កម្លាំងសមត្ថកិច្ចអធិការដ្ឋាននគរបាលស្រុកកណ្តាលស្ទឹង បានឃាត់ខ្លួនជនសង្ស័យម្នាក់ ពាក់ព័ន្ធនឹងការជួញដូរ និងប្រើប្រាស់សារធាតុញៀន ដោយខុសច្បាប់ នៅក្នុងខ្ទម ភូមិដំណាក់ត្របែក ឃុំត្រពាំងវែង ស្រុកកណ្តាលស្ទឹង ខេត្តកណ្តាល ។
ជនសង្ស័យមានឈ្មោះ ខុម ចំរ៉ុង ភេទប្រុស អាយុ ២២ឆ្នាំ ជនជាតិខ្មែរ។ ការឃាត់ខ្លួននេះ កើតឡើងនៅថ្ងៃទី ១២ កុម្ភៈ ២០២៥ វេលាម៉ោងជាង ២រសៀល បន្ទាប់ពីប្រជាពលរដ្ឋជូនដំណឹងសមត្ថកិច្ចអំពីសកម្មភាពលក់គ្រឿងញៀនរបស់ជនសង្ស័យ។ ជាមួយនឹងការឃាត់ខ្លួន សមត្ថកិច្ចបានចាប់យកម្សៅក្រាមពណ៌សថ្លា សង្ស័យជាសារធាតុញៀនមេតំហ្វេតាមីន (Ice) ចំនួន ៣ កញ្ចប់ មានទម្ងន់ ០.៨៨ ក្រាម និងឧបករណ៍ប្រើប្រាស់មួយចំនួន ។
នៅចំពោះមុខសមត្ថកិច្ច ជនសង្ស័យបានសារភាពថា សារធាតុញៀននេះជារបស់ខ្លួន ដែលបានទិញពីបុរសម្នាក់ឈ្មោះ គង់ នៅភូមិត្រពាំងបាគូរ ក្នុងតម្លៃ ៤០.០០០ រៀល ដើម្បីលក់បន្ត និងប្រើប្រាស់ផ្ទាល់។ បច្ចុប្បន្ន សមត្ថកិច្ចកំពុងបន្ដសាកសួរ និងកសាងសំណុំរឿង ដើម្បីចាត់ការតាមនីតិវិធីច្បាប់ ៕
