ចៅប្រុសម្នាក់ត្រូវបានសមត្ថកិច្ចឃាត់ខ្លួនបានភ្លាមៗ កាលពីវេលាម៉ោង ០២:០០នាទីរំលងអាធ្រាត្រ ឈានចូលថ្ងៃទី០៦ កក្កដា ២០២៥ ក្រោយពីបានគំរាមសម្លាប់ និងធ្វើឲ្យខូចខាតទ្រព្យសម្បត្តិដោយចេតនាទៅលើយាយបង្កើតខ្លួនឯង នៅចំណុចភូមិធ្យូង ឃុំវិហារលួង ស្រុកពញាឮ ខេត្តកណ្ដាល បន្ទាប់ពីជនរងគ្រោះដាក់ពាក្យបណ្ដឹង។
ប្រភពពីសមត្ថកិច្ចបានឲ្យដឹងថា ជនរងគ្រោះក្នុងករណីនេះ គឺឈ្មោះ គឹម ហ៊ (ស្រី, ៨៦ឆ្នាំ) ត្រូវជាយាយបង្កើតរបស់ជនសង្ស័យ មានទីលំនៅភូមិធ្យូង ឃុំវិហារលួង ស្រុកពញាឮ ខេត្តកណ្ដាល។ ចំណែកជនសង្ស័យដែលត្រូវបានឃាត់ខ្លួន គឺឈ្មោះ ខៀវ ចាន់ណាត ហៅគោ (ប្រុស, ២៨ឆ្នាំ) មុខរបរកម្មករ ត្រូវជាចៅបង្កើត មានទីលំនៅភូមិធ្យូង ឃុំវិហារលួង ស្រុកពញាឮ ខេត្តកណ្ដាល។ ក្រោយការពិនិត្យ ជនសង្ស័យមានសារធាតុញៀនក្នុងទឹកនោម(+)។ វត្ថុតាងចាប់យកពុំមានឡើយ ប៉ុន្តែមានសម្ភារៈខូចខាត រួមមានផ្ទាំងកញ្ចក់ទ្វារផ្ទះចំនួន ១ផ្ទាំង។
ប្រភពដដែលបានបន្តរៀបរាប់ពីសភាពរឿងហេតុថា នៅថ្ងៃកើតហេតុ វេលាម៉ោង ០២:០០នាទីរំលងអាធ្រាត្រ ជនសង្ស័យឈ្មោះ ខៀវ ចាន់ណាត ហៅគោ បានត្រឡប់មកពីផឹកស៊ីវិញក្នុងស្ថានភាពស្រវឹងស្រាខ្លាំង។ ពេលមកដល់ផ្ទះរបស់ជនរងគ្រោះជាយាយបង្កើត ជនសង្ស័យបាននិយាយរករឿងឡូឡាឈ្លោះប្រកែកជាមួយជនរងគ្រោះ ដោយសួរថា “មិចបានយាយឯងទៅនិយាយប្រាប់ថៅកែរបស់ខ្ញុំថា៖ ខ្ញុំជេរបញ្ចោរយាយឯង”។ ក្នុងពេលនោះ ជនសង្ស័យ ខៀវ ចាន់ណាត ហៅគោ ខឹងបានយកជើងធាក់ទៅលើផ្ទាំងកញ្ចក់ទ្វារផ្ទះ បណ្ដាលឲ្យបែកខូចខាត ព្រមទាំងធាក់កៅអីជ័រឲ្យរលំ និងបានជេរគំរាមប្រមាថ ចង់អាកសម្លាប់ទៅលើជនរងគ្រោះបន្ថែមទៀតផង។ ក្រោយមកទៀត ជនសង្ស័យក៏បានចូលទៅសម្រាកនៅក្នុងផ្ទះបាត់ទៅ។
ប្រភពសមត្ថកិច្ចបានឲ្យដឹងទៀតថា លុះព្រឹកឡើងថ្ងៃដដែល វេលាម៉ោង ០៩:០០ព្រឹក ជនរងគ្រោះឈ្មោះ គឹម ហ៊ បានមកដាក់ពាក្យបណ្ដឹងនៅប៉ុស្តិ៍រដ្ឋបាលវិហារលួង ប្តឹងចោទប្រកាន់ទៅលើជនសង្ស័យឈ្មោះ ខៀវ ចាន់ណាត ហៅគោ ដែលបានធ្វើសកម្មភាពបំផ្លិចបំផ្លាញផ្ទាំងកញ្ចក់ទ្វារផ្ទះ និងគំរាមសម្លាប់លើរូបខ្លួន។ បន្ទាប់ពីទទួលពាក្យបណ្ដឹងរួច កម្លាំងប៉ុស្តិ៍រដ្ឋបាលវិហារលួង បានចុះទៅដល់កន្លែងកើតហេតុធ្វើស្រាវជ្រាវរកជនសង្ស័យ។ ក្នុងពេលនោះ កម្លាំងបានជួប និងហៅជនសង្ស័យដើម្បីសាកសួរ។ ភ្លាមៗនោះ ជនសង្ស័យបានប្រតាយប្រតប់គ្នាជាមួយកម្លាំងសមត្ថកិច្ច។ ក្រោយមកទៀត កម្លាំងប៉ុស្តិ៍បានធ្វើការឃាត់ខ្លួនជនសង្ស័យបញ្ជូនមកអធិការដ្ឋាននគរបាលស្រុកពញាឮ ដើម្បីសាកសួរ។
នៅចំពោះមុខសមត្ថកិច្ច ជនសង្ស័យបានឆ្លើយសារភាពថា រូបខ្លួនពិតជាបានយកជើងធាក់បំផ្លិចបំផ្លាញផ្ទាំងកញ្ចក់ទ្វារផ្ទះ បណ្ដាលឲ្យបែកខូចខាត និងជេរគំរាមសម្លាប់ទៅលើឈ្មោះ គឹម ហ៊ ត្រូវជាយាយបង្កើតប្រាកដមែន ដោយសាររូបខ្លួនខឹងនឹងយាយរបស់ខ្លួននិយាយប្រាប់ថៅកែរបស់ខ្លួន រឿងខ្លួនជេរយាយរបស់ខ្លួន។ ជនសង្ស័យក៏បានសារភាពទៀតថា កន្លងមកខ្លួនធ្លាប់ធ្វើសកម្មភាពជេរប្រមាថ និងជេរគំរាមប្រមាថទៅលើជនរងគ្រោះឈ្មោះ គឹម ហ៊ ត្រូវជាយាយបង្កើត ជាច្រើនលើកពេលខ្លួនស្រវឹងស្រា។
បច្ចុប្បន្ន ជនសង្ស័យកំពុងឃាត់ខ្លួននៅអធិការដ្ឋាននគរបាលស្រុកពញាឮ ដើម្បីចាត់ការតាមនីតិវិធីច្បាប់៕
