កម្លាំងអធិការនគរបាលខណ្ឌទួលគោក ដឹកនាំដោយលោកវរសេនីយ៍ឯក ស៊ឹម ពិសិដ្ឋ អធិការនគរបាលខណ្ឌទួលគោក សហការជាមួយកម្លាំងនាយកដ្ឋាននគរបាលព្រហ្មទណ្ឌ នៃអគ្គស្នងការដ្ឋាននគរបាលជាតិ និងមានការសម្របសម្រួលពីព្រះរាជអាជ្ញារងអមសាលាដំបូងរាជធានីភ្នំពេញ កាលពីថ្ងៃទី២០ ខែកុម្ភៈ ឆ្នាំ២០២៤ ម្សិលមិញ បានចុះបង្ក្រាបទីតាំង ទិញ-លក់ ម៉ូតូ មួយកន្លែង ផ្លូវ១៩២ សង្កាត់ទឹកល្អក់៣ ខណ្ឌទួលគោក រាជធានីភ្នំពេញ ពាក់ព័ន្ធករណីទទួលផលចោរកម្ម ។
នៅក្នុងប្រតិបត្តិការខាងលើ សមត្ថកិច្ចបានធ្វើការដកហូតម៉ូតូចំនួន ៣១គ្រឿង, ផ្លាកលេខម៉ូតូចំនួន ១១២សន្លឹក, កាតគ្រីម៉ូតូ ចំនួន ៧២, អត្តសញ្ញាណបណ្ណចំនួន ១១ច្បាប់, សំបុត្រកំណើតចំនួន ០៣ច្បាប់, ធុងខ្យល់សម្រាប់កឹបស្លាកលេខ ចំនួន០១ និងកូនសោមួយចំនួន ។ ចំណែកម្ចាស់ទីតាំងមានឈ្មោះ ប្រាក់ រដ្ឋា បានរត់គេចខ្លួនបាត់ ។
បច្ចុប្បន្ន ទីតាំងខាងលើ ត្រូវបានបិទជាបណ្តោះអាសន្ន ចំណែកសម្ភារៈដកហូត ត្រូវបានយកទៅរក្សាទុកនៅនាយកដ្ឋានព្រហ្មទណ្ឌនៃអគ្គស្នងការដ្ឋាននគរបាលជាតិ ដើម្បីចាត់ការបន្តនីតិវិធី ៕
