើយនឹងត្រូវផ្ដន្ទាទោសតាមច្បាប់ដែលបានកំណត់ដោយគ្មានការលើកលែងឡើយ។ ឯកឧត្ដម ក៏បានអំពាវនាវដល់ប្រជាពលរដ្ឋទាំងអស់ មិនត្រូវរំលោភលើកម្មសិទ្ធិរបស់អ្នកដទៃឡើយ ហើយរាល់ទំនាស់ដីធ្លីទាំងអស់ សូមកុំប្រើប្រាស់នូវពាក្យថា “អ្នកឈ្នះបានដី អ្នកចាញ់បានលុយ” ផ្ទុយទៅវិញ យើងទាំងអស់គ្នាត្រូវតែចូលរួមគោរពច្បាប់ទាំងអស់គ្នា។
ជាមួយគ្នានេះផងដែរ ឯកឧត្តមបានសំណូមពរដល់ប្រជាពលរដ្ឋដែលទទួលបានបណ្ណកម្មសិទ្ធិនេះហើយ សូមរក្សាទុកឲ្យបានល្អ ព្រោះបណ្ណនេះមានអត្ថប្រយោជន៍សំខាន់ណាស់ និងមានភាពងាយស្រួលក្នុងការយកទៅប្រើប្រាស់តាមសេចក្តីត្រូវការ ដូចជាយកទៅលក់ ជួល បញ្ចាំ ឬធ្វើអំណោយជាដើម ដើម្បីជាទុនក្នុងការប្រកបរបរចិញ្ចឹមជីវិតប្រចាំថ្ងៃ។
លោក សុក កាន់ណារិទ្ធ ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកណ្តាល បានឲ្យដឹងថា គិតមកដល់ពេលនេះ ការចុះបញ្ជីបានរួចរាល់ចំនួន ៦៤ ឃុំ/សង្កាត់ លើ ១២៧ ឃុំ/សង្កាត់ ស្មើនឹង ៥៦៣ ភូមិ លើ ១.០១០ ភូមិ ដែលស្មើនឹង ៥៦% នៃចំនួនភូមិសរុប។ លោកបានបន្តថា ការចេញវិញ្ញាបនបត្រសម្គាល់ម្ចាស់អចលនវត្ថុបានចំនួន ៤១២.៣៩៥ បណ្ណ និងបានចែកជូនដល់ដៃប្រជាពលរដ្ឋសរុបចំនួន ២៤០លើក ស្មើនឹង ៣៤០.៨៤៦ បណ្ណ។ ថ្ងៃនេះគឺជាលើកទី២៤១ នៃការចែកបណ្ណ ដែលនឹងត្រូវផ្តល់ជូនប្រជាពលរដ្ឋចំនួន ២.៤៩០បណ្ណ ពីភូមិចុងកោះគរ ភូមិប៉ារែនលើ និងភូមិឬស្សីជ្រោយ នៃឃុំស្វាយប្រទាល ស្រុកស្អាង៕
