បុរសម្នាក់ដែលជាមុខសញ្ញាលួចម៉ូតូយ៉ាងសកម្ម ត្រូវបានកម្លាំងនគរបាលក្រុងតាខ្មៅឃាត់ខ្លួន កាលពីថ្ងៃទី៣០ កក្កដា ២០២៥ បន្ទាប់ពីជាប់ពាក់ព័ន្ធនឹងករណីលួចម៉ូតូ ២លើកផ្សេងគ្នា ដែលបានកើតឡើងកាលពីខែមិថុនា ឆ្នាំ២០២៥។ ជនសង្ស័យរូបនេះក៏ត្រូវបានរកឃើញថា មានផ្ទុកសារធាតុញៀនក្នុងទឹកនោមផងដែរ។
លោកវរសេនីយ៍ឯក យី វណ្ណដា អធិការនគរបាលក្រុងតាខ្មៅបានឲ្យដឹងថា ជនសង្ស័យដែលត្រូវបានឃាត់ខ្លួនមានឈ្មោះ ដួង រដ្ឋា (ប្រុស, ២៩ឆ្នាំ) មុខរបរមិនពិតប្រាកដ រស់នៅភូមិលេខ៥ សង្កាត់ស្វាយរលំ ក្រុងតាខ្មៅ ខេត្តកណ្តាល។
លោកអធិការបានបន្តថា ជនសង្ស័យរូបនេះបានធ្វើសកម្មភាពលួចម៉ូតូ ២ករណីផ្សេងគ្នា៖
ករណីទី១: កាលពីថ្ងៃទី០៦ មិថុនា ២០២៥ វេលាម៉ោង ២០និង៣០នាទី ជនសង្ស័យ ដួង រដ្ឋា រួមជាមួយបក្ខពួកម្នាក់ទៀតឈ្មោះ ពុំ រដ្ឋា ហៅឆាង (ប្រុស, ២៥ឆ្នាំ) ដែលបានរត់គេចខ្លួន បានធ្វើសកម្មភាពលួចម៉ូតូ Honda C125 ពណ៌ខ្មៅ ស៊េរីឆ្នាំ២០២៥ ពាក់ស្លាកលេខ ភ្នំពេញ 1LA-1509 របស់ជនរងគ្រោះឈ្មោះ ង្វៀង យ៉ាងឌឿក (ប្រុស, ១៦ឆ្នាំ) នៅចំណុចភូមិលេខ១ក សង្កាត់ស្វាយរលំ ក្រុងតាខ្មៅ។
ករណីទី២: កាលពីថ្ងៃទី១៦ មិថុនា ២០២៥ វេលាម៉ោង ២៣និង៣០នាទី ជនសង្ស័យ ដួង រដ្ឋា រួមជាមួយបក្ខពួកម្នាក់ទៀតឈ្មោះ ឈារ សីហស្ត័ ហៅតោ (ប្រុស, ៣២ឆ្នាំ) ដែលបានរត់គេចខ្លួន បានធ្វើសកម្មភាពលួចម៉ូតូ Honda C125 ពណ៌ខ្មៅ ស៊េរីឆ្នាំ២០១៩ ពាក់ស្លាកលេខ ភ្នំពេញ 1HN-7280 របស់ជនរងគ្រោះឈ្មោះ សេន យូវីតា (ប្រុស, ២២ឆ្នាំ) នៅចំណុចភូមិថ្មី សង្កាត់តាខ្មៅ ក្រុងតាខ្មៅ។
លោកអធិការបានឲ្យដឹងទៀតថា ក្រោយពីបានធ្វើសកម្មភាពលួចម៉ូតូទាំងពីរលើក ជនសង្ស័យ ដួង រដ្ឋា និងបក្ខពួកបានជិះគេចខ្លួនបាត់ទៅ។ លុះមកដល់ថ្ងៃទី៣០ កក្កដា ២០២៥ ទើបកម្លាំងនគរបាលក្រុងតាខ្មៅបានធ្វើការឃាត់ខ្លួនជនសង្ស័យ ដួង រដ្ឋា យកមកសាកសួរ។ វត្ថុតាងដែលចាប់យករួមមាន ឧបករណ៍សម្រាប់តាមដាន GPS ឆេះខ្លោចមួយគ្រឿង (របស់ជនរងគ្រោះ)។
នៅចំពោះមុខសមត្ថកិច្ច ជនសង្ស័យឈ្មោះ ដួង រដ្ឋា បានឆ្លើយសារភាពថា ខ្លួននិងបក្ខពួកពិតជាបាននាំគ្នាធ្វើសកម្មភាពលួចម៉ូតូរបស់ជនរងគ្រោះទាំងពីរករណីខាងលើពិតប្រាកដមែន។
បច្ចុប្បន្ន ជនសង្ស័យកំពុងឃាត់ខ្លួនជាបណ្តោះអាសន្ននៅអធិការដ្ឋាននគរបាលក្រុងតាខ្មៅ ដើម្បីបន្តចាត់ការតាមនីតិវិធី៕
